Mąątɛ̨nɛ̨ 52 - Yálá laawoo hɛɓɛ (dc)

Yálá a wɛamun giti tee

¹ Nwələ ɲɛ̨itɔwɔmun. Davidə nwɔ kilimąą wələ.

² Ɓɛlɔwai Doɛgə, Edɔmə mun ə paa la Saulə pɔ, yɛ kɛ mą: «Davidə kaa Ahimelɛkə yəi bɛlɛ́n.»

³ Lə mɛ̨nį ɓa yai ə́ kaa ə́ kpɔwɔ ɲąą kɛnɛ̨i mɛ̨nį ɲɔ̨n ɉu? Yálá a kulɔ nwoo ɓa a yələ kəlee.

⁴ Ə́ nɛ̨n a kɛ lɔ kɛɛ kala mɛ̨nįɠaa pənəi yɛ naa, a kɛɛ kala, yɛ nwunbu-kwɛli ɲąąlia: Nwəlɛɛ nu ɓowoi.

⁵ Yá mɛ̨nį ɲɔ̨n viɛlaɓo mɛ̨nį lɛlɛɛ ɓa. Yɛ́ lɛɛ hviɛlaɓo tɛ̨ą ɓa.

⁶ Ee kə! Nu ɓowo nɛ̨n, kɛɛ kala woo kəlee wɛli kaa yɛ́.

⁷ Yálá yaa kpinįi gaa pai ə́ hu kalai, a yələ kəlee mɛ̨nį. Gaa pai ə́ yalai, yɛ́ ə́ wɛan ə́ yəi bɛlɛ́n, yɛ ə́ kulɔ a ə́ nwun, yɛnɛ̨ɛ̨ nuą lɔwai.

⁸ Tələnmo nuą kaa pai nąą kaai, diɛ ɲɔw, diɛ yɛlɛ mą, diɛ kɛ:

⁹ Ka gbakoloi kaa li! Yai hvo Yálá kɛ li a mąą kɔ̨nwɔ̨ kwɛni, Kɛlaa gilitɔɔi kɛ nwɔ hɛngɔw kɛnɛ̨ pələ ɓa, yɛ nwun dɛ nwɔ tuwɔ pələ ɲɔ̨nŋąąi hu.

¹⁰ Kɛlaa nwɛ́i, gáá yɛ ɓá wulu laa huwia, Yálá yəi bɛlɛ́n. Gílitɔɔi lɔ kpan-kpan Yálá nwɔ mɛ̨nį lɛlɛ pələ ɓa.

¹¹ Gáá pai kɛi ə́ hɛɠɛɛɓoi a yələ kəlee, ə́ kɛ mɛ̨nįɠaa mąą mɛ̨nį ɓa, ɲɛ̨́i kaa ə́ laa loloɓo mɛ̨nį tɔwɔ, ə́ wɔ tələnmo nuą ɲɛ̨i ɓa.