Mąątɛ̨nɛ̨ 72 - Yálá laawoo hɛɓɛ (dc)Tɔɔmun nwɔ lúwɔ́ hu hvɛli woo 1 Salomɔn woo ka. 1 Salomɔn woo ka. Yálá, ə́ wɔ kiti tee hvilii tɛɛ tɔɔmun bɔ, ə́ wɔ tələnmolaa tɛɛ dɔɔmun non ŋɛ̨i pɔ. 2 Yɛ pɛli ə́ wɔ lɔi lonnii ɲąąwooɓoi la a tələnmolaa, ə mą kɛ mąąwɛli nuą, tɛ̨ą pələ mɛ̨i. 3 Tələnmolaa haalai, yee kpɛa kpɛaa da yee kpu kpuɠaa, di pa a nwunnąnɛ̨ɛ̨, nɔi lonnii pɔ. 4 Nɔi lonnii yiiɠaai kɔ́lɔn və diɛ, di mąą tɛ̨ą ɓo, ə kɛ a yeehowolo nuą ɓalomun; yɛ toomɛ̨i kɛ nuą huwolo. 5 Di ɲɔw yɛ́, yii kpɔ hvóló kaa ni hɔɔi, ɲąnin yɛ ni hvələ; ə lɛɛ kpɔ ɉu kwɛlan gəlee kpɛɛ hvo mą. 6 Ə yɛɛ yɛ tulɔi a pu muluun gbala hu mɔ̨nun mɛ̨i, yɛ tulɔi a lɔi yɔwɔ, ə gɔlɔ haa mą. 7 Nwɔ tɔɔlaa lɔwai, Tələnmolon ə kɛ ɲąąnɛ̨ɛ̨ hu, yii kpɔ ɲąnin gaa ni hvələi, nwun na nɛ̨ɛ̨ ə kɛ nɔi! 8 Nwɔ tɔɔlaai a həɠə gboloyá ɓa, ə həli la dakpɛli ɓa; ə həɠə ɲá kɛnɛ̨ ɓa, ə həli lɔi kpɛlai. 9 Gbali lɔi hu nuą kaa pai kɛi kwɛli hvilɛn ɉii mą, ɲowoɠaa diɛ muluun gɔ̨mɔ̨. 10 Tarsisə lɔi da gboloyá hąąi lɔi hu tɔɔɓɛlaa, di kaa pai kɛi ɉamą pilɛɠaa tɛɛi; Saba da Seba tɔɔɓɛlaa diɛ nįįhɔ̨nwɔ̨ kulɔ mą. 11 Tɔɔɓɛlaa kəlee kaa pai kwɛli hvilɛn ɉii mą, lɔiɠaa kəlee diɛ tí mą. 12 Yili kəlee ə mą kɛ tii, yeehowolo mun pai dəlii, gaa pai yili kulɔi mɛ̨nįi; ə mą kɛ nuąi kɔ́lɔn və diɛ, ɛlɛɛ, nu hvə diɛ. 13 Yeehowolo mun da nui hvaŋą hvo ɲəi, di mąąwɛli kaa pai tooi mą, yɛ yeehowolo nuą di wɔ yɛnɛ̨ɛ̨ mąąkɔ̨nwɔ̨. 14 Gaa pai di mąąkɔ̨nwɔ̨i wɛa nuą da heemɛ̨i kɛ nuą di yəi, yɛ di wɔ yɛnɛ̨ɛ̨ mąą mɛ̨nį nwąną kpɔ a neelee. 15 Tɔɔmun ɲii ə kwɛa! Di kaa pai Saba hɛni tɛɛi bɔ; diɛ Yálá hvɛli mą a hvaŋąlɔ, diɛ túwɔ lúwɔ kɛi mą. 16 Nɔi ə lɛlɛ, tíi ə kɛ nąą kəlee gbɛlai hvo kɛ mą, mɔ̨nun gbala yɛ yee tɛ yɛ dumon, yɛ Liban yee; nu kan ɲąą ə nɛ̨ɛ̨ daa kwəi, yɛ kala tiliin. 17 Laa kɛnɛ̨ ə kɛ mą kpɛɛ hva kɛ mą, naa ə həli ɓɛi hvoló a hɔɔ laai; nuą diɛ lúwɔ kɛ di keeni diɛ naa hu, lɔi kəlee yɛ nwun na nɛ̨ɛ̨ mɛ̨nį ɓo. 18 Mąąwiɛ ə kɛ Yai-Laa Israɛlə nwɔ Yálái ɓa; yaa tɔ̨nɔ̨ lɔ ɓə a kpalo mɛ̨nį kɛ. 19 Lúwɔ́ ə kɛ naa mąąwiai ɓa a yələ kəlee; lɔi kəlee laa ə hvɛɛ a nwɔ mąąwiɛ, kɛi a mo tii Yálá ə kɛ! Mįiną! 20 Ɓɛ ɓə Ɉɛse lon Davidə nwɔ Yálá hvɛli wooɠaai di kpɛla laa. 20 Ɓɛ ɓə Ɉɛse lon Davidə nwɔ Yálá hvɛli wooɠaai di kpɛla laa. |