Mąątɛ̨nɛ̨ 63 - Yálá laawoo hɛɓɛ (dc)'Ka gu Yálá mąą liihɛlɛn ɉee 1 Davidə nwɔ wələ. Ɓɛlɔwai ə kɛ la Ɉuda lɔi pun ɉu. 2 Yálá, nwɔ́ Yálá ɓaa a yɛ́, ŋą́ humon a ə́ mąą lii hɛlɛn ɉəɛ, ə́ mąą pulu yɛ ɉon, yɛ ɉúwɔ hu kpɛlin, yɛ lɔi hu kpalaai, yá hvo laa. 3 Ə́ kaai ŋį́ mo ə́ hee pɛlɛ́ mu, náá taɠaai lɔ kɛ poo, ɲɛ̨́i həɛ kɛ ə́ hvąŋą, da ə́ wɔ mąąwiɛ ɓa. 4 A tɛ̨ą, ə́ wɔ wɛlikɛmąąlaa hviɛla ɓoɔi yɛnɛ̨ɛ̨ ɓa, yili ɓə a gɛ, gɛ́ pa kɛi ə́ laa tɛi la a wələ. 5 Yili ɓa, ŋą́ ə́ laa tɛ́, nwɔ́ yɛnɛ̨ɛ̨ kəlee yee mu, gɛ́ ɲéé tɛ yələi, gɛ́ ə́ laa tɛ. 6 Yɛ ŋą́ pilɛ huwo wulɔ, da wulɔ di hu, kwəinɛ̨ɛ̨ wələ ə ɓo lɔ ná, gɛ́ ə́ mąątɛ̨nɛ̨ la. 7 Ŋą́ lɛɛ laani ɲə́i gbin ɉu, ŋą́ gílíɲąhiɛ yɛ́, ŋą́ kɛ lɔ ə́ hvɛliɛ ɓa. 8 Mąąhɔlɔɓo, yɛ́ ɓə yá mą́ą́kpɔnmąąɓo, ŋą kɛ ə́ koon nįnįn mu, ŋą tómą a kwəinɛ̨ɛ̨. 9 Ŋą kanąn yɛ́ a níi kəlee, Yɛ́n, yáá ə́ ɓa-mįi-yee too ɉú. 10 Kɛlaa, nuąi di hvilɛnŋąą nwɔ́ yɛnɛ̨ɛ̨ pului, da lii, di nwun na ə pili, di yɛɛ lɔi mu kpɔ kwɛaala! 11 Kɔ́ kɔ́ ɓowa ə tɛɛ di hu, 'di lɛɛ a lɔwɔ-yilɛɠaa kɔ̨nɔ̨n. 12 Tɔɔmun yɛ kɛa Yálá kɛ mɛ̨nį mąą kwəinɛ̨ɛ̨ kulɔ, nui lɔpee, a gwɛla a naa, a kɛ mą a nwun na nɛ̨ɛ̨, mąąhɔlɔɓo, di kaa pai lɛɛ kɛ nuą laa kpului. |