Mąątɛ̨nɛ̨ 68 - Yálá laawoo hɛɓɛ (dc)

Israɛlə nwɔ Yálá mąątɛ̨nɛ̨ wələ yai a kɔ́ kuláá kpəɠiɛ

¹ Nwələ ɲɛ̨itɔwɔmun Davidə nwɔ hvɛ́li woo, da nwɔ wələ.

² Yálá a muhəɠə, ɲowoɠaa da taɠa, nuąi kɛi tɔɔ na, diɛ pu dɔwɔ.

³ Bələi lɔ nwɔ̨n nulu a lɔ la sɔɛɛ, bələ lɔ ɓə yá di lɔ la sɔɛɛ, bələi lɔ kwɛ̨igban a həɠəən na, nwɔ̨n ɉu, bələ lɔ ɓə, nuąi di hva kulɔ di woo ɓa, di nwun na a pili la ɲɛ̨itɔwɔ.

⁴ Kɛlaa, tələnmonuą kaa kwəinɛ̨ɛ̨ hu, diɛ kwəinɛ̨ɛ̨ kulɔ Yálá líila, diɛ mąną a ɓə́lə́n.

⁵ 'Ka wələ too Yálá ɓa, 'ka naa tɛ a wələ woo nɛ̨ɛ̨! Nui tii tɛɛi nɔiɠaa hu, hoo mɛ̨i, 'ka naa tɛ. Naa ɓaa a Yai-Laa! 'Ka pili yələi níila, a kwəinɛ̨ɛ̨!

⁶ Təlilɛa di Nąn ni, kalanįnŋaa di wɔ tɛ̨ą ɓomun ni, Yálá li! Bələ ɓə gaa la, nwɔ pɛlɛ́ mąąhəɠɛɛi mu.

⁷ Nuąi nu hvo diɛ, a di kɛ a pɛlɛ́ nąmįną, a luwɔɠaa kulɔ luwɔlaa hu, nuąi da di kwɛlitee mą, a di heei kulɔ gbɔwɔlɔ-kwɛni lɔi hu.

⁸ Yálá! Ɓɛlɔwai ə́ kulɔ la, ə́ ɓo ə́ wɔ nuąi ɲɛ̨itɔwɔ, ka diɛni kaa hiɛ nɔi pun ɉu,

⁹ lɔi ə kpɛlin, yələ kɔ́lɔn gbɛlimąn, ə həɠeen Yálá ɲɛ̨itɔwɔ, yai Sinai yee nwuɔ̨, Yálá ɲɛ̨itɔwɔ, a Israɛlə nwɔ Yálái.

¹⁰ Yálá ə kɛi tulɔ ɉógbó-ɉogbo pu, nuąi kɛ daa kpɔlɔɔn, yɛ́ di nįilɔ.

¹¹ Ə́ wɔ lɔi ti di di heei hɔlɔɓo ɉu, Yɛ́ Yálá, Yɛ́ ɓə nąą kɛ tii mąąwɛli nuą mąą mɛ̨ni ɓa, ə́ wɔ liinɛ̨ɛ̨ gwəi haalai.

¹² Ną́mu! Ə nwɔ tínuąi tí, nwɔ wɛlɛɛɓo nuąi kaa a kɔlaɠa hu kɛnɛ̨.

¹³ Tɔɔɓɛlaa diɛ tɛɛ a gilɛ, kɔlaɠaɠaa diɛ di pu, di yəi bɛlɛ́n ɉɛngɔwɠaai ə́ di hon kɔ́ hu, Yɛ́ di ɲąąkwɛlɛ.

¹⁴ Ə́ kaa pai lɛɛi laani gɔ́ɓuwu la? Ɓɛi tonwənən goonŋaa mąą puɔi laa a wali, nɛɠa ə ɓo a hɛni ɲɛ̨i paa.

¹⁵ Ɓɛlɔwai Huwalawala Kəlee Nąmu ə tɔɔɓɛlaa hu taɠa la, gɛɛnąąi tii ɓa, nąnąąn ə kɛli pu ɲee mąą kpinįɛ nwuɔ̨.

¹⁶ Yálá nwɔ yeei, Basan yee! Yee tɔɔi, ɲee tɔɔ pumun kulaai Basan yee!

¹⁷ Yee nwun damąą ɲąɠaa, lə mɛ̨nį ɓa ka tɛɠɛɓo, Yálá nwɔ yeei hu, a ɲeei tii Yálá kaa bɔ ə hee mɛ̨i? A tɛ̨ą, Yai-Laa kaa pai heei laa, a yələ kəlee mɛ̨nį.

¹⁸ Yálá nwɔ hoo mɛ̨i kulááɠaai, di kaa a nu waa nwun damąą, di mąąɲɔwuɔ. Ną́mu kaa di lɔwai, Sinai yee nwuɔ̨, nwɔ pɛlɛ́ mąąhəɠɛɛi mu.

¹⁹ Ə́ tɛ ɲee nwuɔ̨, ə́ kɔluwɔɠaa hon, yáá ə́ wɔɔ hɔlɔɓo nu kanŋaa lɔwai, ə mą kɛ nwun ɉu walawala nuą, Yɛ́ ə́ hee pɛlɛ́ hɔlɔɓo, Yai-Laa, Ną́mu Yálá.

²⁰ Mąąwiɛ ə kɛ Ną́mu ɓa, a yələ kəlee da-nwɔɔ! Ɲalái tii ɓə a gɔ́ nɛ̨ɛ̨ guɔ.

²¹ Ɲalái tii ɓə a kɔ́ nɛ̨ɛ̨ kuɔ, Ɛlɛɛ, haa pɛlɛ́ laaɓo kwɛli kaa Yai-Laa gu wɔ Yálái yəi.

²² Kɛlaa, Yálá a ɲowoɠaa nwun ganin nwolo, a nuąi kpɔ tii, di yee kaa lɔ mɛ̨nį ɲɔ̨n ɉui, di nwun gbilɛɛɠaai tii, nu paa nwunŋaai tii, a di wolo.

²³ Nąmu yɛ diɛ: «Gáá həɠəi a nu taɠaa Basan, gɛ́ həɠə a daɠaa gboloyá kpon ɉeei.

²⁴ Yɛ́ ə́ kɔwɔ hiɛ di ɲąmą hu, ə́ wɔ yilɛɠaai diɛ di wɔɔ nąą hɔlɔɓo ə́ yowoɠaa hu.»

²⁵ Yálá, daa ə́ pulu kpɔn gaa, nwɔ́ Yálá, nwɔ́ tɔɔmun, daa ə́ pulu kpɔn gaa, ə́ wɔ pɛlɛ́ mąąhəɠɛɛ mu,.

²⁶ Nwələ too nuą di ɓo tɔwɔ, vɛ́likɛ nuą di ɓo nąą pulu, nɛ̨ɛ̨lɛa di ɓo di pɔ, diɛ kɛ́ɛ́ yɔw.

²⁷ 'Ka Yálá mąąwiɛ ɲąąkpɔnŋaa hu, 'ka Yai-Laa mąąwiɛ yai a Israɛlə nwun dɔɔi.

²⁸ Bɛnɉamɛn yai a di ɲąąkpɛɛ, gaa di ɲɛ̨itɔwɔ, yili pulu, Ɉuda tɔɔɓɛlaa, di wɔ həɠə mąąpuɔɠaa, a həɠə laa, Zabulɔn tɔɔɓɛlaa, da Nɛftali tɔɔɓɛlaa.

²⁹ Ə́ wɔ Yálái aa naa gwəi, yɛ ə́ kaa pai kɛi a hu walawalamun, 'Ə́ hvąŋą lɛ, Yálá! Yɛ́i Ə́ kɛ mɛ̨nį kɛi ku mąą mɛ̨nį hu.

³⁰ Tɔɔɓɛlaa daa pa, Ə́ wɔ tɔɔ pɛlɛ́i mąą pui, yai nwun nąŋąą Ɉerusalɛmə taa mɛ̨i.

³¹ 'Tómą veen ɉu huwɔi tii mɛ̨i, niŋɛ̨ hilɛ kpului tii mɛ̨i, da niŋɛ̨ lonnii tii, diɛi da kɛ kwɛli hvilɛn ɉii di liila, a di wɔ wali kwɛli. Aa wɛa nuą hu taɠa.

³² Di kaa həɠəi Eziptə lɔi hu, a həɠə ɓɛla ɲɛ̨i tɔɔɠaa, Nubi yɛ pa Yálá pɔ a gilɛ, ɲee laahvɛɛ a hɛngɔw.

³³ Yɛnɛ̨ɛ̨ tɔɔlaaɠaa, 'ka wələ too Yálá ɓa, 'ka hvɛ́li kɛ Nąmu ɓa.

³⁴ Gaa hoo mɛ̨i, ə ɓo la yələkɔlɔn mɛ̨i pələ ləɠə-ləɠə, yá ka tii nwoo kaa tɔɔi, nwoo kɛnɛ̨ɛ̨ tii.

³⁵ 'Ka Yálá hvaŋą kɛnɛ̨ pələ lɛ. Nwɔ Heeɓolaa kaa Israɛlə mɛ̨i, vąŋą ə ɓo tulɔ kpinįŋaa mɛ̨i.

³⁶ Yálá ə́ mąą ɲɔwuɔi ə́ nwɔ pɛlɛ́i mu, Israɛlə nwɔ Yálá li. Ya ɓə a hu walawala da hvaŋą tɛɛ nu huwui pɔ. Mąąwiɛ ə kɛ Yálá ɓa.