Mąątɛ̨nɛ̨ 81 - Yálá laawoo hɛɓɛ (dc)

Nwɔ́ nu huwui a nwəli tɔɔ kɛ nwóó ɓa

¹ Nwələ ɲɛ̨itɔwɔ mun, hvaa mąą wələ. Asafə nwɔ wələ woo.

² 'Ka tomą a kwəinɛ̨ɛ̨ Yálá pɔ pələ, Yaa ɓə a gu wɔ huwalawala, 'ka ka yee lɔwa Ɉakɔbə nwɔ Yálái ɓa.

³ 'Ka vɛ́liɠaa pu mą! 'Ka mala woo kulɔ, gwɛnįn nwoo nɛ̨ɛ̨, da bɛlɛgwəi.

⁴ 'Ka túlu hvɛɛ ɲąnįn nįnɛ̨ ɓa, a ɲąnįn ɉee yələ yee ɓa, a gu wɔ hɛli yələ.

⁵ Israɛlə yíi pələ li, Ɉakɔbə nwɔ Yálá ɓə gu tí la.

⁶ Yɛnɛ̨ɛ̨ yíi ɓo bələ ta ka ti ə naa Ɉosɛfə nwuɔ̨, ɓɛlɔwai ə pɛlɛ la Eziptə lɔi ɓa, woo ta kaa tooi nwə́lii və́ gɔlɔn.

⁷ Ŋą́ą́ nwɔ tiɛ̨i həɠə nwuɔ̨, ɛlɛɛ, yaan ə diɛ̨i laa.

⁸ Ɓɛlɔwai ə́ kɛi tomą la mɔ̨nɔ̨ hu, ŋą́ ə́ kulɔ ɉu, ŋą́ ə́ woo mu hon, ŋį́ ɓo a nóɔ tulɔ hvąŋą hu, ŋį́ ə́ hu kɔɔn Meriba yá kwɛlɛ.

⁹ Nwɔ́ nu huwu, ə́ wəli tɔɔ, ŋį́ ə́ kilaa pɔ̨nɔ̨, Israɛlə a kɛ yá ə́ wəli tɔɔ nwóó ɓa!

¹⁰ Yálá ta kpɛli hvo kɛ ə́ yəi, 'hvo kwɛli hvilɛn yálá takpɛli ɓa.

¹¹ Ɲą́ą́, Yai-Laa, Ɲą́ą́ ɓə gáá a ə́ wɔ Yálá, Yai ə́ kulɔ Eziptə lɔi hu, 'ə́ laa taɠa kpɔ kɛnɛ̨, ŋą́ kɔ̨nɔ̨n nɔ ə́ la.

¹² Kɛlaa, nwɔ́ nu huwui hvo kɛ nwəli tɔɔ li nwóó ɓa, Israɛlə hvo gɛli mą́ą́.

¹³ Yili ɓə gɛ ŋį́ di lɛɛ laa, di too di wɔ kili wala wala laa hu, di hvilɛn di kwəi kiliɠaa pulu.

¹⁴ Ə li kɛ nwɔ́ nu huwui ə nwəli tɔɔ nwóó ɓa, Israɛlə a hvilɛn gɛ nwɔ́ pələɠaai mɛ̨i,

¹⁵ ŋą́ą́ mą kɛ nɛɛ mą, ŋą́ą́ ɲowoɠaa ɲɛ̨i paa, gɛ́ ɲéé pɛlɛ nuąi daa hee di mɛ̨i, diɛ.

¹⁶ Nuąi Yai-Laa wɛli kpɛɛ diɛ, yiliɠaai də li kɛ di nɛ̨ɛ̨ kwɛlii di hu, dəli lɔ kɛa kɛ yili hu a yələ kəlee.

¹⁷ Yálá ə li Israɛlə kɔ̨nɔ̨n gɛ a mɔ̨nun nįnɛ̨, yɛ bilɛ a kwɛni woló hu kwɛ̨in nwulɔ.