Mąątɛ̨nɛ̨ 64 - Yálá laawoo hɛɓɛ (dc)Mɛ̨nį ɲɔ̨n gɛ nuą hutɔɔ 1 Nwələ ɲɛ̨itɔwɔmun. Davidə nwɔ wələ. 2 Yálá, 'ə́ wəli tɔɔ nwɔ́lɔ́ woo ɓa! Yɛ́i nwɔ́ yɛ̨nɛ̨ɛ̨ mą́ą́ kɔ̨nwɔ̨, ɲówó mąą ɲɔwuɔ yəi. 3 Nóó ɲɛ̨nikɛ-nuąi da ɲabalɔ mą́ą́, diɛ, Mą́ą́ kwɛa mɛ̨nį ɲɔ̨n gɛ nuąi di nwun dɔɔi, diɛ. 4 Daa di nɛ̨n ɲąąli, yɛ ɓɔwa kwɛa, daa gilɛnŋaa yala ɉu, yai a di hvaa woo ɲɔ̨nwɔ̨ɔ̨ɠaai tii. 5 Diɛ kwəi kwələmun mon na dɛɠii. Da di wɔ tɔ́nwąɠaai pili nu tɛɠii, ɲɔw kpɛli hva kɛ di hu. 6 Di kaa gbąną wooɠaa pɛli, diɛ gbąnąlaa hɛlɛn dɛ diɛ noo, diɛ kɛ: «Gbɛɛ ɓə pai gbaɠala kaai?» 7 Da nu paa mɛ̨nį mąą nwun dɔɔ kɛ, di ɉu kpanwo, diɛ mą: «Gwaa gu wɔ mɛ̨nįi mąą ląŋąn gbɔ kpąą, nu ta hva pɛli lɔi nu kwəi!» 8 Kɛlaa, Yálá aa kilɛn bili diɛ, daa mɛ̨ikɔwɠaa kaa lɔ kɛa di tɛɠii, di kpɔwɔ mɛ̨nįi lɔ di gɛ, yaa lɔ li. 9 Di nɛ̨n aa pɛ̨nɛ̨ aa kɔ́ pɛlɛ diɛ, nui lɔpee a di kaa, a nwun gbɛ̨ŋɛ̨n. 10 Nu kəlee yɛ ɲɔw, mɛ̨nįi Yálá ə gɛ, diɛ ɉu kulɔ, ɛlɛɛ, yili mąą mɛ̨nįi tii, yɛ kili tɛɛ nuą pɔ. 11 Tələnmolon 'ə kwəinɛ̨ɛ̨ kulɔ kan, Yai-Laa laa hu! 'Ə gɛ a mąą kilɛi, kwəi kwələ nuą kəlee diɛ yili mąą kwəinɛ̨ɛ̨ kulɔ! |