Mąątɛ̨nɛ̨ 74 - Yálá laawoo hɛɓɛ (dc)Kɛɛ kalaa pulu woolaa 1 Asafə nwɔ nu mąąkwɛli woo. 1 Asafə nwɔ nu mąąkwɛli woo. Yálá! Ə́ ku pili kpɔ ti kwɛaa la lə mɛ̨nį ɓa, lə liiholi ɓə ə́ ɉee ə́ wɔ lɔi hu taatɛlɛɛ kpului ɓa? 2 Nu kpului ə́ ɉɔlɔɓo a ə́ wɔɔ a yɛnɛ̨ɛ̨ gɔwɔ tɔɔ yələ, ə́ kili lɛɛ ɉu; a nu huwui tii ə́ kɛ diɛ ə́ kwɛlin ni, a Siɔn yeei tii ə́ gɛ a ə́ hee taai. 3 Daa kpoloonŋaa ŋɛ̨i lii vɛ-vɛ, 'pa, ə́ ə́ ɲɛ̨i pili di mɛ̨i; ə́ yowo aa bɛlɛ́ mąąhəɠɛɛ mu hɛn gəlee kala. 4 Ə́ yowoɠaa di kɛi tomą a di woo kɛnɛ̨, ɓɛi kpɔlɔ tii ə́ kɛi pa yɛ́ ku kaa laa. Di di pɔɔ lɛɛ laa a di wɔ hali mąąnįnįnŋaai. 5 Di kɛi yowa pili, yɛ da kɛ wɛla hu. 6 Ɓɛlɔwai di kɛi gbɔnŋaa yali la a yowa da madalan. 7 Daa ə́ hvɛli pɛlɛ́ kɛ a nwɔ̨n gɔ̨nɔ̨n, diɛ ə́ laa mąąwiɛ pɛlɛ́ pu, diɛ mɛlɛkpɛɛ mą. 8 Di kəlee di woo ə laa mą, gɛɛnąąɠaai da ə́ mąąwiɛ laa, diɛ nąą gəlee kələn nɔi kwəi. 9 Ku hvo kɛa ku kɔ́lɔn ɉɛnŋąą kaai, Yálá kwəi mɛ̨nį hu kulɔ mun da hvo kɛa laa, ə lɛɛ, ku ta hvo mɛ̨nįi ŋɛ̨i kpɛɛ yələ kɔ́lɔn. 10 Ee kə Yálá, ə́ yowo kaa pai lɛɛi ə́ ɓɛlɛ tooi, ə lɛɛ ɉu mįnɛ̨ lɔwai ə həli? Ə́ yowo kaa pai lɛɛi naa pui ə́ laa hu ə lɛɛ ɉu lə yələ ə həli? 11 Lə ɓə kɛ yai ə́ ə́ yee yali bulu, yɛ́ ə́ ɓa-mįi-yee laa lɔ tii kpɛ ə́ kəŋə mɛ̨i? 12 Ya pa ə həɠə wɔlɔ wɔlɔ ɓa, Yálá, yɛ́ lɔ ɓə a nwɔ́ tɔɔmun, yɛ́ kɔ́ɠaa nɛ̨ɛ̨ nɔi ŋɛ̨i ɓa. 13 Ə́ gboloyá hu hon a ə́ hvaŋą, yɛ́ ɉu huwɔ mąąɲɔwuɔɠaa huwolo ɲa ŋą. 14 Yɛ́ ɓə gbatoogbono nwungalən ɉəɠə ɲą, yɛ́ dɛɛ lɔwɔ yilɛɠaa pɔ a di kɔ̨nɔ̨n. 15 Yɛ́ ɓə ya nwun gulɔiɠaa da tɛɛyaɠaa laa ɓo, yɛ́ ya kpɛa kpɛaɠaa hu kpala. 16 Hvóló da kpinį di kaa ə́ yee kɔ́nma, yɛ́ ɓə hvóló da kɛɛpono di tɔɔi lɛ diɛ. 17 Yɛ́ ɓə lɔi ɲɛ̨n gəlee laa, yɛ́ ɓə hąmąlɔɔ da hvóló laateɛ di kulɔ. 18 Yai-Laa, mąąnɛ̨ɛ̨ ə́ kili ə pu ɉu yɛ́ diɛ, ə́ yowo kaa ə́ ɓɛlɛ too woo ɓoi; nwun gbɛɛ ɉu nu huwu aa ɓɛlɛkpɛɛ ə́ laa ɓa. 19 'Hvó ə́ wɔ tonwələn tɛɛ lɔwɔi huwɔ pɔ, 'hvó ə́ kili kulɔ ə́ wɔ nuąi di wɔ mɔ̨nɔ̨i hu, di wɔ yɛnɛ̨ɛ̨ hu a yələ kəlee. 20 Ə́ kiliŋąhiɛ ə́ wɔ mįnɛ̨i ɓa, nuą puɔi lɔ di kee mɛ̨i, di loo pələ hvo mą nɔi, nąą aa lɛɛ a wɛa nuą di wɔ lɔi. 21 Nui daa mɔ̨nɔ̨ laa mɛ̨i, 'hvó hvaa mą di hvo kɛa mɛlɛkpɛɛ mą; ə gɛ yeehowolo mun da mąąwɛli mun diɛ pɛli ə́ tɛnɛ̨i. 22 Yálá! 'Ə́ muhəɠə, ə́ kpɔwɔ mɛ̨nį mąąkɔ̨nwɔ̨, ə́ kiliŋąhiɛ mowo nuąi ŋɛ̨i di wɔ lalan da kɛ bilii mą. 23 'Hvó lɛ̨ą ə́ yowoɠaa huluun woo ɓa, da nuąi kɔ́ pɛlɛi yɛ́ di tomą woo, yai ɉu lɔ ɓə kɛnɛ̨i yɛ li la. |