Mąątɛ̨nɛ̨ 50 - Yálá laawoo hɛɓɛ (dc)1 Asafə nwɔ wələ woo. 1 Asafə nwɔ wələ woo. Yáláɠaa di wɔ Yálá, Yai-Laa aa hvaa; aa lɔi nuą kəlee təli ɲąąkpɔn ma. Ə həɠə voló kulɔi pələ, ə həli dooi pələ. 2 Yálá kaa Siɔn daai, yai nɛlɛɛ, mąąkulɔi hvo mą, yɛ lən. 3 Ku wɔ Yálái ə pa wɛ! Hvo kɛa naapilɛ! Nwɔ̨n gaa ɲɛ̨itɔwɔ, yɛ kɛɛ kələn; tulɔ hvaŋą kɛnɛ̨ ə ɓo gwɛlɛ nąą kəlee. 4 Gaa yələkɔlɔn da lɔi di təlii, nwɔ nu huwui kiti tee mɛ̨nį ɓa. 5 'Ka nwɔ́ tələnmo nuąi ɲąąkpɔn, a diɛi tii kwa diɛni ku ɲąmą mįnɛ̨ həɠəi. 6 Yələkɔlɔn gaa nwɔ tələnmolaa loloɓoi, Yálá ɓə a kiti teemun. 7 Nwɔ́ nu huwui! 'Ka ka wəli tɔɔ, gáá mɛ̨nį ɓoi, Israɛlə, gáá ə́ hɔn moi; «ɲą́ą́ ɓə gaa a Yálá, ə́ wɔ Yálá ɓaa a Ɲą́ą́!» 8 Və́ ə́ hvalai ə́ wɔ halááɠaai mąą mɛ̨nį ɓa, ə́ wɔ haláá hɛnŋaai yá gəlee kələn, di kaa ɲɛ̨́i ɓa a yələ kəlee. 9 Və́ pai niŋɛ̨ hilɛ ta həɠəi ə́ yəi bɛlɛ́n, vá nwɔ̨nɔ̨ ɓolu hilɛɠaa hon ə́ wɔ galai hu; 10 Mąąhɔlɔɓo, lɔwɔ huwɔɠaa kəlee di kaa a nwɔ́ɔ́, da taatɛlɛɛɠaai da di kɔ̨nɔ̨n gwɛli yeeɠaa hu. 11 Ŋą́ ɲee hu nwɛ̨niɠaa kəlee kɔ́lɔn, wɛla hu huwɔɠaa kəlee di ɓo a nwɔ́ɔ́. 12 Ə mą kɛ kɛ pulu aa ɉón, vá mo yɛ́, mąąhɔlɔɓo lɔi da ɉu hɛnŋąą kəlee di kaa a nwɔ́ɔ́. 13 Niŋɛ̨ huwɔ ɓə mɔ̨ɔ̨ ŋą́ kɛi pa mįi, gɛ́ ɓolu hilɛ ɲąmą kpələ? 14 Haláái mąąnɛ̨ɛ̨ ə́ gulɔ Yálá ɓa, ya ɓaa: Ə́ gɛ mɛ̨inɛ̨ɛ̨ hu kɔlɔn, ə́ wooi ə́ gwɛlɛ Hɛn Gəlee mɛ̨imun ma, ə́ bɔ mɛ̨nį kɛ. 15 Ɛlɛɛ, ɲələi yá kɛ la kanąn ɉu, də́li, ŋą́ ə́ kulɔ ɉu, ə gɛ ə́ mą́ą́wiɛ. 16 Kɛlaa nui a mɛ̨nį ɲɔ̨n gɛ mun, Yálá a kɛ mą: «Yá kɛ nwɔ́ tiɓoɠaai ɓoi lə mɛ̨nį ɓa? Nwɔ́ mįnɛ̨i mąą lono ə ɓo ə́ la, lə mɛ̨nį ɓa? 17 A yɛ́i hutɔɔ wɛli kpɛɛ yɛ́, yɛ́ lənə nwóó ɓai? 18 «Ɛlɛɛ, yá nwuɔ̨mun gaa, yɛ́ too bɔ, ə́ kɛi ɓaa wɛli hon nuą lɔwai. 19 Mɛ̨nį ɲɔ̨nwɔ̨ɔ̨ lɔ ɓə a kulɔ ə́ la, yɛ́ lɛɛ mɛ̨nį pɛli ə́ nɛn ɲą. 20 Yá hee, ə́ nąn non lɔ ɓə naa kaa ə́ la, yɛ́ ə́ lee-lon naa mąąhiɛ. 21 «Mɛ̨nįi ə́ gɛi, ya ka tii, akɛ tii ŋą́ mɔ̨ɔ̨ pɛli náápilɛi? Gaa ə́ kwəi gáá yɛ yɛ́? Ə́ hɔn ga tii gáá moi ə́ ɲɛ̨i ɓa. 22 Kaai ka lɛ̨ą Yálá ɓa, ka mɛ̨nįi ti mɛ̨n, ka gbaɠala kaa! Ka wala gɛ tii, ŋą́ ɉuɓɛla, ɛlɛɛ, nu ta hva gulɔ ɲəi kɛ.» 23 Nui a mɛ̨inɛ̨ɛ̨ hu kɔlɔnŋąą kɛ a nwɔ haláá hɛn, gaa mą́ą́wiɛi, ɛlɛɛ, nui a ɉiɛ pələ ɲɛlɛ kɛ, ya ɓə ŋą́ Yálá ŋą ɓalo mɛ̨nįi ɲąąnɛ̨ɛ̨ lɛ mą. |