Mąątɛ̨nɛ̨ 55 - Yálá laawoo hɛɓɛ (dc)

Nui daa mɛlɛkpɛɛ ma nwɔ hvɛli woo

¹ Davidə nwɔ wələ woo. Nwələ ɲɛ̨itɔwɔmun. Gwɛnin nwələ, Davidə nwɔ kilimąą wələ.

² Yálá! 'Ə́ wəli tɔɔ nwɔ́ hvɛli ɓo woo ɓa, ŋą́ kɛi ə́ mąąnɛ̨ɛ̨, hvó ə́ ɲɛ̨i həɠə laa.

³ 'Ə́ ɲɛ̨i hee bɔ́ pələ, nwóó pulu pənə; ɉú aa pu mą́ą́, gɛ́ nwóó laa.

⁴ Ɲówo tomą woo kɛ pələ, da nu ɲɔ̨nwɔ̨ɔ̨ɠaa huluun bələ mɛ̨́i, mą́ą́ kaa kpɛlin ɉii, di kaa mɛ̨nį ɲɔ̨n gbɛa kpɛa heei nwúɔ̨; diɛ pɛlɛ mą́ą́ a liiholi.

⁵ Níi hvo kpɔ gɛi, gɛ́ kpɔ ŋą́ haa a ɲɔw.

⁶ Gɛ́ ɲɔw, ɉú yɛ kpɛlin; nwún ɲilɛɛ ɲą́.

⁷ Ya ɓə gɛ gɛ́ kɛ diɛ: «Ə li kpɛli kɛ góón gaa mą́ą́ yɛ tonwənən, ŋą́ li kɛ koon, gɛ́ li mą́ą́kilɛi,

⁸ A tɛ̨ą ŋą́li li kpɔ kwɛa la; gɛ́ yíi lɔi pun ɉu.

⁹ Ŋą́ li kɛ li a mąąhulaa, gɛ́ pu laakala hvaŋą tɔwɔ.»

¹⁰ Ną́mu Yálá! 'Hvaa too di lɔwai, woo taɠa lɔ di lɔwai; mąąhɔlɔɓo, gáá wea mɛ̨nį da hvaa mɛ̨nį kaai daa kwəi.

¹¹ Da kɛ tɛɛi a hvoló da kpinį, daa mąąkpɛ hįį kpoloo mɛ̨i, daa kwəi pələ yaan, kɛɛ kala mɛ̨nį da wea mɛ̨nį ɓə laa.

¹² Daa kwəi pələ, paa ɓo, toomɛ̨i da heemɛ̨i, di hva kpɛɛ gwəliɠaa hu.

¹³ Ə li kɛ ɲówo ɓə tii nálan ɉii, ŋį́ li kɛ níi laa yili hu, ə li kɛ nui nwɛ́li hvo mą, ya ɓə tii tɔɔi nái, ŋą́ li pu kɛ dɔwɔ.

¹⁴ Kɛlaa, yɛ́ ɓə, yɛ́i gwa yɛ́ gu tɔɔ gaa tanɔ̨n, yɛ́i a níiɓamun, ə́ ɓo a gwə́i mɛ̨nį kɔ́lɔnmun.

¹⁵ Nɛ̨ɛ̨laa ɲąąnɛ̨ɛ̨ aa kɛ gu yili gu kee ɓa, gu ɓo gu kee pɔ Yálá yəi bɛlɛ́n guɔ hiɛ gu kee pɔ.

¹⁶ Di hukala mɛ̨nį ə wolo diɛ, di lɛɛ a di hvulú di yɛɛ ɲąmuątaa; mąąhɔlɔɓo, kili ɲɔ̨nwɔ̨ɔ̨ kaa di yəi bɛlɛ́n, ə ɓo di hu.

¹⁷ Nwɛ́i Yálá ɓə gáá nwóó tɛi bɔ pələ, ɛlɛɛ, Yai-Laa ɓə a nwún mąąɓo.

¹⁸ Yələwala, hvóló ŋą, yələwulii, gwə́i pilɛɛ kɛ mą́ą́, gɛ́ nwóó laa, ə nwóó mɛ̨n.

¹⁹ Ə nwún mąąɓo, ə ɲee kɛ mą́ą́, ɓɛlɔwai di kɔ́ pɛlɛ la mą́ą́, mąąhɔlɔɓo nu kpulu kɛnɛ̨ daa kɛ mąątinɛn.

²⁰ Gɛ́ Yálá ə di wooo mɛ̨n, ə nwumɛ̨ tɛ a diɛ; yai tii Heeɓolaa kaa ɲəi ə həɠə yɛnɛ̨ɛ̨ kɔ́wɔ tɔɔi lɔwai ɓa; nuąi tii kɛ pələ mąą hvo pai hvalin ɉii, di hva ɲɔw Yálá ɓa.

²¹ Ɉulɔnui tii ə kɛi mɛlaa kɛlɛ, nwooi ə gwɛlɛ, ə yili mąą kala.

²² Naa nɛ̨ɛ̨i mą yɛ kwɛ̨in nwulɔ, Kɛlaa, nii yɛ kɔ́ kɔ́. Vaa wooɠaa nɛ̨ɛ̨i na yɛ wulɔ, Kɛlaa ɓɔwa kwɛaɠaa ka tii.

²³ Yɛ́ tiɛ̨i tɛ Yai-Laa nwuɔ̨, ə ə́ laa hon mu, yɛ ə́ hvąŋąlɔ, hva tələnmomun nɛɛ laa, a yələ ta, hvo too.

²⁴ Ɛlɛɛ yɛ́, Yálá, ə́ kaa pai ə́ yee heei diɛ, yɛ́ di pili kámą kɛnɛ̨ hu. Nu paa nuą, da wɛa nuą, di hvo pai di wɔ yɛnɛ̨ɛ̨ ɓɛla ɓoi ɉɛąi. Kɛlaa nwɛ́i, gílitɔɔi yɛ́.