Mąątɛ̨nɛ̨ 53 - Yálá laawoo hɛɓɛ (dc)Nuąi di hvo Yálá pɔ 1 Nwələ ɲɛ̨itɔwɔmun, ə doo a hvɛlikɛ hɛn da vɛɛ. Davidə nwɔ mąą kwɛli woo. 2 Ɓoɠonuą da kɛ kɛi diɛ: «Yálá hvo laa!» Daa kala, daa lunwuun, di wɔ tuwɔ pələ ɲɔ̨n hu, di ta hva tuwɔ a nɛlɛɛ. 3 Yálá aa lɛɛ yələ kɔ́lɔn ɉu, aa nwun mąą ląŋąn, nu kanŋaa diɛ, yɛ di kaa, a kɛ dɔ̨nɔ̨ kpɛli kaa ɉu kili yɛ ɓo mą, Kɛlaa hvo dɔ̨nɔ̨ kpɛli kaa li ɉu, yɛ Yálá kwɛli. 4 Gəlee daa lan, di tɔɔi ə ɓo tanɔ̨n, tuwɔ pələ ɲɔ̨n ɉu, di ta hvo tuwɔi a dɛ̨nɛ̨n, ə mą kɛ tanɔ̨n gbɛli mąn. 5 Mɛ̨nį ɲɔ̨n gɛ nuąi tii, gbaɠala hvo mɔ̨ɔ̨ diɛ, a diɛi kɛi nwɔ́ nu kanŋaai mįi, a di kɔ̨nɔ̨n di kɛi gulɔ di yəi, ɛlɛɛ, di hva kpɛli Yálá hvɛli! 6 Diɛ ka ɓɛ, di mąą yɛ kpɛlin, ya pa, nu mąą kpɛlin mɛ̨nį hvo laa. Mąąhɔlɔɓo, nuąi kɔ́ pɛlɛi yɛ́, Yálá aa di kɔ́wɠaa hu taɠa-taɠa. Yá yɛlɛ kulɔ di hu kɛa, mąąhɔlɔɓo Yálá aa di pili. 7 Gbɛɛ ɓə a lɛɛ Siɔn, yɛ kɔ́ nɛ̨ɛ̨ Israɛlə ɓa? Yálá a kɛi pɛ̨nɛ̨ yɛ pa a nwɔ nuąi kɛ luwɔlaa hu, Ɉakɔbə kaa pai mąnąi, Israɛlə ə ɓo kwəinɛ̨ɛ̨ hu. |