Mąątɛ̨nɛ̨ 46 - Yálá laawoo hɛɓɛ (dc)1 Nwələ ɲɛ̨itɔwɔmun Kore lonnii di wɔ wələ. 2 Yálá kaa a ku mąąkilɛi wala wala, a kpɔn nu ɓa a yələ kəlee liihɛlɛn ɉu. 3 Yili mąą mɛ̨nį ɓa, ku hva pɛli ɲɔwi, lɔi ə mą kɛ tɔɔi takpa takpa, yeeɠaa diɛ pu gboloyá hu. 4 Yáɠaa diɛ huluun, di hvili yɛ tɔɔ di ŋą, yeeɠaa diɛ kpɛlin di wulu ŋą. 5 Kɛlaa yá kɛnɛ̨ ta kaa laa, mɛlaɓoɔ ɉu tamąą, yɛ kwəinɛ̨ɛ̨ tɛɛ Yálá nwɔ taai pɔ; yɛ yələkɔlɔn ɉu Yálá nwɔ pɛlɛ́ɠaai mąąhəɠə. 6 Yálá kaa daa kwəi, ɲɔw hva pɛli tooi nąą nuą hu, Yálá a kpɔnmąą tɛɛ bɔ yələɓɔi pinɛ̨ɛ̨. 7 Lɔiɠaa hu tin ə kɛi kulɔ, tɔɔlaaɠaa diɛ kɛ yɛɠɛ yɛɠɛ, Yálá ə woo tɛɛ, lɔi ə həɠeen. 8 Yai-Laa Mɛ̨nį Kəlee ŋą Hééɓomun gaa ku pɔ, ku mąąkpɛ taai gaa ku yəi, ya ɓaa Ɉakɔbə nwɔ Yálái. 9 'Ka li ka Yai-Laa kɛ mɛ̨nįɠaa kaa, a mɛ̨nį kpɛa kpɛai aa gɛ lɔi mɛ̨i. 10 A kɔ́ɠaa kpɛɛ lɔi nąą kəlee, yɛ kilɛn ɉu yali, yɛ kpala hu yali; a kɔ́ kɔ́ wotoloɠaa kələn. 11 Yɛ kɛ diɛ: «'Ka gwɛlihɛnŋaa laa, 'ka gɔlɔn kaa diɛ ɲą́ą́ ɓə gaa a Yálá! Ŋą́ hį́iɠaa ɲąąwooɓo, gɛ́ lɔi ɲąąwooɓo.» 12 Yai-Laa Mɛ̨nį Kəlee ŋą Hééɓomun gaa ku pɔ, ku mąąkpɛ taa ɓaa Ɉakɔbə nwɔ Yálái. |