Mąątɛ̨nɛ̨ 60 - Yálá laawoo hɛɓɛ (dc)Yálá ə nwɔ nuąi woo pulu pənə, gɔ́ kalaa diɛ pulu 1 Nwələ ɲɛ̨itɔwɔmun. Yagbudɛn mɛ̨i wələ. Davidə nwɔ nu mąąkwɛli wələ woo. 2 Ɓɛlɔwai Aramə nuąi kɛ Mesopotami, da Sova nuą, da diɛni di kɛi kɔ́ kɔ́ la. Ɛlɛɛ, ɓɛlɔwai Ɉoabə ə pɛ̨nɛ̨ la, ə Edɔmə hon a kɔ́, di kɛi kɛ nąą laa ɓa kpolo yɛɛ kɔwɔ hu. 3 Yálá, yáá ku pili, yáá ku hu taɠa-taɠa, Ə́ líiholiɛ kɛ! 'Pənə ə́ ku pu ku nįnɛ̨ kɔ́lɔi. 4 Yáá lɔi hiɠi-hiɠiɓo, yáá gulɔ gee la, Nwɔ́ palaɠaai laa kpulu, gáá tɔɔi takpa-takpa. 5 Yáá naa ə́ wɔ nuąi diɛ, a ɲąąnwąnąą-e, yáá ku nwun ɉu tinɛ̨n nɔɔ tɔɔ ku la. 6 Yáá ɉilɛyilí tɛɛ nuąi da ɲɔw yɛ́ di pɔ, əgɛ di tɔɔ tɛ̨ą mɛ̨i kpąą, di yowoɠaa di wɔ mɛ̨ɛ̨kɔw tɔwɔ. 7 'Hvaa ku woo mu, ə́ wɔ yee wala-walalaa ə ku ɓalo, ə́ wɛlikɛmąą nuą di kulɔ mɛ̨nįi. 8 Yálá aa hvaa nwɔ pɛlɛ́ mąąhəɠɛɛi mu: Gáá pilii yələi a kwəinɛ̨ɛ̨, gɛ́ Sisɛmə lɔi ɲąąkwɛlɛ, gɛ́ Sukotə yɛɛkɔwɔ ɓɛla a hələ. 9 Galaadə aa lɛɛ a nwɔ́ɔ́, Manase aa lɛɛ a nwɔ́ɔ́, Ɛfraimə aa lɛɛ a nwuɔ̨ ɓɔlɔ, Ɉuda kaa a nwɔ́ tɔɔhvili. 10 Moabə kaa a nwáá-hɛnɲąŋą, gɛ́ nwɔ́ kɔ́lɔi pili Edɔmə mɛ̨i, ɛlɛɛ yɛ́, Filisti lɔi, yá pɛli mɔ̨ɔ̨ tómąi, yɛ ə́ yee aa tɛɛ mą́ą́? 11 Gbɛɛ ɓə pai lii a ɲą́ą́, daai mąątinɛ̨nŋąą a hį́i bɔ pələ? Gbɛɛ ɓə pai lii a ɲą́ą́, yɛ hə́li a ɲą́ą́ kpɔ Edɔmə? 12 Ə kulɔ ə́ pulu, Yálá, yɛ́i ŋɛ̨i yáá ku pilii, yɛ́i hvo kɛa bɔ, hvo li a ku wɔ kɔlaɠaɠaai kɔ́ ɓa. 13 'Ku mąąkpɔmąąɓo, daa hee ku mɛ̨i, mąąhɔlɔɓo, nu ŋą nu mąąkɔ̨nwɔ̨ɔ̨ kaa lɔ a kpɛli kpɛli. 14 Kɛlaa, kwa Yálá ni kwa tɔɔ, ku kaa pai kuláálaa kɛi, yaa kpįnįle ɓə pai ku yowoɠaa kiin-giin ɉi. |