Bìoball air-loidhne

Mąątɛ̨nɛ̨ 56 - Yálá laawoo hɛɓɛ (dc)

¹ Nwələ ɲɛ̨itɔwɔmun. Kwɛaa la lɔi hu tonwənən mąąwɛliɛ. Miktamə Davidə nwɔ wələ woo mąąwɛliɛ, ɲələi Filisti nuą di ɉon na Gatə daai.

² Mą́ą́wɛli kaa Yálá, daa hee ɉú kɛnɛ̨, da tuwɔ lɔ kɔ́ pɛlɛi mą́ą́, diɛ vána.

³ Mą́ą́ hɛnŋį nuą da tuwɔ lɔ kɔ́ pɛlɛi mą́ą́, nuąi woloi mą́ą́, di kpulu kɛnɛ̨i.

⁴ Ɲələi ɲɔw a kɛ la gɔ́lɔi, yɛ́ ɓə ŋą́ gílitɔɔ yɛ.

⁵ Yálá ɓə nwɔ́ mąątɛ̨nɛ̨ woo a həli mą, Yálá ɓə gílitɔɔ mą, vá kɛa ɲɔw; lə kpɔ ɓə nu kan a pɛli gɛi a ɲą́ą́.

⁶ Da tuwɔ lɔ mɔ̨nɔ̨ ɓoi, di wɔ kiliŋąhiɛ lɔ ɓaa gɛ́ mɔ̨nɔ̨ mįi.

⁷ Da di loo, diɛ mą́ą́ hɛnŋį, diɛ dɛ́ɛ́ pɔɔɠaa mąąkpɛɛ; nwún na pili mɛ̨nį ɓa.

⁸ Mɛ̨nį ɲɔ̨n tii mąą mɛ̨nį ɓa, da mɔ̨ɔ̨ pɛli kulɔi ɉu? Yálá ə́ wɔ liiholi ə nuąi tii hukala tai.

⁹ Yáá nwɔ́ mɔ̨nɔ̨ɠaai kəlee lono, ə́ yee hiɛ ɲɛ̨́i, ə́ ɲɛ̨́iyá kələ kpɛli mąn; kɛlɛi yili kəlee pɛ̨ɛ̨ ə́ wɔ hɛɓɛ́i hu?

¹⁰ Ɲówoɠaa kaa pai pui dɔ́wɔ, a ɲələi gáá pai ə́ təlii lai, gíli kaa tii ɉu gɛ́ diɛ Yálá tɔɔi búlu.

¹¹ A Ɲálái tii gáá mąątɛ̨nɛ̨i, a Yai-Laai tii gáá nwoo mąątɛ̨nɛ̨i.

¹² Yálá ɓə gílitɔɔi mą, və́ ɲɔwi lə ɓə nu kanŋaa da pɛli gɛi a ɲą́ą́?

¹³ Yálá, mɛ̨nįɠaai ŋį́ di laakwɛlanmo, gbáán ŋąąi di yəi, gáá ə́ mąątɛ̨nɛ̨ halááɠaa kulɔi.

¹⁴ Mąąhɔlɔɓo, yɛ́ ɓə gúlɔ haa yəi. Yɛ́ ɓə gɛ, və́ pɛli tooi, gɛ́ pɛli hiɛi Yálá ɲɛ̨i ɓa, yɛnɛ̨ɛ̨ kɛɛ pɔ̨nɔ̨ hu?

Lean sinn:

Ceanglaichean taic

Sanasan