Mąątɛ̨nɛ̨ 5 - Yálá laawoo hɛɓɛ (dc)Da kɔ́ pɛlɛ tələnmolon ma, nwɔ hvɛli woo 1 Nwələ ɲɛ̨i tɔwɔmun, Davidə wələi ə doo a ɓɔɔ. 2 Ə́ wəli tɔɔ nwóó ɓa, Yai-Laa, ə́ wəli tɔɔ kpɔ a nɛlɛɛ, nwɔ́lɔ-woo ɓa. 3 Ə́ təlii gáá moi, ə́ wəli tinɛ̨n bɔ́ pələ, nwɔ́ tɔɔmun, nwɔ́ Yálá! Yɛ́ ɓə gáá ə́ təlii. 4 Yai-Laa! Yələɓɔi həli pələ tɛitɛi, yá ə́ wəli tɔɔ nwóó ɓa, yələ wala pɔ, ŋą́ mɛ̨nį kəlee ɲąą pɛli, ə́ mąą mɛ̨nį ɓa, ɛlɛɛ, gɛ́ nąą mąą kpɔn! 5 Hvó a Yálái mɛ̨nį ɲɔ̨n nwɛli kaa mąą, nwąnąlɔmun hva ɉeei ɉɔlɔɓo ə́ pɔɔli. 6 Ɲąŋąɲąŋąmun va tɔɔ ə́ ɲɛ̨́i mu, Yá yowolaa kulɔ a mɛ̨nį ɲɔ̨n gɛ nuą kəlee. 7 Ya lɛɛnuą nwun na pili, ɲąmą pumun, mɛ̨nį piliɉumun, Yai-Laa a yowolaa kulɔ a diɛ. 8 Kɛlaa, nwɛ́li la kɛ pələ kɛnɛ̨ ə́ yəi, ŋą́ lɔ ə́ yəi bɛlɛ́n; ŋą́ kwɛli hvilɛn yɛ́, yɛ́ pɛlɛ́ mąąhəɠɛɛi pɔ pələ, gɛ́ ə́ mąąwiɛ a ɲɔw mąąlaa. 9 Yai-Laa, 'dɛ̨́nɛ̨n dɔɔ a yɛ́ tələnmolaai; bələi mąn mą́ą́hɛnɉi nuą tamąą la, Ə́ nwɔ pələi hąŋąn ɲɛ̨́i tɔwɔ. 10 A tɛ̨ą, nu hva pɛli gilitɔɔi, di hvaa woo tai lɔpee ɓa, di hu pələ kalaai kpɔ hɔwɔ-hɔwɔ; di kwaną wolo kaa a kámą laa tɛɠaa, di hvaa woo kaa yɛ niminin. 11 Yálá, 'di hon di hɔn tii ɓa! 'Di nwun nɛɛ di wɔ nwundɔɔ ɲɔ̨nwɔ̨ɔ̨ɠaai hu! Di wɔ túwɔpələ ɲɔ̨n damą pələi tii, da di nwun dɛ pələ ə́ pɔ, 'di kpɛ. 12 Nuąi kpɔ ya di lɔ ə́ nįnįn mui, 'di kɛ kwəinɛ̨ɛ̨ hu, a yələ kəlee kwəinɛ̨ɛ̨. Nuąi ə́ laa wɛli kaa diɛi, yá di mąąkpɛ, di kaa pai kɛi tómąi a kwəinɛ̨ɛ̨. 13 Yai-Laa, yɛ́ ɓə yá lúwɔ́ kɛ tələnmolon ma; yɛ́ wɛlikɛmąąlaa ə ɓo a mąąkpɛ gbala. |