Mąątɛ̨nɛ̨ 77 - Yálá laawoo hɛɓɛ (dc)Mąąwɛlimun gaa gilitɔɔi Yálá kɛ mɛ̨nįɠaa ɓa 1 Nwələ ɲɛ̨itɔwɔmun Yeditun. Asafə nwɔ hvɛ́li woo. 2 Yálá ɓə gáá dəlii, gɛ́ tómą, Yálá ɓə gáá dəlii, yɛ nwəli tɔɔ nwóó ɓa. 3 Ɓɛlɔwai mą́ą́ a wɛli lai, Ną́mu Yálá ɓə ŋą́ ɲɛ̨ilaa kwɛli. Gɛ́ ɲéé hąŋąn bɔ pələ, kwiihɛ̨ą, ɛlɛɛ, vįi hva kpɛɛ, gɛ́ lənə gbɛla ɓo woo kəlee ɓa. 4 Ŋą́ kɛi gíliŋąhiɛ, ŋą́ vilɛn Yálá ɓa, gɛ́ nwóó laa, ɛlɛɛ ŋą́ kɛi gíliŋąhiɛ mą, ɉú lɔ ɓə a pu mą́ą́. 5 Yáá ɲɛ̨́i kɔ́lɔnŋaa hon, hvó gɛi ɲɛ̨́i hvo pɛlɛ mą, gwə́i pilɛɛi mą́ą́, mɛ̨nįi kpɔ ŋį́ mo, və́ gaai. 6 Gɛ́ gíliŋąhiɛ, tɔwɔ-tɔwɔ yələɠaa hu, gɛ́ gíliŋąhiɛ gwɛlanŋaai wɔlɔ daa tɛɛ diɛ. 7 Kwiihąą, ŋą́ kɛ gíliŋąhiɛ nwɔ́ wələɠaa diɛ, níi a holi, gɛ́ mɛ̨nį tamąą mąąni kɛ kɛ gbɔ́wɔ ɓa, gɛ́ kɛ mą: 8 A kɛ tii Yai-Laa kaa mɔ̨ɔ̨ pai lənəi nwɔ nu huwui ɓa li? Hvo kɛa pai di ɲɛ̨imąąwɛli kaai? 9 Nwɔ ɲɛ̨imąąwɛlikaa laa a mɔ̨ɔ̨ kpɛɛ? Nwoo aa wɔlɔ kpɛɛ ɓə tii kɛai? 10 Yálá aa mɔ̨ɔ̨ lɛ̨ą mɛ̨inɛ̨ɛ̨ kɛɛ ɓa li? Liiholi aa mɔ̨ɔ̨ gɛ, aa gwəi laa kpulu ɓə tii? 11 Gɛ́ diɛ, nąą ɓə nwɔ́ mɔ̨nɔ̨i ə həɠə laa. Hééɓo Gəlee Nąmu aa ɲee mąąhvalin. 12 Ŋą́ Yai-Laa kɛ mɛ̨nįɠaa hukulɔ, a tɛ̨ą ə́ wɔ kpalo mɛ̨nįɠaai kili aa too ŋą́. 13 Mɛ̨nįɠaai kpɔ wɔlɔ yáá gɛ, gáá gíliŋąhiɛi gəlee ɓa, gɛ́ pənə gɛ ə́ kɛ mɛ̨nįɠaa ɲɛ̨i kaa. 14 Yálá, ə́ wɔ pələi kaa lɔ a mɛ̨nį mąąhəɠɛɛ, yálá ləi kpɔ ɓə gɛnɛ̨ yɛ Yálá? 15 Yɛ́ ɓə a kpalo mɛ̨nįɠaa kɛ Yálá, Ə́ ə́ wɔ huwala walalaai lɛ nuą diɛ. 16 Ə́ ə́ wɔ nuąi nwun mąąɓo a ə́ yee nwɔ huwalawalalaa, diɛi a Ɉakɔbə da Ɉosɛfə di lonnii. 17 Yálá, yáɠaa di ə́ kaa, ə́ kaai yáɠaa di mo, di nɛ̨n kpulu-kpulu, ɲąmuątaa mąą yɛ kpɛlin. 18 Tulɔ kpinįnŋaa di tulɔ pu, tulɔ yɛ duwɔ, ə́ wɔ mɛ̨ɛ̨kɔwɠaai diɛ kulɔ pələ kəlee. 19 Ɓɛlɔwai ə́ wɔ yələ gbąnąąi ə kɛi pola la, Mąną-mąnąɠaa diɛ lɔi mɛ̨i pɔ̨nɔ̨, lɔi ə tumo, ə kpɛlin. 20 Ə́ ə́ kpaalə laa gboloyá ŋą, yɛ́ tɛɛ yá kpon ɉu kwɛaɠaa hu, nui lɔpee ta hvo ə́ pɔɔ kaa. 21 Ə́ ə́ wɔ nuąi tənən dɔɔ yɛ taatɛlɛɛ kpulu, Moisə da Aarɔn di yee hu. |