Mąątɛ̨nɛ̨ 59 - Yálá laawoo hɛɓɛ (dc)Davidə kaa Yálá hvɛlii, yɛ Yálá ə naahɔnmo, ə gulɔ ɲowoɠaa yəi 1 Nwələ ɲɛ̨itɔwɔmun: «'Hvó ɉu kala.» Davidə ɓə nwələi ŋɛ̨i too, ə kɛi doo kwəi pələ. 1 Nwələ ɲɛ̨itɔwɔmun: «'Hvó ɉu kala.» Davidə ɓə nwələi ŋɛ̨i too, ə kɛi doo kwəi pələ. Ɓɛlɔwai Saulə ə nuą tɔɔ la, diɛ li Davidə nwɔ pɛ́lɛ́i mąąhɛn ɉi, baa mɛ̨nį ɓa. 2 Yálá, 'gúlɔ ɲówoɠaa yəi, nuąi woloi mą́ą́, mą́ą́kɔ̨nwɔ̨ di yəi. 3 'Gúlɔ mɛ̨nį ɲɔ̨n gɛ nuą yəi, 'málo, nuąi di hva ɲɔw ɲąmą pui, di yəi. 4 Hvo di kaai, daa hɛlɛn dɛ dɔ́wɔ́, huwalawala nuą diɛ wolo mą́ą́, ya pa, və́ mɛ̨nį ɲɔ̨n gɛli, və́ ɉɔ́n gɛ li. Və́ nɛ̨ŋɛ̨n ɉəɠə li Yai-Laa ɓa! 5 Və́ ɉɔ́n gɛ li; ə mą kɛ tii, di kaa gilɛ həɠəi, diɛ di hee dɔ́wɔ́. 'Ə́ ɲįnąąɓo! 'Pá ə́ náá kwiɛn, Ee, ɓɛ kaa li! 6 Yɛ́, Yai-Laa Mɛ̨nį Kəlee ŋą Hééɓomun Yálá, Israɛlə nwɔ Yálá! 'Ə́ ɲįnąąɓo, 'ə́ nɔiɠaai ŋɛ̨i kəlee hutɔɔ, ɲabalɔ nuą, a nu kpɛli kpɛliɠaai ŋɛ̨i, 'hvo di mąąwɛli kaa. 7 Yələ wilii pɔ, da kɛi pai, diɛ hvaa nwɔ̨ɔ̨, yɛ yilɛlɛa, diɛ lia tɛɛ daa pɔ. 8 Di kaa li, di laa hvili aa tɔɔ, di laa ɓa, ɓɔwa kwɛaaɠaa di ɓo di la: «Gbɛɛ ɓə di pɔ, yɛ mɛ̨nį mɛ̨n?» 9 Kɛlaa ə́ wɛi, Yai-Laa, ə́ kaa yɛ́lɛ́i diɛ, ə́ kaa yɛlɛ kulɔi nɔiɠaai tii kəlee hu. 10 Yɛ́ lɔ ɓə ɲɛ̨́i kaa yɛ́, yɛ́i a nwɔ́ huwalawala, a tɛ̨ą mą́ą́kɔ̨nwɔ̨ taa ɓaa a Yálá. 11 Tələnmo Yálá ka tii pai náákwiɛn ɉi, A Yálái a gɛ gɛ́ gɔ́n gbɛlaan a mą́ą́hɛnŋį nuą. 12 'Hvó di paa! Nwɔ́ nuąi di hvo nəi pa lɛ̨ą. Ə́ hvaŋą ə di hiɠi-hiɠi ɓo lɔ, ə di nwun mąą yɛɛ, Yai-Laa, yɛ́i a mą́ą́ kpɛ kpanąn. 13 Di ɓowoo ta hvo laa, yii nɛ̨ŋɛ̨n hvo kulɔ li ɉu, di nwun ə lɛɛ kan di wɔ kpɔwɔ ɲąą kɛnɛ̨ mɛ̨nįi tii hu; nɛ̨ŋɛ̨nnaa woo, da nɛɛ wooɠaai a kulɔ di la, di mąą mɛ̨nį ɓa. 14 'Ə́ wɔ líiholii ə ɲee laa kulɔ! 'Ə ɲee laa kulɔ, da lɔpee hvo kulɔ ɉu, əgɛ di kili ə pu ɉu, diɛ Yálá ɓə a Heeɓomun Ɉakɔbə mɛ̨i, ə lɛɛ ɉu, ə həli la lɔi kpɛlai. 15 Da kɛ pai, yələ wilii pɔ, diɛ hvaa di hu nwɔ̨ɔ̨, yɛ yilɛlɛa, diɛ lia tɛɛ daa pɔ. 16 Di kaa lia tɛɛ lɔ ɉu-ɉu, diɛ di kɔ̨nɔ̨n gwɛli, da wala pilɛ, da yíi lɔ hvaai di nwun ɉu. 17 Ɲą́ą́ nwɛ́i, gáá ə́ wɔ hu walawala laa tooi a wələ, yələ wala pɔ, gɛ́ homon a ə́ wɔ wɛlikɛmąąlaai loloɓoɔ, mąąhɔlɔɓo, ə́ kaa ɲə́i a kɔtaa walawala, yɛnɛ̨ɛ̨ a kpɔlu ná, gwə́i yɛ pili la mą́ą́, Yɛ́ ɓə a mą́ą́kilɛi. 18 Gáá pai ə́ laa tɛ wələ tooi, yɛ́i a vą́ŋą́, Yálá! Yɛ́ ɓə a mą́ą́kpɛ-taa walawala, a yɛ́i yáá nwɛ́lila kɛ! |