Mąątɛ̨nɛ̨ 70 - Yálá laawoo hɛɓɛ (dc)1 Davidə nwɔ wələ ɲɛ̨itɔwɔ mun, a Yálá mąą mɛ̨nį kili too pələ nu ŋą. 2 Ee kə Yálá! 'Pa kilɛ mą́ą́! Yai-Laa, 'málo ɉa! 3 Nuąi báá pələ kwɛlii, nwumɛ̨ ə di ɲɛ̨i paa; nuąi di kaa bɔ mą́ą́ ə wɛli, də li a di pulu pələ, a ɓɛlɛkpɛɛmąą kɛnɛ̨. 4 Nuąi da kɛ yɛlɛ kulɔ ɉu kɛi, di pənə də li a nwumɛ̨ kɛnɛ̨. 5 Nuąi ə́ kwɛlii, di wɛi ə lɛɛ a mąną kaa, da kwəinɛ̨ɛ̨, ə́ mąą mɛ̨nį ɓa; nuąi ə́ wɔ ɓalo mɛ̨nįi wɛli kaa diɛ, di kɛ lɔ Yálá mąątɛ̨nɛ̨ mɛ̨nį hu a yələ kəlee. 6 Mąąwɛliɛi, hɛn da hvo ɲə́i, Yálá, 'pa kilɛ mą́ą́; yɛ́ ɓə yá kpɔnmąą tɛɛ bɔ́, yɛ́ málo, Yai-Laa! 'Pa ɉa ɉa. |