Mąątɛ̨nɛ̨ 62 - Yálá laawoo hɛɓɛ (dc)Yálá yaa tanɔ̨n gbən lɔ ɓə a gu kilitɔɔi 1 Nwələ ɲɛ̨itɔwɔmun, Yedutun Davidə nwɔ Yálá mąątɛ̨nɛ̨ wələ. 2 A tɛ̨ą, ŋą kɛ Yálá lííla, ŋą kɛ liilaa hu, yaa lɔ ɓə a málomun. 3 A tɛ̨ą, yaa lɔ ɓə a málo kwɛni, Mą́ą́kpɛ táá wala wala, mą́ą́ hva pɛli kpɛlin ɉi. 4 Ka káá pai lɛɛi kpuluun ɉi, ka kəlee, nu tɔ̨nɔ̨ paa mɛ̨nį ɓa, ə lɛɛ ɉu mįnɛ̨ lɔwai ə həli la? Yɛ pɛlɛ́ nwąnąi aa hviən, da kɛi bu, a wala kɛ tii, yɛ kumún yɛ ə pui? 5 Mąąhɔlɔɓo, di kwəi kiliɠaa kaa lɔ a nu ɓowo mɛ̨nį, di liiɓa ɓaa diɛ lɛɛ kɛ, da lúwɔ́ too a di laaləi, diɛ nɛ̨ŋɛ̨naa kɛ, di kwəi pələ. 6 A tɛ̨ą, níi wolo, hee kpɔ a ə́ wəli pulu layiɛ, Yálá kwɛlɛ tai, ya ɓə gílitɔɔ mą. 7 Yaa tanɔ̨n gbən lɔ ɓə a málo kwɛni, a mą́ą́kpɛ taa wala wala, di hva pɛli ɉə́ɠəi dɔɔi. 8 Málo mɛ̨nį, da ɲɛ̨́i pɔ̨nɔ̨ mɛ̨nį, gəlee kaa Yálá yəi. Yálá ɓə a mą́ą́kɔ̨nwɔ̨ kwɛni walawala, a mą́ą́kilɛi. 9 'Ka ka kilitɔɔ mą, a yələ kəlee, kaai a nɔi lonnii! 'Ka ka kwəi mɛ̨nį kəlee hukulɔ mą. Yálá kaa gu yəi, a gu mąąkilɛi! 10 A tɛ̨ą, nɔi lonnii kaa kpɔlɔ yɛ nu nɔ̨ɔ̨n ɉii tanɔ̨n, nu kpɛa-kpɛa kaa kpɔlɔ a lɛɛ. Da di kɔ́ɔn, hvąŋą a kɛ a nwiaa dɛɛ diɛ. 11 'Ka hvo ka kili lɛɛ nwąnąlɔ ɓa, 'ka hvo kɛ lɔ gilɛ ŋą, toomɛ̨i kɛ mɛ̨nį ɓa. Hɛn ə mą kɛ̨nɛ̨ ka yəi, 'ka hvo ka kili lɛɛ mą. 12 Yálá ə hvaa lɔ tanɔ̨n, ŋą́ mɛ̨nį hveelɛ ɓə ŋį́ mɛ̨n, doloo ɓaa a: Yálá pɔɔ ɓaa a huwalawalalaa, 13 ɛlɛɛ, Yɛ́, Nąmu, kulɔ nwooɓa laa kaa ə́ yəi, veelɛnąn maa, yá nu kəlee hvɛla kulɔ yɛ bələi ə túwɔ́ la. |