Mąątɛ̨nɛ̨ 49 - Yálá laawoo hɛɓɛ (dc)1 Nwələ ɲɛ̨itɔwɔ mun. Kore lonnii di wɔ wələ woo. 2 Yɛnɛ̨ɛ̨ nu kəlee, 'ka ka wəli tɔɔ mɛ̨nįi ŋɛ̨i ɓa, lɔi mɛ̨i heeɓo nuą, 'ka ka wəli tɔɔ kpɔ a nɛlɛɛ. 3 Kaai kɔ́lɔn və kaa nuą lɔwai, kaai kɔ́lɔn gaa kaa, kaai a yeehowolo nuą, kaai a hɛn gɔw nąmįną ka kəlee kpɔ kpun. 4 Kilimąą woo lɔ ɓə a kulɔ ná, kili mɛ̨nį ɓə nį́i kaa moi. 5 Ŋą́ nwə́li tɔɔ kpɔ a nɛlɛɛ hanwon ma, ŋį́ mɛ̨nį hukpinɛ̨ɛ̨ hu pɔ̨nɔ̨ a nwɔ́ gwɛnįn nwooi. 6 Lə mɛ̨nį ɓa nu a pɛli ɲɔwi a mɛ̨nį ɲąąnwąnąą yələ? Lə mɛ̨nį ɓa, gbąną nuą daa hvilɛn búlu, daa mą́ą́tinɛ̨n daa doo gee hu? 7 A nuąi di kilitɔɔ di wɔ hɛn gɔw ɓa? Diɛ di kpɔwɔ ɲąą kɛnɛ̨ di wɔ hɛn gɔw kpɛa kpɛaai mąą mɛ̨nį ɓa. 8 Nu ta hva pɛli mɛlan nįį nwun mąąɓoi, nu ta hva pɛli nwɔ̨nɔ̨ nu nįįhɔ̨nwɔ̨ tɛɛi Yálá pɔ. 9 Ə mą kɛ, nu aa wali kɛnɛ̨ kwɛlɛ nu nįį mɛ̨nį ɓa, nwɔ yɛnɛ̨ɛ̨ kaa lɔ pai kpɛɛi a yələ ta. 10 Mąą nu a mɔ̨ɔ̨ pɛli lɛɛi lɔ yɛnɛ̨ɛ̨ a yələ kəlee? Akɛtii, di hvo mɔ̨ɔ̨ pai naai kámąi? 11 Ya pa, gu ɲɛ̨i kaa kilimąą nuą diɛ, diɛ haa, ɓowo nuą da kilikpɛɛgwəi nuą, di nwun na yɛ pili a gee; diɛ di wɔ hɛn gɔw lɛɛ nu takpɛliɠaa yəi. 12 Ə kɛ di kwəi, di wɔ pɛ́lɛ́i kaa pai kɛi lɔ laa a yələ kəlee, di hva pɛli kɛ di yíi pɛlɛ́ pui; da di laaɠaa hee di wɔ lɔiɠaai diɛ. 13 Nu da nwɔ mąąwiɛ laa, di hva kpɛli yíikuu tanɔ̨n gɛ di kee ɓa, gɛ pələ kaa yɛ huwɔi a naapilɛ. 14 Nuąi da di kilitɔɔ diɛ, bələ ɓə di tínąą kaa la, a diɛi da di wəli tɔɔ di hvaa woo ɓa, diɛ di mąątɛ̨nɛ̨. 15 Di puɔi di kee mɛ̨i ɲąmuątaa yɛ ɓɛlaaɠaa, haa ɓə a pələ kulɔ a diɛ, yɛ bələi taatɛlɛɛ mɛ̨i kaamun a gɛ la a nwɔ taatɛlɛɛɠaai. Yələ a kɛ gaa ɓɔi, kwəikwələ nuą diɛ hee di mɛ̨i, di mąąnįnįn gbɛɛi ɓaa ɲąmuątaa; di mąąkwɛa di wɔ tɔɔ pɛlɛ́ɠaai diɛ. 16 Kɛlaa, Yálá kaa pai nwɔ́ yɛnɛ̨ɛ̨ nwun mąąɓoi ɲąmuątaa yəi, a tɛ̨ą, gaa pai ɉə́ɠəi laa. 17 Ə́ mą nu ta kaa yɛ hɛngɔw kɛnɛ̨ hɔlɔɓo, yili hvo ə́ mąąɲɔw, ə mą kɛ, nwɔ pɛ́lɛ́i nwɔ mąąwiɛlaa hu kaa kɛnɛ̨i. 18 Mąąhɔlɔɓo ɉaai lɔwai a həli, hvo pai lii a hɛn da; da nwɔ mąąwiɛlaai di hva li a gee. 19 Ɓɛlɔwai ə kɛ la vúlu kɔwɔ ɲą, ə kɛi gbɔwɔ nwɔ luwu pu, yɛ kɛ mą: «Di kaa di yee lɔwai yɛ́, hvó gaai, ə́ kɛ mɛ̨nį kəlee hu kaa nɛ̨ɛ̨i yɛ́!» 20 Gaa pai lii nąnni pɔɔli, di hvo kɛa pai kɛɛ pɔ̨nɔ̨ kaai. 21 Nui mąąwia, kɛlaa hvo gbaɠala kɔlɔn, gɛ pələ kaa yɛ huwɔi aa haa. |