Mąątɛ̨nɛ̨ 79 - Yálá laawoo hɛɓɛ (dc)

1 Asafə nwɔ wələ woo.

¹ Asafə nwɔ wələ woo. Ee Yálá! Hįi takpɛliɠaa daa lɔ ə́ kwɛlin nɔi hu, daa ə́ wɔ pɛ́lɛ́i mąąliɓi; daa Ɉerusalɛmə lɛɛ a taa kpoloon.

² Daa ə́ wɔ tínuąi powa tɛɛ yələi nwɛ̨nįɠaa pɔ a di kɔ̨nɔ̨n, daa ə́ liiɓa nuą powa tɛɛ lɔwɔ huwɔɠaa pɔ.

³ Daa di ɲąmą kpoloon naa, yɛ Ɉerusalɛmə taa mąątinɛ̨n, di hvo di laali kámą hu.

⁴ Nuąi kwa diɛni ku kaa kwəli tɔ̨nɔ̨ hu, di kaa ku ɓɛlɛkpɛɛi kuɔ, yiiɠaa di kaa ku kwɛlɛ, diɛ yɛlɛ kuɔ, diɛ di laa pu ku hu.

⁵ Yai-Laa, niiholii tii kaa pai lɛɛi ɉu lə yələ ə həli, a doloi tii a nu líikələn gwəi yɛ nwɔ̨n?

⁶ Nɔiɠaai di hvo ə́ kɔ́lɔn, ə́ wɔ liiɲąnwąnąi yɛɛ di mɛ̨i, ə mą kɛ dɔɔɓɛlaai di hva ə́ mąąwiɛ.

⁷ Mąąhɔlɔɓo daa Ɉakɔbə kɛ a di kɔ̨nɔ̨n, daa nwɔ lɔi kala.

⁸ 'Hvó ə́ kiliŋąhiɛ ku tuwɔ pələ ɲɔ̨n bɔlɔɠaa diɛ, ku laakwiyɛn ɉa a ə́ wɔ ɲɛ̨imąąwɛli kaalaai, mąąhɔlɔɓo hvaŋą lɔpee hvo kɛa ku yəi.

⁹ 'Kpɔnmąą tɛɛ ku pɔ, ku ɓalo Yálá, ə́ laa mąąwiaai mąą mɛ̨nį ɓa; 'ku nwun mąąɓo, ku wɔ nɛ̨ŋɛ̨nŋaai waa, ə́ laa mąąwiaai mąą mɛ̨nį ɓa.

¹⁰ Lə mɛ̨nį ɓa hį́i takpɛliɠaa da kɛ kɛi diɛ: «Di wɔ Yálái kaa mį?» Mąąnɛ̨ɛ̨ nuąi tii kili ə pu ɉu ku ɲɛ̨i ɓa, diɛ ə́ wɔ tínuąi tii di di paa, yili gwələ kaa pai kulɔi.

¹¹ Gaho nąmįną wɔlɔwoo ə həli yɛ́, yɛ́i huwalawala kaa ə́ yə́i, nuąi daa di paa mɛ̨nį gili tee di kwəi, yiliɠaai nwun mąąɓo.

¹² Mɔ̨nɔi ku kwɛlɛ nuą daa naa kuɔ, yili gwələ kulɔ diɛ geemɛ̨i mɛ̨ihveelɛ, ə yali di lii ɓa.

¹³ Ɛlɛɛ, kuɔi ŋɛ̨i a ə́ wɔ nu huwui, kuɔi a ə́ wɔ ɓɛlaa kwənąn ɉu taatɛlɛɛɠaa, kuɔ pɛli ə́ laa tɛi a yələ kəlee; kuɔ ə́ mąątɛ̨nɛ̨ wələɠaa too, gbɛlai hva kɛ mą.