Mąątɛ̨nɛ̨ 83 - Yálá laawoo hɛɓɛ (dc)Israɛlə nwɔ hvɛli woo 1 Wələ woo, Asafə nwɔ hvɛ́li woo. 2 Ee Yálá! 'Hvó ə́ laa pilɛ lɔ tin! 'Hvó tɔɔ lɔ tii tin, ə́ mɛ̨ihaa. 3 Ə́ yówóɠaa kaa li, diɛ hvaa ŋɛ̨i di nwun ɉu nwɔ̨ɔ̨i! Nuąi da tɔɔ ə́ lai di kaa li, diɛ di nwun dɛi! 4 Di kaa nɔgilii kɛi a ə́ wɔ nu kanŋaai, diɛ ɲaɓa nwun dɔɔ kɛ ə́ wɔ hɛn gɔwi ɓa. 5 Diɛ kɛ diɛ: «'Ka pa ka gu di huwu pu, gu di kpɛɛ lɔi mɛ̨i, di hvo kɛa Israɛlə laa mɛ̨n yɛnɛ̨ɛ̨ ɓɛ.» 6 Di woo tɔɔi aa kɛ tanɔ̨n di wɔ nwun dɔɔi hu; diɛ di yee lɔ gee hu, diɛ pɛlɛ yɛ́. 7 Edɔmə nuą, Ismaɛlə lonnii, Moabə nuą da Hagarə lonnii, 8 Gevalə nuą, Amɔn nuą, Amalɛkə nuą, Filisti nuą da Tirə nuą. 9 Ə mą kɛ, Asiri nuą, aa too di pɔ, yɛ kpɔnmąą tɛɛ Lɔtə lonnii pɔ. 10 'Di hon yɛ bələi ə́ Madian hon na, yɛ Sisera da Yavin, Kisɔn yá huluun ɉii. 11 Di di ɲąąyíi Ein-Dɔrə; di wɔlɔ di mąąpənə a túlún bɔlɔ. 12 Di di wɔ tɔɔɓɛlaai hon yɛ Orɛvə da Ɉeɛvə, di ɲɛ̨itɔwɔ nuą kəlee hon yɛ Ɉeva da Salmuna, 13 diɛ ɓə kɛi kɛ diɛ: «'Ka gu Yálá nwɔ lɔiɠaai həɠə a gu wɔɔ!» 14 Nwɔ́ Yálá, di hvie hvié tɔɔ, yɛ bələi tulɔ vaŋą a gɛ la a mɔ̨nun gala. 15 Yɛ bələi nwɔ̨n a kɛ lɔwɔ kələn ɉii la, yɛ bələi nwɔ̨n a yee hon na. 16 'Hvilɛn di pulu a ə́ hvaŋą kɛnɛ̨, 'di mąąɲɔw a ə́ wɔ tulɔ hvaŋąi. 17 'Di ɲɛ̨i paa a nwumɛ̨, diɛ kɛa ə́ laa kwɛli, Yai-Laa. 18 Di hu ə pu diɛ a nwumɛ̨ da ɲɔw, di ɓɛlɛ ə kpɛɛ diɛ, ɓáá ə kulɔ diɛ, ə lɛɛ ɉu di haa la. 19 Di kili ə pu ɉu, diɛ kɛ: Yɛ́ tanɔ̨n gbən ɓə ə́ laa ɓaa a: Yai-Laa, ə́ ɓo a Hɛn Gəlee Mɛ̨imun yɛnɛ̨ɛ̨ nąą kəlee! |