Mąątɛ̨nɛ̨ 8 - Yálá laawoo hɛɓɛ (dc)

Yálá nwɔ mąąwiɛ kɛ̨nɛ̨i

¹ Nwələ ɲɛ̨itɔwɔ mun, Davidə nwɔ Yálá hvɛliwoo.

² Yai-Laa, ku Nąmu, ee kə́! Ə́ laa mąąwia ɓə yɛnɛ̨ɛ̨ nąąkəlee, ə́ wɔ mąąwiɛ kɛ̨nɛ̨i, yɛ́ lan yələkɔlɔn mɛ̨i.

³ Lɛapɛlɛɛ, da ɲįnį kpələ lɛapɛlɛɛ woo ɓə, yá gɛ a hįį kpoloon, yɛ́ tɔɔ la ə́ kɔ́yɔwɔɠaa la; yɛ́ ə́ yowo da kálápiliɠaa laakpulu.

⁴ Ŋą́ ɲɛ̨́i hee yələ kɔlɔn ma, yai ə́ bɛli a Ə́ yee, Ə́ ɲąnįn da pɛmɛ̨lɛ̨n-gɔwɠaa, hɛlɛn ma;

⁵ Lə kpɔ ɓaa a nu kan, yai yá ə́ kili kɛ mą! Lə kpɔ ɓaa a nu, yai yá mąą liihɛlɛn ɉee?

⁶ Ə́ gɛ pələ wolo kɛ kpɔlɔɔ yɛ, a kɛ a Yálá, Ə́ mąąwiɛ da lɛlɛ hee nwuɔ̨ a mąą hon ɉɛn.

⁷ Yɛ́ ɉee ə́ kɛ kóloɠaa kəlee mɛ̨i, ə́ hɛn gəlee pɛlɛ gɔwɔ mu.

⁸ Yɛi kɛ a, ɓɛlaaɠaa da niŋɛ̨ɠaa, di kəlee kpun, ə mą kɛ lɔwɔ huwɔɠaa,

⁹ yələi nwɛ̨niɠaa, da gboloyá hu hɔ̨nwɔ̨leeɠaa, hɛn lɔpee a hiɛ gboloyá hu.

¹⁰ Yai-Laa ku Ną́mu, Ee kə! Ə́ laa mąąwiai ɓə lɔi nąą kəlee!