Mąątɛ̨nɛ̨ 71 - Yálá laawoo hɛɓɛ (dc)Nu pɔlɔ pɔlɔ nwɔ hvɛli woo 1 Yai-Laa, ŋą́ą́ ə́ kɛ a mą́ą́kilɛi, 1 Yai-Laa, ŋą́ą́ ə́ kɛ a mą́ą́kilɛi, nwunɛ̨ hvo kɛa ɲɛ̨́i paa a yələi lɔpee ta. 2 Ə́ kaa pai volóon na ɓoi, yɛ́ nɛ́ɛ́ gbɔwɔ yeekɔn ma; mąąhɔlɔɓo, ə tələnmoɔi, 'ə́ wəli mąą laŋąn nwóó ɓa, 'málo. 3 'Kɛ́ a mą́ą́kilɛi kwɛni, a ɓɛi ŋą́ nóó laa a yələ kəlee; Ə́ naa ə́ kwəi yɛ́ ə́ kaa máloi, mą́ą́kɔ̨nwɔ̨ kwɛni ɓaa a yɛ́, da mą́ą́kpɛ hįi. 4 Nwɔ́ Yálá! 'Gúlɔ ɲówo yəi, 'gúlɔ nu paa nuą da wɛa nuą yəi mu. 5 Yɛ́ ɓə gílitɔɔ yɛ́, Yai-Laa Nąmu Yálá, ə həɠə múhəɠə yələ ɓa, yɛ́ ɓə ya nwéli pulu lɛɛ a naɠiɛ. 6 Ə həɠə gáá yələ ɓa, yɛ́ lɔ ɓə ŋą gílitɔɔ yɛ́, ŋį́ lɛɛ néé kwəi, ə́ ɉəɠə ɉu a dee; yɛ́ lɔ ɓə ə́ mąątɛ̨nɛ̨ woo kaa ná. 7 Ŋą́ kɛ nu tamąą ɲɛ̨i ɓa a kwəi pilimąą hɛn, yaan, yɛ́ ɓə kɛ a mą́ą́kilɛi leelee. 8 Ə́ mąątɛ̨nɛ̨ woo lɔ ɓə ná, gɛ́ túwɔ ə́ mąąwiɛ mɛ̨ni noloɓoi a yələ kəlee. 9 Ɓɛlɔwai ŋɛ̨i ŋą́ą́ pɔlɔ la, 'hvó lənə mą́ą́; ɓɛlɔwai váŋą́ kaa kpɛɛi la, 'hvó ə́ kili kulɔ ɉú. 10 Mąąhɔlɔɓo, ɲówoɠaa kaa dɔąɓoi, nuąi kɛi mą́ą́hɛn, daa kili mą́ą́. 11 Diɛ kɛ diɛ: «Yálá aa gili kulɔ ɉu, 'ka ɉon, nu hvo mą hvo mąąkɔ̨nwɔ̨!» 12 Yálá, 'hvó ə́ mąąkwɛa mą́ą́, nwɔ́ Yálá! 'Pa kilɛ mą́ą́. 13 Nuąi kɔ́ pɛlɛi nwɔ́ yɛnɛ̨ɛ̨ ɓa, di nwun na ə pili a nwumɛ̨; nuąi di kaa bɔ mą́ą́ ə wɛli, ɓáá ə kulɔ diɛ, ɲɛ̨ipaa ə lɛɛ a di wɔɔ. 14 Nwɛ́i, ɲɛ̨́i kaa lɔ bələi, vį́i hva kpɛɛ; váŋąlɔɔi lɔ ə́ mąątɛ̨nɛ̨ wələɠaa too mɛ̨nį ɓa. 15 Bələi ə́ tələnmoɔ la, bələi ə́ ku ɓalo la, ŋą túwɔ́ ɉukulɔi; vá pɛli gəlee kɔ́lɔn ɉii. 16 Ną́mu Yálá, váŋą a kulɔ ə́ nwɔ kpakololaa hu, Tələnmolaai a həɠə yɛ́ tɔ̨nɔ̨ ə́ pɔ, ŋą́ gilitoo ɲą́ a yələ kəlee. 17 Yálá, yɛ́ ɓə gíli too yɛ́, ə həɠə kpɔ ɉúlɔnon ɲələ ɓa, aa lɛɛ ɉu yiihu aa həli la, ə́ kɛ mɛ̨nį ɲɛ̨i kɛnɛ̨ɠaa lɔ ɓə gáá noloɓoi. 18 Bələi mąn ŋą́ą́ pɔlɔ la nwún aa powa, Yálá, 'hvó ə́ kili kulɔ ɉú hvó nɛ́ɛ́ gbɔ́wɔ yee kɔ́nma; 'gɛ, gɛ́ pɛli ə́ wɔ huwalawala kɛ mɛ̨nįɠaa hukulɔi nuąi yɛnɛ̨ɛ̨ yiihu diɛ, da nuąi pai lɛɛi di pulu, ŋį́ ə́ wɔ kpakololaa lɛ diɛ. 19 Ə́ wɔ tələnmolaa kɛnɛ̨ pələ hvo a yola, nwɔ́ Yálá! Yɛ́i ya mɛ̨nį ɲɛ̨ikɛnɛ̨ɠaa kɛ! Yálá, gbɛɛ kpɔɔ ɓə ka yaa ka pɛliɛ tii-yoo? 20 A Yɛ́i, yáá ku ɲɛ̨ikɔw kpɔlu a mɔ̨nɔ̨ da kwəi pili mąą, ə́ kaa pai nwɔ̨nɔ̨ pənəi, ə́ hvaŋą nįnɛ̨ pu kuɔ; ə́ kaa nwɔ̨nɔ̨ pai gúlɔi ɲąmuątaa yəi lɔi mu. 21 Ə́ kaa nwɔ̨nɔ̨ pai nwɔ́ mąąɲįnɛ̨n ta pɛlɛi mą, yɛ́ nwɔ̨nɔ̨ pənə yɛ́ níilaa. 22 Mąą yələi tii, gáá pai ɲéé pui nwɔ́ bɛlɛgwəi gwɛnįn ɲą, gɛ́ ə́ laa tɛ, nwɔ́ Yálá, yɛ́ ká ə́ wɔ wɛlikɛmąąlaai; gɛ́ nwɔ́ gwɛnįn yɔw ə́ mąą mɛ̨nį ɓa, yɛ́i a Israɛlə nwɔ Yálá mąąhəɠɛɛi. 23 Gáá pai kɛi hvɛ́li kɛi yɛ́, gɛ́ wələ too a kwəinɛ̨ɛ̨; mąąhɔlɔɓo, yáá nwún mąąɓo. 24 Ə́ mąątɛnɛ̨ woo hva tee ná a yələ lɔpee ta, mąąhɔlɔɓoi, nuąi kɛ bɔ ɲąąnwąnąą ə laa mą́ą́, di wɛi a lɛɛ a nwumɛ̨ da ɓáá kulɔ mąą. |