Mąątɛ̨nɛ̨ 69 - Yálá laawoo hɛɓɛ (dc)Mąąwɛli hvɛli woo mɔ̨nɔ̨ kɛ̨nɛ̨ hu 1 Nwələ ɲɛ̨itɔwɔmun. Yágbudɛn mɛ̨i. Davidə nwɔ wələ woo. 2 Yálá, nwún mąą kɔ̨nwɔ̨, ɲá aa ɉón gwą́ną kpɔwɔlɔn ma. 3 Gáá yɛɛi palaya kpon ɉu kwɛaa hu, gúlɔ-ɉumun dakpɛli hvo laa. Gáá yɛɛi pali kpon gwɛaa hu, ɛlɛɛ, ɲá ɠiliin yɛ li a ɲą́ą́. 4 Ŋą́ą́ tomą vį́i aa kpɛɛ, gwą́ną́ ɲąą aa nwąną. Ɲɛ̨́ilon ɉu aa haa, a lamui ŋą́ą́ mo nwɔ́ Yálá mąąkpɔn ɉii. 5 Nuąi yowolaa kulɔi a ɲą́ą́ nwun və mą, di tamąąi di tɛɛ nwún nɛɠa ɓa. Nwɛa nuąi tii ɓaɠaɓoi mą́ą́ kpɛli-kpɛli nwun və mą, a nu hu kala nuąi tii, di hvąŋą kɛnɛ̨i. Hɛn və́ ɉəɠə li, ŋą́ pɛli dɛɛ pələ kɛi ləi? 6 Yálá, ə́ nwɔ́ kili kpɛɛ gwəilaa kɔ́lɔn, nwɔ́ túwɔ́ pələ ɲɔ̨nŋąą di hvo loo li yɛ́. 7 Nąmu Yai-Laa Mɛ̨nį Kəlee ŋą Hééɓomun, nuąi da di kilitɔɔ yɛ́, 'gɛ́ nwumɛ̨ hvo tɛ diɛ, mą́ą́ mɛ̨nį hu, ɛlɛɛ, nuąi da ə́ kwɛli, 'gɛ́ ɓáá hvo kulɔ diɛ, Israɛlə nwɔ Yálá. 8 Ə́ mąą mɛ̨nį ɓə ŋą́ nííkpələ la lalan mu, ɲɛ̨́i mąą yɛ luwu, diɛ ɓáá kulɔ mą́ą́. 9 Ɛlɛɛ, ŋą́ą́ kɛ la ną́n nonnii lɔwai a nwɛ̨ą, a nui nee lonnii di hvo gɔlɔn. 10 A tɛ̨ą, ə́ wɔ pɛlɛ́i mąą tolo aa lɔ ɉú kɛnɛ̨, di kaa ə́ lalan ɉi, di wɔ lalan nwoo yɛ həli mą́ą́. 11 Ŋą́ wɔlɔ, ŋą́ hin nɔ, ɛlɛɛ, diɛ nálan, yili mąą mɛ̨nį ɓa. 12 Ŋį́ ɓíi haɠa too gwą́ną́, yɛ haa a too nu ɓa, ɛlɛɛ, ŋą́ą́ kɛ a di wɔ laapuɉu hɛn, yili mąą mɛ̨nį ɓa. 13 Nuąi heeni ɉįi la, di kɛi náá pələ ɓo, gɛ́ ɓo lɔ a lɔɔ kpələ nuą laa wələ woo. 14 Yai-Laa, mɛ̨nįi gáá vɛlii yɛ́, ya ka: Háákələi ə kɛ a ə́ ɲɛ̨i lɛlɛɛ hee yələ mą́ą́! Yálá, yɛ́i ə́ wɔ ɲɛ̨imąąwɛli kaa laa kɛnɛ̨i, 'nwóó mu hon, mąąhɔlɔɓo, yɛ́ lɔ ɓə ya nu ɓalo a neelee! 15 'Gúlɔ gánąn balayai ŋɛ̨i hu, ə́ gɛ və́ pa kąnąn, 'kpɔnmą́ą́, ŋį́ kulɔ nuąi yowolaa kulɔi a ɲą́ą́, di yəi, ə mą kɛ ɲáhvɛɛɠaa! 16 'Gɛ, ɲánwąną hvo yɛɛ a ɲą́ą́, və́ yɛɛ bali kpon ɉu, ɛlɛɛ, ɲánwąną hvo pa nwún mɛ̨i pu! 17 'Nwóó mu hon, Yai-Laa, mąąhɔlɔɓo, ə́ wɔ wɛlikɛmąąlaa ɲąąnɛ̨ɛ̨i, ə́ wɔ ɲɛ̨imąąwɛli kaa haalai, 'ə́ ɲɛ̨i tinɛ̨n, ə́ ɉee bɔ́ pələ. 18 'Hvó kɛa ə́ ɲɛ̨i lɛlɛɛ loo ə́ wɔ tímun ma, mɔ̨nɔ̨ aa gwə́i pili mą́ą́, nwóó mu hon ɉa-ɉa. 19 'Lɛɠɛ mą́ą́! 'Mą́ą́ kɔ̨nwɔ̨! Ɲówóɠaa kaa búlú, 'vólóon naɓo! 20 Ə́ kili kaa ɉu Yɛ́, da kɛ nálán ɉii, mɛ́lɛ́ aa kpɛɛ mą́ą́, ɲɛ̨́i mąą aa luwu, a nwumɛ̨, ɲówóɠaa kəlee kaa ə́ ɲɛ̨i ɓa. 21 Lalan aa níí yali gwə́, yili kaa mą́ą́ a ɲɔ̨n gbɔ kpɔɔ, ɲɛ̨́i ə kɛ níí laamun dɔwɔ, ya ka və́ gaa li, ə mą kɛ gbɛlaɓonuą, və́ da hɔlɔɓo li. 22 Daa pilimąą pu gɔ̨́nɔ̨n ɉu, kpələ wɛli a kɛ mą́ą́, lɔɔ kpɔną ɓə da dɔɔ ná. 23 Di kpɔ kpɔɔ kɔ̨nɔ̨n 'ə kɛ di tɔwɔ, a hɛlɛn, ə kɛ di ɓɛlaa ɲɛ̨i tɔwɔ a ɓaalə. 24 Di ɲɛ̨i ə kpinį diɛ, di hvo kɛa pɛli kɛɛ kaai, di hvąŋą kulɔ di yəi, a yələ kəlee mɛ̨nį! 25 Ə́ wɔ liiholii ɓɛla di mɛ̨i, ə́ wɔ liiholii nwɔ̨n ə yɛɛ di mɛ̨i! 26 Di wɔ pɛlɛ́ɠaai di lɛɛ a gboloon, nu ta hvo kɛa yíi di wɔ pɛlɛ́ɠaai mu. 27 Mąąhɔlɔɓo, nui ə́ gɛlɛ, di hvilɛn bulu a kɔ́, nuąi yá di hutɔɔ, da kɛ mɔ̨nɔ̨ ta pɛlɛi mą di yəi. 28 Di kɛ mɛ̨nį ɲɔ̨nŋaa pu gee mɛ̨i, di wɔɔ nąą hvo kɛa kɛ ə́ wɔ tələnmolaai hu. 29 Di laa ə waa yɛnɛ̨ɛ̨ hva kpɛɛ hɛɓɛ́ hu, di laa hvo kɛa too tələnmo nuą laa pɔ. 30 Nwɛ́i, daa mɛ́lɛ kpɛɛ mą́ą́, daa níí yali gwə́i, Yálá, ə́ wɔ ɓalo mɛ̨nįi kaa pai gúlɔi di yee mu. 31 Nąąlɔwai, gáá pai Yálá laa mąąwiɛi a wələ woo; gɛ́ naa tɛ, gɛ́ ɉɛɠɛɛɓo. 32 Yili wɛli kaa Yai-Laa ɓa ə tɛɛ niŋɛ̨ hilɛ ɓa, ə tɛɛ tɔ̨nɔ̨ niŋɛ̨ hilɛ ɓa. 33 Kpɔwɔ mąą yɛɛ nuą da yili nąą kaa, da di kwəinɛ̨ɛ̨, Kaai Yálá kwɛlii, ka yíi ə kwɛa. 34 Mąąhɔlɔɓo, Yai-Laa a nwəli tɔɔ mąąwɛli nuą woo ɓa, hva lənə nwɔ nuąi diɛ, ɓɛlɔwai da di hon na kɔ́ hu. 35 Yələkɔlɔn, ka lɔi ka naa mąąwiɛ, gboloyáɠaa da di hu hɛnŋąą 'ka naa tɛ. 36 Mąąhɔlɔɓo Yálá kaa pai Siɔn nwun mąąɓoi, yɛ Ɉuda nwɔ taa kpɛa kpɛai tɔɔ. Nuą kaa pai heei laa, nąą ə ɓo a di wɔɔ. 37 Nwɔ tí nu huwui kaa pai nąą hɔlɔɓoi a di kwɛlin; nuąi naa wɛli kaa diɛ, di kaa pai nąą kɛi a di hee lɔi. |