Mąątɛ̨nɛ̨ 76 - Yálá laawoo hɛɓɛ (dc)

Yálá hɛɠɛɛɓo woo

¹ Nwələ ɲɛ̨itɔwɔmun. Gwɛnin nwələ. Asafə nwɔ hvɛ́li woo.

² Yálá aa gbɔwɔ lɛ Ɉuda nwɔ lɔi hu. Naa kɛnɛ̨i Israɛlə lɔi hu.

³ Ə nwɔ pɛlɛ́i hvilɛn Salɛmə, ɛlɛɛ Siɔn ɓə ɉee pɛlɛ́ kaa laa.

⁴ Nąą ɓə, ə kilɛn da tɔ́nwąɠaa di hu yali-yali laa, da hə́mə́, da kɔ́ kɔ́ hɛnŋąą kəlee.

⁵ Ə́ wɔ kɔ́ honŋaai mɛ̨i tɛ pələ ɓa, yɛ yee, a Ə́ mąąɲįnɛ̨n gɛ kpɔ yɛ́ kɛnɛ̨, yɛ kɛ mąi-mąi

⁶ Gɔ́kuláá kpəɠiɛɠaai tii, di lɛɛ yíi, diɛ di mąąkpoloon, a ɉu wala wala nuąi tii, di yeekɔ̨nwɔ̨n ɉu aa haa.

⁷ Ɉakɔbə nwɔ Yálái, tómąi ə́ mo, gɔ́ kɔ́ wotolo mąn, ɉoo mąn, di kanąn, di tɔɔi.

⁸ Yá ɲɔw pili nu kɔ́lɔi, ɲələi ə́ lii a holi la, gbɛɛ ɓə a pɛli tɔɔi ə́ líila?

⁹ Yá lɛɛ yələ kɔ́lɔn ɉu, ə́ giti tee, lɔi ə ɲɔw, ə tɔɔ kpɔ kpɛ-kpɛ.

¹⁰ A ɓɛlɔwai Yálá a muhəɠə la, giti mɛ̨nį ɓa, yɛ nɔi lonnii mąąwɛliɛ kəlee ɓalo.

¹¹ Ə mą kɛ nu kanŋaa di wɔ líiholi, kaa a ə́ ɲɛ̨i pono hɛn, ɛlɛɛ, yiɠaai da kulɔ niiholii tii yəi, yá di kąnąn ɲɛ́.

¹² Ka mɛ̨nįɠaa laakwɛlanmo, Yai-Laa ka wɔ Yálái ɓa, ka di pɔ mɛ̨nį kɛ; 'ka pa a ka wɔ hąmą pilɛɠaai Yálá mąąɲɔwuɔ pɔ, kaai kpɔ ti a gwɛlɛ nuąi.

¹³ Mąąhɔlɔɓo, aa lɔi ɲąąwooɓo nuą hvinatɔn, yɛ di ɲąą yíi.