Mąątɛ̨nɛ̨ 51 - Yálá laawoo hɛɓɛ (dc)

'Ka gu Yálá hvɛli, ə gu mąąwɛli kaa

¹ Nwələ ɲɛ̨itɔwɔmun. Davidə nwɔ wələ.

² Ɓɛlɔwai Yálá kwəi mɛ̨nį hu kulɔ mun Natan ə li ɉɔn moi la mą, yɛ hvilɛn na Bɛtsabe mąą mɛ̨nį ɓa.

³ 'Mą́ą́wɛli kaa, nwɔ́ Yálá, yɛ bələ yá ɲɛ̨imąąwɛli kaai kaa la; nwɔ́ nɛ̨ŋɛ̨n nwaa, yɛ bələi yɛ́ wɛlikɛmąąlaa kaa lai.

⁴ 'Nwɔ́ túwɔ́ pələ ɲɔ̨n nwaa kpɔ mą́ą́ tɛ̨ɛ̨tɛ̨ɛ̨, 'nwɔ́ nɛ̨ŋɛ̨n nwaa mą́ą́ ə́ mą́ą́həɠə.

⁵ A tɛ̨ą, ŋą́ą́ ɉɔ́n gɔlɔn, nwɔ́ nɛ̨ŋɛ̨n kaa lɔ ɲɛ̨́i mu a yələ kəlee.

⁶ Ŋą́ą́ nɛ̨ŋɛ̨n ɉəɠə yɛ́, yɛ́ kɔw taanɔ̨n gbən, yɛ́ kpɔ ɓə, mɛ̨nįi ɲɔ̨nwɔ̨ɔ̨ ə́ ɲɛ̨i mu, ŋą́ą́ gɛ; yili ɓa, yá kɛi ɉɔ́n mo, yɛ́ tɛ̨ą mɛ̨nį li, yá kɛi ɉútɔɔ, tɛ̨ą kaa ə́ pɔ, ɛlɛɛ, yɛ́ kitii mąą kulɔi hvo mą.

⁷ Hvo gaai, di gáá mɛ̨nį ɲɔ̨n ɉu, néé ə mą́ą́ koo həɠə nɛ̨ŋɛ̨n ɉu.

⁸ Kɛlaa ə́ kaa bɔ, tɛ̨ą ə kɛ nu koo kpala, yɛ́ ɉú tɔɔ a ə́ wɔ kilii, loo pələi.

⁹ Nwɔ́ nɛ̨ŋɛ̨n kulɔ mą́ą́ a isopə, mą́ą́ ə həɠə. Nwáá, ŋį́ kwələ, ŋį́ tɛɛ yeehunwɔ̨ ɓa.

¹⁰ 'Hváá mą, gɛ́ pɛli wələ woo, da kwəinɛ̨ɛ̨ woo mɛ̨n ɉi, gɔ́wɠaai ə́ di kiin giin, diɛ pɛli mąnąi.

¹¹ 'Ə́ ɲɛ̨́i həɠə nwɔ́ nɛ̨ŋɛ̨nŋąąi diɛ, 'nwɔ́ nɛ̨ŋɛ̨nŋąąi kəlee waa.

¹² Ee Yálá! 'Kili lɛlɛɛ too gwə́i, líi ninɛ̨ lɔ ɉú.

¹³ 'Hvó bili kwɛa la, 'hvó ə́ ɲɛ̨i lɛlɛɛ həɠə mą́ą́, 'hvo ə́ wɔ Nįį-Mąąhəɠɛɛi kulɔ ɲəi.

¹⁴ 'Málo mɛ̨nį ŋą kwəinɛ̨ɛ̨ too ɉú. 'Lii kpələ kili tɛɛ bɔ́.

¹⁵ Ŋą́ yɛ́ pələi lɛ hɔn ɲɔ̨n gɛ nuą diɛ, nɛ̨ŋɛ̨n ɉəɠə nuą diɛ pɛli pənəi, diɛ pa ə́ pɔ.

¹⁶ Ee kə́! Yálá! Mɔ́lu Yálá! 'Hvó ɉón yɛ bələi ŋą́ túwɔ́ la, gɛ́ pɛli yɛ́ tələnmolaa hu kulɔi a nwóó kɛnɛ̨.

¹⁷ Ną́mu Yálá, 'náá hvaa, náálee yɛ pɛli ə́ mąątɛ̨nɛ̨i a ɉələwoo.

¹⁸ Hvó ɲə́i haláá hɛn bɔ, hvó pai ə́ yee heei nwɔ́ haláá hɛnŋaai ŋą́ gəlee kələn da mu.

¹⁹ Yálá, ɉaláái ə́ kaa bɔ, ya ɓaa a nui níí aa yali gwə́i, líí daa mąąwɛli, yaai da ɉu wolo, hvá gbɛ ə́ ɲɛ̨i mu.

²⁰ Siɔn hon a nɛlɛɛ, 'pənə ə́ Ɉerusalɛmə mąą kwɛnąn, nwɔ hį́i kpoloonŋąąi tɔɔ.

²¹ Akɛtii ɉalááɠaa di di hvaaɓo, a yii kpɔ da gəlee kələn, diɛ ə́ mąąwiɛ la, da ə́ líí hon gɛa lɔ ɓəi! Kuɔ kɛa pa a niŋɛ̨ hilɛɠaa laa həli yɛ́ a haláá ə́ wɔ haláá kulɔi ɓa.