Mąątɛ̨nɛ̨ 48 - Yálá laawoo hɛɓɛ (dc)

Siɔn kaa a Yálá nwɔ yee

¹ Kore lonnii di wɔ wələ.

² Yai-Laa kɛnɛ̨i, mąąwiai lɔ a yələ kəlee, gu wɔ Yálái nwɔ taaleei hu, nwɔ yee mąąhəɠɛɛi nwuɔ̨.

³ Ɲee lɛlɛɛi, ɲee muhəɠɛɛ kpɔ ɓəɠə-ɓəɠə, lɔi kəlee nwɔ kwəinɛ̨ɛ̨ li. Yɛnɛ̨ɛ̨ wəlingɛ̨ą ɓaa a Siɔn yee! Heeɓomun gɛnɛ̨ɛ̨ yəi gwəlii.

⁴ Siɔn kwəlii nwɛi, Yálá ɓə di kɔ́lɔn a nɔi mąą kɔ̨nwɔ̨ taa.

⁵ Mąąhɔlɔɓo, tɔɔɓɛlaa daa kɛ di kee ɲąąkpɔn, diɛ pa a di kpulu.

⁶ Di gaa lɔ, di hu ə pu diɛ, di ɲɔw, di nɛɛmą di tɛɛ a gilɛ.

⁷ Di mąą ə kɛi kpɛlin, diɛ kpəlaan, yɛ nɛ̨ɛ̨nu a kɛi kwəi nwąną kɛ.

⁸ Hvóló həɠəi pələ hvaŋą li kɛ, yai kɛi Tarsisə kələnŋaa hu yali.

⁹ Mɛ̨nįi ku bələ mɛ̨n, kwaa gaa a ku ɲɛ̨i kɔ́w, Yai-Laa Mɛ̨nį Kəlee ŋą Hééɓomun nwɔ taai hu; ku wɔ Yálái nwɔ taai hu, Yálá a ɉee kpɔ tin-tin, a yələ kəlee.

¹⁰ Yálá, ku kilitɔɔi ə́ wɔ wɛlikɛmąąlaa ɓa, ə́ yəi bɛlɛ́n.

¹¹ Yálá, Ə́ mąątɛ̨nɛ̨ woo da ə́ laa, a lɔi nąą kəlee kulɔ ə́ ɓa-mįi-yee laahvɛɛi a tələnmolaa.

¹² Siɔn yee kaa kwəinɛ̨ɛ̨ kulɔi, Ɉuda taaɠaa diɛ mąną, ə́ wɔ kiti wooɠaai mąą mɛ̨nį ɓa.

¹³ 'Ka hiɛ Siɔn taa mąąkpɛ hįį kpoloonŋaa mɛ̨i, 'kaa mąąkpɛ pɛlɛ́ɠaa lono.

¹⁴ 'Ka mąąkɔ̨nwɔ̨ hįi lɛlɛ pələ kaa, 'ka dɔɔɓɛlaa yíi pɛlɛ́ɠaa lono, nuąi pai lɛɛi ka pulu, kaa pɛli kɛi diɛ:

¹⁵ Ɲálái ŋɛ̨i ɓə a gu wɔ Yálá a yələ kəlee mɛ̨nį, ya ɓə gu ɲɛ̨itɔwɔ, yɛ gu tənən dɔɔ.