Mąątɛ̨nɛ̨ 66 - Yálá laawoo hɛɓɛ (dc)'Ka gu Yálá hɛɠɛɛɓo nwɔ mɛ̨inɛ̨ɛ̨ɠaa mąą mɛ̨nį ɓa 1 Nwələ ɲɛ̨itɔwɔmun hvɛ́li wələ woo. 1 Nwələ ɲɛ̨itɔwɔmun hvɛ́li wələ woo. 'Ka ka yee lɔwaa Yálá ɓa, yɛnɛ̨ɛ̨ bili-pili gee mɛ̨i. 2 'Ka wələ too, 'ka naa mąąwiɛ, 'ka mąąwiɛ a mąątɛ̨nɛ̨ wələ. 3 'Ka kɛ Yálá ɓa: «Ə́ kɛ mɛ̨nįɠaa ɲɛ̨i mąą ɲɔwuɔi! Ə́ hvąŋą kɛnɛ̨ pələ, ə́ yowóɠaa daa di kpɔwɔ kɛ, a ə́ mąątɛ̨nɛ̨ nuą. 4 Lɔi kəlee yɛ kwɛli hvilɛn ə́ lííla, yɛ wələ too yɛ́, yɛ ə́ laa tɛ a wələ woo nɛ̨ɛ̨.» 5 'Ka pa, ká Yálá kɛ mɛ̨nįɠaa kaa, a ɲɔw pili nu huwuɠaa kɔ́lɔi a gɛ mɛ̨nįɠaa. 6 Ə gboloyá mąą pɛ̨nɛ̨ a lɔi kpalan, nuą diɛ yálee təən, a di kɔ́wɔ mąą kpalaa, yili ɓa, 'ká gu mąą hɛli pu. 7 Vąŋą kɛnɛ̨ pələ, Heeɓolaa kaa ɲəi a yələ kəlee mɛ̨nį, ɲɛ̨i ə ɓo lɔiɠaa diɛ, nuąi diɛ di tɔɔ nai, da too, di hvo di muhəɠə, kpɔ kɔlɔ-kɔlɔ. 8 Nu kanŋaa, 'ka gu gu wɔ Yálái hvaŋą tɛ, a naa tɛ wələ, mąątɛ̨nɛ̨ wələ woo 'ə tɛ kpɔ hɔ̨ɔ̨. 9 Yaa tii ɓə gu laa hɔnmoi yɛnɛ̨ɛ̨, hvo gu lɛɛ li laa, guɔ tɔɔ takpa takpa. 10 Yálá, ə́ ku hukɔɔn, ə́ ku huwaa, yɛ bələi da gɛ la a wali. 11 Yáá gɛ kwaa kɔ́ a ɓaalə, yáá ku yee tɛɛmąą tiɛ̨ laa ku nwuɔ̨. 12 Yáá hvaa mą diɛ ku hon, yɛ taatɛlɛɛɠaa. Kwaa lɔ nwɔ̨n ɉu, kwaa lɔ yái, Kɛlaa, ə́ ku kulɔ di yəi, Ə́ ku ɓɛlɛhee kɔ̨nɔ̨n gɛ. 13 Gáá lɔi ə́ yəi bɛlɛ́n, haláái da gəlee kələn, gɛ́ kulɔ yɛ́ laa, mɛ̨nįɠaai ŋą́ di laakwɛlanmo yɛ́, gɛ́ gəlee pɔ mɛ̨nį kɛ. 14 A mɛ̨nįɠaai tii tɛ ná, gɛ́ náá tee diɛ, a nwɔ́ mɔ̨nɔ̨ mįi yələ. 15 Gáá taatɛlɛɛ wulaaɠaa kulɔi yɛ́ a haláái da gəlee kələn, da ɓɛlaa hilɛɠaa kələn gun nɛ̨ɛ̨, gɛ́ niŋɛ̨ hilɛɠaa, da ɓolu hilɛɠaa pɛli. 16 'Ka pa, kaa kpɔ tii ka ɲɔw Yálá ɓai, 'ka pa, ka nwóó mɛ̨n, mɛ̨nįɠaai ə gɛ mą́ą́, ŋį́ di hukulɔ ka ɲɛ̨i ɓa. 17 Ɓɛlɔwai ŋą́ kɛi dəli laa, dɛ̨nɛ̨ woo ɓə kɛi nɛ̨́n dinɛ̨n ná. 18 Əli kɛ kiliŋąhiɛ ɲɔ̨nwɔ̨ɔ̨ ɓə kɛ gwə́i, Nąmu hvəli kɛ nwəli tɔɔ nwóó ɓa. 19 Kɛlaa, Yálá ə nwəli tɔɔ, ə nwəli tɔɔ kpɔ nwɔ́ hvɛli wooi ɓa a nɛlɛɛ. 20 Mąąwiɛ ə kɛ Yálá ɓa, hvo bulu tɔɔ li nwɔ́ hvɛli woo ɓa, ɛlɛɛ, nwɔ wɛlikɛmąąlaa hvo ɲįnąą kpulu li nóó tɔwɔ. |