Mąątɛ̨nɛ̨ 65 - Yálá laawoo hɛɓɛ (dc)

Yálá, Ə́ mąąnɛ̨ɛ̨i kpɔ di Ə́ tɛ̨nɛ̨

¹ Nwələ ɲɛ̨itɔwɔmun Davidə nwɔ wələ.

² Yálá, yɛ́i Siɔn daai, ə́ mąątɛ̨nɛ̨ woo a ə́ mąą hon, ɛlɛɛ, mɛ̨nįɠaai ku naakwɛlanmo yɛ́i, kwa di kɛ.

³ Yɛ́i yá ə́ wəli tɔɔ, ə́ hvɛli woo ɓa, nu kan gəlee da pa ə́ pɔ.

⁴ Ku hɔnŋaa kpɛa-kpɛai ku kpįnįle ɓa, Kɛlaa, ə́ wɛi, yá ku wɔ nɛ̨ŋɛ̨nŋaa mąąhvaa lɛɛ.

⁵ Nui yá dəli, a ə́ liiɓamun, nwun na nɛ̨ɛ̨i, gaa pai kɛi ə́ yəi bɛlɛ́n. Ku wɛi, ku kaa pai pilɛi, ə́ yəi bɛlɛ́n mɛ̨inɛ̨ɛ̨ɠaa hu, Yɛ́ pɛ́lɛ́i mu hɛnŋaa mąąhəɠɛɛɠaai hu.

⁶ Yá ku woo mu hon, a mɛ̨nį ɲɛ̨i kɛnɛ̨ kpɛa-kpɛaɠaa, Yɛ́i a ku ɓalo Yálá; Liilaa yɛnɛ̨ɛ̨ ɓə lɔi kɔ́lɔ kəlee, ə həli kpɔ la kwɛaala gboloyáɠaa diɛ.

⁷ Yá yeeɠaa hee kpɔ tin-tin, a ə́ hvąŋą, yɛ́ ə́ hɛ̨ą yili a huwalawalalaa.

⁸ Yɛ́ gboloyá tin gɛnɛ̨ kɔ́lɔ haa mą, ɲá a kɛi muhəɠə tii a din gɛnɛ̨, da nukanŋaa hvuluun nwoo.

⁹ Ə mą kɛ lɔi kpon ɉeei nuą ɓə, da di liipɔ kɛlɛ, ə́ kɛ mɛ̨nį kpɛa kpɛaa mąą mɛ̨nį ɓa, yá kwəinɛ̨ɛ̨ woo lɔ, hvóló həɠəi pələ, da hvóló tooi pələ lɔiɠaa la.

¹⁰ Yá ə́ ɲɛ̨i pili lɔi mɛ̨i, ə́ gɔ a tulɔ, ə́ bilɛ a hɛngɔw poto-poto. Yálá nwɔ tɛɛyái hvɛɛi lɔ a yələ kəlee, yɛ́ nu kanŋaa di wɔ mɔ̨nun tɔwɔ pɛli. Bələi yá lɔi pɛli la, bələ ka:

¹¹ Yá tulɔ pu kɛɛ hinŋąą ɓa, yɛ́ bɔlɔ kpɛ̨ŋɛ̨n, yɛ́ ɲɔwɔ kpɔ pɛ-pɛ a tulɔ yá, yɛ́ lúwɔ́ too mɔ̨nun diliin ma.

¹² Mɛ̨inɛ̨ɛ̨ɠaai ə́ gɛ gwɛlan ɲee mu, yá ə́ yee laa kulɔ mą, ɛlɛɛ, ɓɛi yá tɛɛ laa, mɛ̨inɛ̨ɛ̨ kpoloon a láá laa.

¹³ Lɔi pun ɉu-kpomóɠaa laa hvɛɛi a hɛngɔw, yeeɠaa kəlee diɛ di mąą yili, a kwəinɛ̨ɛ̨ kala tiliin.

¹⁴ Yee lɔwai lɔiɠaa diɛ di mąą yili a taatɛlɛɛ kpulu kɛnɛ̨, nɛ̨ŋɛ̨ hu lɔiɠaa di wɔ biliɉu ə ɓo a mɔ̨nun mɔ̨nŋąą, Gəlee kaa tomąi a wələ woo.