Mąątɛ̨nɛ̨ 44 - Yálá laawoo hɛɓɛ (dc)

Ɉuifəɠaa kaa Yálá hvɛli

¹ Wələ ɲɛ̨itɔwɔmun, Kore lonnii di wɔ kililaa pono wələ woo.

² Yálá, mɛ̨nį ɲɛ̨i kɛnɛ̨ɠaai wɔlɔ ə́ gɛ, a ku nąnni di wɔɔ yələi, daa ɉu kulɔ kuɔ, ə too ku wəlii, a gbakolo koloi tii wɔlɔ ə́ gɛi.

³ Ə́ yee ə lɔiɠaa kulɔ, di nąmįną yəi, yɛ́ ku nąnni hee laa, ə́ lɔiɠaa mɔ̨nɔ̨ɓo, yɛ́ pɛli ku nąnni heei kulɔi a nɛlɛɛ.

⁴ Di wɔ kɔ-kɔ-ɓɔwa hvə nɔi tɛɛ di pɔ, di wɔ kuláálaa vəi gɔ́ nɛ̨ɛ̨ diɛ; kɛlaa, ə́ yee hvąŋą kɛnɛ̨i ɓə, ə́ yee kɔ̨nwɔ̨n mə, ə́ ɲɛ̨́ilai nwɔ nwɔ̨n nən ɓə, mąąhɔlɔɓo, di wɛli ə kɛ yɛ́.

⁵ Ee kə Yálá! Yɛ́i a nwɔ́ Heeɓomun, Yɛ́ ɓə kɛi gɛ, kɔ́ɠaa diɛ nɛ̨ɛ̨ Ɉakɔbə ɓa.

⁶ Ə́ haalai ɓə ku kɛi ɓɔ la ku yowoɠaa hu, nuąi kɛi wolo kuɔ, ku kɛi di kiin-giin, ə́ laa hu.

⁷ Nwɔ́ kilɛn hvəi ŋą́ kɛi gílitɔɔ mą, nwɔ́ kɔ kɔ́ɓɔwai hvə kɛi gɔ́ nɛ̨ɛ̨ mą́ą́.

⁸ Yɛ́ ɓə kɛi ku yee tɛɛ ku yowoɠaa diɛ, yɛ́ nwumɛ̨ tɛ a ku kɔ́yɔɠaa.

⁹ Ku kɛi tuwɔ Yálá mąątɛ̨nɛ̨ wələ tooi, kuɔ ə́ laa tɛ a wələ, a yələ kəlee.

¹⁰ Ya ka yáá ku pili, yáá ku ɲɛ̨i paa. Hvó lɛɛi kɛa ku wɔ kɔlaɠaɠaai pɔ, káá li kɔ́ mɛ̨i.

¹¹ Ku kaa pui ku yowoɠaa tɔwɔ, ku yowoɠaa diɛ too ku mɛ̨i.

¹² Yáá ku tɛɛ, yɛ ɓɛlaa lonnii, yáá ku taɠa taɠa lɔiɠaa hu.

¹³ Yáá ə́ wɔ nu huwui lɔwɔ́tɔɔ a ɉɔ̨nwɔ̨ hvįi kpɛɛ, hvó tɔ̨nɔ̨ hvɔlɔɓoli nɔwɔi tii hu.

¹⁴ Yáá ku kɛ a ku kwɛlɛ nuą di wɔ lalan ɉɛn, nuąi ku kaa di lɔwai, diɛ ku lalan, diɛ yɛlɛ kuɔ.

¹⁵ Lɔiɠaa diɛ di laa pu ku hu, nuą da kɛi ku kaa, diɛ di nwun gbɛŋɛ̨n.

¹⁶ Mɛ́lɛ́too mɛ̨nįɠaa kaa lɔ ɲɛ̨́i mu a yələ kəlee, nwumɛ̨ aa tɛ a ɲą́ą́;

¹⁷ a lalan da ɓɛlɛ kpɛɛmąą wooɠaai, ɲowo kaa moi mą́ą́, yɛ nwąną kulɔ la tii.

¹⁸ Yili kəlee aa laa kuɔ, ya pa ku hvo kɛ lɛ̨ą li yɛ́, ku hvo kɛ ə́ wɔ mį́nɛ̨i kala li.

¹⁹ Ku hvo kɛ ku kili mąą hvalin ni ə́ mąą mɛ̨nį hu, ku kɔwɔ hvo kɛ həɠə li ə́ wɔ pələi mɛ̨i.

²⁰ Ɓɛlɔwai tii ə́ ku hu wolo laa lɔwɔ-yilɛɠaa taa ɲą, ku ɓo kpɔ kɛa haa yee kɔ́nma,

²¹ Ə li kɛ kwaa kɛ lɛ̨ą ku wɔ Yálái ɓa, kuɔ ku yee hąŋąn nwɛ̨ą yálá pɔ pələ,

²² Yálá hvəli mɔ̨ɔ̨ kɛ gbaɠala kaa, a yai tii loo mɛ̨nįɠaa hu kɔ́lɔn nu kwəi?

²³ Ə́ mąą mɛ̨nį ɓə da tuwɔ ku paai la, diɛ ku hon yɛ ɓɛlaa lonnii di kaa lii di paai.

²⁴ 'Ə́ muhəɠə, Hɛn gəlee-Nąmu, lə yíi ɓə ə́ kaa moi? 'Ə́ ɲínąąɓo! Yíi ə tee ə́ ɲɛ̨i! 'Hvó ku pili a ɉukwɛa!

²⁵ Ə́ kaa ə́ ɲɛ̨i looi, lə mɛ̨nį ɓa? Yɛ́ ə́ kili kulɔ ku wɔ mɔ̨nɔ̨i, da ku wɔ laanɔ̨nwɔ̨ɠaa hu lə mɛ̨nį ɓa?

²⁶ Hvó mɔ̨ɔ̨ ku kaai, ku ɓo puuni munuun ɉu, ku laa pɛlɛɛ pɔlɔ ɓa?

²⁷ 'Ə́ muhəɠə! 'Pa kilɛ kuɔ! 'Ku nwun mąąɓo, yɛ́ wɛlikɛmąąlaa hu.