Mąątɛ̨nɛ̨ 78 - Yálá laawoo hɛɓɛ (dc)Mɛ̨nį kpɛa kpɛai Yálá ə gɛ Israɛlə ɓa 1 Asafə nwɔ nu mąąkwɛli wələ. 1 Asafə nwɔ nu mąąkwɛli wələ. 'Ŋą́ nu huwu, 'ə́ wəli tɔɔ nwɔ́ tɔ́n nwooi ɓa, 'ə́ wəli tɔɔ nwooɠaai kulɔi ná, ə too ə́ wəlii. 2 Gáá mɛ̨mi ɓoi yɛ hanwon ɉu, gɛ́ tɔwɔ tɔwɔ mɛ̨nįɠaa ɓɛla hanwon ɉu. 3 Mɛ̨nįɠaai ku mɛ̨n, ku ɓo a di kɔ́lɔn ŋąą; mɛ̨nįɠaai ku nąnni di ɉukulɔ kuɔ; 4 Ku hvo pai di looi di lonnii diɛ, Kɛlaa, kwa nɛi háákələi nuą diɛ, da yiiɠaa pa lɛɛi di pulu, Yai-Laa laa tɛ mɛ̨nįɠaa da vaŋą kɛnɛ̨ pələ, da gbalo mɛ̨nįɠaai ə di kɛi, ku kaa pai di hukulɔi. 5 Ə Ɉakɔbə hiɛ pələ lɛ mą, ə tɔ́n naa Israɛlə lɔi hu, dɔ́n ti ə kɛi ku nąnni kpaan; diɛ mɛ̨nįɠaai tii lɛ di lonnii diɛ. 6 Nuąi pai lɛɛi di pulu, a lonŋaai di kaa pa gaai, di kaa pai di muhəɠə kɛa diɛ kpɛli diɛ yili lɛ di wɔ lonnii diɛ. 7 'Di wɔ kilitɔɔmąąlaa a kɛ Yálá ɓa, 'di hva lɛ̨ą Yálá kɛ mɛ̨nį kpɛa kpɛaɠaa diɛ; 'di nwɔ tiɓoɠaai kɛ. 8 Ə gɛ di hvo pa nəi kɛ yɛ di nąnni; a nu huwu mąąkwɛli laa walaai tii, a kulɔ nwoo mu nuą, a nu huwui gili mąąhvalin naa nɛ̨ɛ̨, a diɛi di hvo kɛi di kilitɔɔ Yálá ɓa. 9 Da kɛi Ɛfraimə lonnii kaa, diɛi a gilɛn bili nuą wəlɛɛi, diɛ tɛɛ a gilɛ a kɔ́ yələ, 10 di hvo kɛ kanąn ni Yálá nwɔ mįnɛ̨i ɓa, di nwɔ tɔ́n nwooi pili. 11 Daa kɛ lɛ̨ą gɛ mɛ̨nį kpɛa kpɛaɠaa diɛ, da gbalo mɛ̨nįɠaai ə nɛ diɛ. 12 Ə kpalo mɛ̨nį kɛnɛ̨ kɛ di nąnni ɲɛ̨i ɓa, Eziptə lɔi hu, Tanisə yɛɛ kɔwɔ hu. 13 Ə gboloyá ɓɛlaɓo ɉu hveelɛ, di tɛɛ ɉu; ə ɲáɠaa tɔɔ yɛ pɛlɛ́ nwąną. 14 Ə kɛi di tənən dɔɔ hvóló ŋą a tulɔ kpinįn, ɛlɛɛ, kpinį a pɛlɛ kɛ, yɛ ɓo a nwɔ̨n nən. 15 Ə kwɛni kpuwuluɠaa ɓɛla nɔi pun ɉu, yɛ yá tɔɔ di la, yɛ yá kpɛa-kpɛaa kəlee nwun gulɔi. 16 Ə tɛɛyáɠaa kulɔ kwɛni kpuwulu hu, ɲáɠaa diɛ laa yɛ yálee. 17 Kɛlaa, di kɛi lɔ nɛ̨ŋɛ̨n ɉəɠə mą; diɛ tɔɔ Hɛn Gəlee Nąmu la nɔi pun ɉu. 18 Di gili, diɛ gɛ, diɛ Yálá woo kwɛli, diɛ kɔ̨nɔ̨n ɉu hvɛli mą, diɛ mįi a di liiɓa pələ. 19 Di hvaa tee Yálá ɓa, diɛ kɛ diɛ: «Yálá yee a mɔ̨ɔ̨ lɔ, yɛ kɔ̨nɔ̨n ɉee ku lííla lɔi pun ɉu? 20 Yili ɓə gɛ, yɛ gwɛni kpuwulu kɛlɛ, yá yɛ kulɔ ɉu yɛ laa a gboloon gɛnɛ̨.» Diɛ kɛ diɛ: «A pɛli nwɔ̨nɔ̨ mɔ̨ɔ̨ lɛɠɛ tɛɛi nwɔ nuąi pɔ, ə bɛlɛ huwɔ ɓa?» 21 Yili mɛ̨n Yai-Laa ə mo, ə níiholi kɛnɛ̨, nwɔ̨n ə ɓɛla Ɉakɔbə mɛ̨i, nwɔ liiholi ə muhəɠə Israɛlə pɔ. 22 Mąąhɔlɔɓo, di hvo kɛ di kilitɔɔ li Yálá ɓa, di hvo kɛi gaa diɛ kɛ a pɛli di ɓaloi a tɛ̨ą. 23 Ə mo tulɔ kpinįnŋaa diɛ yələi, ə yələkɔlɔn naa ɓo. 24 Ə manə kulɔ yələi yɛ bu a di kɔ̨nɔ̨n, ə kɔ̨nɔ̨n dɛɛ di pɔ, yɛ kulɔ yələi pələ. 25 Di kəlee di huwalawala kɔ̨nɔ̨n mįi; ə kɔ̨nɔ̨n dɛɛ di pɔ diɛ pilɛ ɉu. 26 Ə hvóló kulɔi pələ hvaną lɛɛ yələi ə mąą kwɛa diɛ, ə pa a ɉɛɠɛɛ pələ hvaŋą di pɔ a nwɔ huwalawalalaa. 27 Ə huwɔ pu di mɛ̨i lɔ poto poto, yɛ muluun, da nwɛ̨ni kpulu hu kɛnɛ̨, yɛ gboloyá kwɛlɛ ɲɛ̨ą kɔ́w. 28 Di kɛi pɛlɛ di yəi gwəli hɛ̨ąiɠaa, di yíi pɛlɛ́ɠaa kwɛlɛ nąą kəlee. 29 Di kɔ̨nɔ̨n mįi di pilɛ ɉu; mɛ̨nįi kɛ a di liiɓa, ə yili tɛɛ di pɔ. 30 Kɛlaa mɛ̨nįi kpɔ nwɛli ə kɛ diɛ, gəlee hvo ni kɛ di yəi; di laa hvɛɛi lɔ ni kɛ. 31 Yálá nwɔ liiholi yɛ wolo diɛ, ə di wɔ kalanɉonŋaa paa di lɔwai; ə Israɛlə nu nwunuɠaa ɓəleen, ə di pu nɔi ɓa. 32 Bələi mąn ə kɛ la tii, di yee ə kɛ lɔ nɛ̨ŋɛ̨n ɉu, di hvo kɛi di kilitɔɔ nwɔ kpalo mɛ̨nįɠaa diɛ. 33 Ə di wɔ hvólóɠaai lɛɛ a kpɛli, yɛ hvaŋą, diɛ di wɔ kwɛlanŋaa kɛ ɲɔw kɛnɛ̨ hu. 34 Yálá a kɛi di paa ti, di kɛi gwɛli, diɛ di hɔn mąąpənə, diɛ tinɛ̨n bɔ pələ. 35 Diɛ di kiliŋąhiɛ diɛ vilɛn mą, diɛ gɔlɔn diɛ kɛ Yálá kaa a di mąąkɔ̨nwɔ̨ kwɛni; diɛ kɛ yələkɔlɔn ɉu Yálá ɓə a di mąąkpɛ. 36 Kɛlaa, di kɛi mowo a di laaləi, di nɛ̨n yɛ lɛɛ kɛ mą. 37 Di kili hvo kɛ tɔɔ li mą a neelee, di hvo kɛi di kilitɔɔ mįnɛ̨i da diɛni di ɉəɠə mą. 38 Kɛlaa yaa ti nwɛi, a líinɛ̨ɛ̨ gwəi Yálá, hvo kɛi di hɔn ɉee gwəi, hvo di hukala, yaamun, ə kɛi di kɛ nɛ̨ŋɛ̨nŋaa hu pu; ɛlɛɛ, yɛ nwɔ liiholi huhon gbɔ kɛlɛ kɛlɛ di mąą mɛ̨nį ɓa, níilaai lɔ kɛ di pɔ, 39 gili ə ɓo ɉu yɛ kɛ, di kaa lɔ a nu kanŋaa, a pɔ́lɔ, a hvaŋąi lɔ a tɛɛ ə li, ə kɛ a niɛ kəlee. 40 Di kɛi di kwɛli tee mą nɔi pun ɉu! Kpɔ gee mɛ̨i tamąą, Diɛ níikələn gwəi nɔi pun gələn ŋąą ti hu, kpɔ kɛlɛ-kɛlɛ. 41 Di pənə nwɔ̨nɔ̨ di Yálá woo kwɛli, diɛ Israɛlə nwɔ Mąąhəɠəmun líikələn tii la gwəi. 42 Mɛ̨nįɠaai aa kɛ gɛ a nwɔ huwalawalalaa, yili kili hvo kɛi lɛɛ di ɲa, ə mą kɛ a ɲələi ə di nwun mąąɓo la di yowoɠaa yəi. 43 Ə mą nwɔ̨nɔ̨ kɛ nwɔ kpalo mɛ̨nįɠaai ə gɛ Eziptə lɔi hu, da kwəi pili mąą mɛ̨nįɠaai ə naa Tanisə yɛɛ kɔwɔ hu nuą diɛ. 44 Ə di wɔ yáɠaai mąąpənə a ɲąmą, ɲá kpɛa kpɛa da bɛlɛɛ pɛlɛɛɠaa, əgɛ di hvo pa nəi di kpələ yá hɔlɔɓo. 45 Ə Vɔnŋaa ɲąątɔɔ diɛ, diɛ di ɲąmą kpələ, Ə gbəŋəɠaa ɲąątɔɔ diɛ, diɛ ɲɛnɛ̨ɛ̨ kɛ laa wala di yəi. 46 Ə di wɔ mɔ̨nun lɛɛ a peeləɠaai kɔ̨nɔ̨n, góloɠaa di gɛ, ə lɛɛ a ɉaiɠaa gɔ̨nɔ̨n. 47 Ə di wɔ hihɛnŋaai hukala a hanwon dulɔ, ə di wɔ ɓá wuluɠaai lɛɛ a ɓa wɛli. 48 Ə di wɔ taatɛlɛɛɠaai hukala a hanwon gbuwulu kpɛa kpɛa, yələgbąnąą ə daatɛlɛɛ kpuluɠaa ɲąąyíi. 49 Ə nwɔ liiholi kələn ŋąąi ɲąątɔɔ diɛ. Ə malakaɠaa ɲąątɔɔ diɛ, yiliɠaai diɛ di mɔ̨nɔ̨ ɓo. 50 Hvo ɲee pulu lɛɛ nwɔ liiholii kulaa hu, hvo hɛn da lɛɛ a vúlu; ə di wɔ yɛnɛ̨ɛ̨ lɛɛ lɔi kala ɲɔ̨nŋaa yəi. 51 Ə Eziptə lon dɔlɔɔɠaa kəlee kɛlɛ, ə di laŋą lonnii tɔlɔɔɠaa paa, Kamə nwɔ pɛlɛ́ɠaai mu. 52 Ə nwɔ nuąi kulɔ laa, yɛ li a diɛ yɛ taatɛlɛɛ kpulu, ə li a diɛ nɔi pun ɉu, yɛ ɓɛlaa haaɠaa. 53 Ə kɛi li a diɛ a nɛlɛɛ, di hvo kɛi ɲɔw, gboloyá ə hiɛ la di yowoɠaa mɛ̨i. 54 Ə li a diɛ nwɔ lɔi mąąhəɠɛɛi hu, ɲeei tii nwuɔ̨, yai ə ɉɔlɔɓo a kɔ́, a nwɔ yee wala-walalaa kɛnɛ̨ɛ̨. 55 Ə nuą kpɛ di tɔwɔ, ə di wɔ lɔi ɲąąkwɛlɛ diɛ, nɔi ə lɛɛ a di kwɛlin; ə Israɛlə nu huwu hee di wɔ pɛlɛ́ɠaai mu. 56 Kɛlaa, di hvaa tee yələkɔlɔn ɉu Yálá ɓa, diɛ nwoo kwɛli, di hvo gɛ di hvo nwɔ tɔnŋaai mąąwiɛ. 57 Di di pulu tinɛ̨n, di di pulu tɔɔ Yálá ɓa, yɛ di nąnni; di yali di pulu, yɛ kilɛn ɲɛli a tee. 58 Diɛ níikələn gwəi a di wɔ hali kɔ́iɠaai, di wɔ hali kɔ́iɠaa da ɉali mąąnįnįnŋaa diɛ níikələn gwəi. 59 Yálá ə bələ mɛ̨n yili ə níiholi, ə lənə Israɛlə ɓa kpɔ a ɉu kwɛa. 60 Mąąwiɛ pɛlɛ́i kɛ Silo, ə kulɔ mu, a bɛlɛ́i tii ə dɔɔ nu kanŋaa lɔwai. 61 Ə nwɔ huwalawala kwɛlɛ luwɔlaa ɓa, ə nwɔ mąąwiɛlaa too ɲowoɠaa kɔwɔ mu. 62 Ə nwɔ nu huwui lɛɛ a kɔ́ kɔ́ ɓɔwa kɔ̨nɔ̨n, ə níiholi kpɔ kɛnɛ̨ nwɔ nuąi pɔ. 63 Nwɔ̨n ə ɉilɛlɛa kələn, nɛ̨ɛ̨lɛa di wɛi, di hvo hilɛtai wələ too di mɛ̨i. 64 Ɉaláá laahəli nuą di haa a ɓɔwa kwɛa laa pɔɔ, galaninŋaa di hvo pɛli nuą haa wɔlɔ ɓoi. 65 Ną́mu ə muhəɠə yɛ nu a kɛi háá yíi, yɛ kɔ́kuláái lɔɔ yee aa pɛli mą. 66 Ə ɲowoɠaa kɛlɛ di hɛ̨ą, ə nwumɛ̨ tɛ a diɛ, yii di hva pɛli lɛ̨ąi mą. 67 Ə Ɉosɛfə nwɔ pɛ́lɛ́i pili, hvo tí hvo Ɛfraimə nwɔ pɛ́lɛ́i həɠə. 68 Ɉuda nwɔ nu huwui ɓə ə ɉəɠə ɉu a níiɓa, a Siɔn yeei nwɛli kaa mai. 69 Ə mąąwiɛ pɛlɛ́ tɔɔ laa, ɲee nwuɔ̨, nwun naŋįn ŋąą hɛn gəlee mɛ̨i; ə dɔɔ nąą a yələ kəlee mɛ̨nį, kpɔlɔ yɛ bələi lɔi laai la. 70 Ə nwɔ tímun Davidə həɠə ɉu a níiɓamun, ə ɉəɠə taatɛlɛɛ kumun ɉu; 71 ə kɛ taatɛlɛɛɠaa pulu, yɛ dəli, əgɛ a nwɔ nu huwui Ɉakɔbə, da ɉɔlɔɓo lɔi Israɛlə di ɲąąkɔnmun. 72 A taatɛlɛɛ mɛ̨i kaamun mąąkulɔi hvo mą, ya ka ti; ə kili kpaalə lɛ diɛ a yɛlɛ. |