Mąątɛ̨nɛ̨ 7 - Yálá laawoo hɛɓɛ (dc)

Davidə kaa ɉɛatɔɔi

¹ Davidə kaa nwoolaai. Ə Yai-Laa hvɛli, a ɲələi Kusə, a Bɛnɉamɛn mun, ə hvilɛn na bulu a kɔ́.

² Yai-Laa, nwɔ́ Yálá, yɛ́ ɓə ŋą́ mą́ą́kilɛ ə́ hvaŋąn mu, nuąi kpɔ di hvilɛnŋąą búlu a kɔ́, 'málo, 'gulɔ di yəi!

³ Di hvo pa nəi ɉú hvala-hvala, yɛ yalaɠaa, ɛlɛɛ, nu ta hva hɔlɔɓo hvo nwún mąąɓo, yɛ gúlɔ di yəi.

⁴ Yai-Laa, nwɔ́ Yálá, a kɛ kpɔ ŋį́ túwɔ a ɲɔ̨nwɔ̨ɔ̨, a kɛ kpɔ ŋį́ ɲə́ə́ lɔ hvulu mɛ̨nį hu,

⁵ A kɛ kpɔ, ŋį́ mɛ̨inɛ̨ɛ̨ pɔɔ kulɔ a mɛ̨nį ɲɔ̨nwɔ̨ɔ̨, a kɛ kpɔ ŋį́ mɛ̨nį ɲɔ̨n-gɛmun nɛɛ laa, yɛ nwɔ li ɓo;

⁶ Ɲówo ə hvilɛn búlu, ə ɉón, ə nwɔ́ yɛnɛ̨ɛ̨ kiin nɔi ɓa, ə gbóyɛli kəlee pu pɔlɔ hu!

⁷ Yai-Laa, 'Ə́ muhəɠə, a líiholi, 'tɔɔ mɔ̨nɔ̨ɓo nuą di wɔ wɛa mɛ̨nįɠaa tɔwɔ; 'lɛɛ a ə́ ɲɛ̨i, yɛ́i yá kiti tee a ɉaŋąąi.

⁸ Lɔiɠaa daa di ɲąą kpɔn, ə́ kwɛlɛ, ɛlɛɛ yɛ́n, lɛɛ yələi, ə́ di ɲąąwooɓo.

⁹ Yai-Laa ɓə a lɔiɠaa kiti tee, Yai-Laa, gíti tee yɛ bələi də́lənmoɔi la, yɛ bələi gwə́i kwəlɛɛ la.

¹⁰ Nu ɲɔ̨nwɔ̨ɔ̨ɠaa di wɔ kiliŋąhiɛ ɲɔ̨nwɔ̨ɔ̨ ə kpɛla mą, tələnmolon vaŋąlɔ; mąąhɔlɔɓo, yɛ́ ɓə yá nu kwəi kiliɠaa, da nu koo kpala mɛ̨nįɠaa hu kaa, yɛ́i a Yálá tələnmoɔ.

¹¹ Mą́ą́kpɛ gbala kaa Yálá kwɛlɛ, yai gaa a kwəi kwələ nuą ɓalomun.

¹² Yálá kaa a kiti teemun dələnmoɔ, hva níiholi ɉa.

¹³ Kɛlaa, nui hvo bɔ hvo ɉɔn mąąhvalin, a ɲɛ̨i nwɛ̨ɛ̨ bɔ a yələ kəlee. Ɲowo ə mą nwɔ ɓɔwa kwɛaai ɲą́ą́li, ə mą nwɔ kilɛn ɲąątɛ yɛ ɉąŋą bɔ pələ,

¹⁴ gbɔwɔ kpinįi mąą mɛ̨nį ka tii gaa nu paa hɛnŋaai tii pɛlii la, yɛ nwɔ tonwąɠaai tí.

¹⁵ 'Hvó gaai, gaa mɛ̨nį ɲɔ̨n mąą kili teei gwəi, yɛ ɲɛ̨nį mąą koo həɠə, a naayɛɛ, a yee lɛɛ ɉu.

¹⁶ Nui a lɔwa tee yɛ gbon ɉu kwɛa, mąą nu kaa pai tooi gbɔwɔ lɔwai tii hu.

¹⁷ Nwɔ ɲɛ̨nį mɛ̨nį, a pənə ə lɛɛ nwuɔ̨, nwɔ wɛa mɛ̨nįi tii ə pənə ə yɛɛ a nwun.

¹⁸ Nwɛ́i ŋą́ Yai-Laa hɛɠɛɛɓo, mąąhɔlɔɓo, dələnmoɔi; gɛ́ Yai-Laa Hɛn Gəlee Mɛ̨imun laa too a wələ.