Mąątɛ̨nɛ̨ 57 - Yálá laawoo hɛɓɛ (dc)1 Nwələ ɲɛ̨itɔwɔmun: «'Hvó ɉu kala.» Davidə ɓə nwələi ŋɛ̨i too, ə kɛi doo kwəi pələ; a ɓɛlɔwai ə kɛi pu la Saulə tɔwɔ. 2 'Mą́ą́wɛli kaa! Yálá, mą́ą́wɛli kaa! Mąąhɔlɔɓo, ŋą́ą́ ə́ kɛ a mą́ą́ kilɛi, gɛ́ nóó ə́ koon mu, ə lɛɛ kpɔ ɉu mąąwɛli yələ ə tɛɛ. 3 Gáá nwóo tɛi Yələkɔ́lɔn ɉu Yálá pɔ pələ, a Ɲálái tii a mą́ą́ mɛ̨nį kəlee ɲɛ̨i kulɔi. 4 Ee kə! Yálá 'ə hvaa mą, ə lɛɛ yələi pələ, 'ə málo wɛ! Nui vánąi, ə ɲɛ̨i paa! Yálá ə nwɔ wɛlikɛmąąlaa da nwɔ tɛ̨ąi tɛɛ kuɔ wɛ! 5 Ŋą́ą́ laa yalaɠaa lɔwai, di kpəiɛ yɛ nwɔ̨n, a diɛi tii da nu kan ɉu kalai, kpalaɠaa, da tɔ́nwąɠaa ɓə di la, a di ɲįn, di nɛ̨n ə ɓo a ɓɔwa kwɛaa ɲąą liɛ. 6 Yálá! 'Hąŋa 'ə́ tɔɔ yələ kɔ́lɔn mɛ̨i! Ə́ wɔ mąąwiɛ ə hee lɔi kəlee mɛ̨i. 7 Daa hɛlɛn dɛ gbáálə hu, daa gɛ ŋą́ą́ koloon kɛnɛ̨! Daa lɔwa tee tɔwɔ, diɛmun mə da too ɉu. 8 Ną́mu Yálá, níi laa gwə́i, níi laai kpɔ gwə́i gɛ́ wələ too. 9 'Ə́ muhəɠə ɲɛ̨́i pɔ̨nɔ̨ hɛn. 'Ka ka muhəɠə, gwɛnįn da bɛlɛgwəi. Gɛ́ pɛli hvóló nwun ɉii. 10 Ną́mu Yálá, gáá pai ə́ hɛɠɛɛɓoi, nu huwuɠaa lɔwai, gɛ́ ə́ laa too a wələ, lɔiɠaa hu. 11 Mąąhɔlɔɓo, ə́ wɔ wɛlikɛmąąlaa aa laŋ yələ kɔ́lɔn mɛ̨i, yɛ́ tɛ̨ą aa həli yələ kɔ́lɔn ma. 12 Yálá! 'Hąŋą ə́ tɔɔ yələ kɔ́lɔn mɛ̨i, ə́ wɔ mąąwiɛ ə hee lɔi kəlee mɛ̨i. |