Mąątɛ̨nɛ̨ 43 - Yálá laawoo hɛɓɛ (dc)1 Yálá, mą́ą́ tɛ̨ą ɓo, nwún mąą kɔ̨nwɔ̨, nuąi di ɲɛ̨iyá hvo di hu, di yəi, gúlɔ, nui a nwoo kala, da ɲɛ̨nimun di yəi. 2 Yálá, yɛ́i a mą́ą́ kilɛ taa wala wala, lə ɓə kɛ yai ə́ bílí? Yɛ́ nɛ́ɛ́ laa, gɛ́ li a ɲɛ̨́i mąąwɛliɛ, ɲówó həɛ ɉú kpɔ tii kɛnɛ̨-o? 3 Yɛ́ kɛɛponoi da yɛ́ tɛ̨ąi tɛɛ, diɛ dɛ̨́nɛ̨n dɔɔ, diɛ li a ɲą́ą́ ə́ wɔ yee mąąhəɠɛɛi nwuɔ̨, ə́ yəi bɛlɛ́n. 4 Gáá pai həlii kpɔ Yálá kɔ́i, a Yálái tii a gɛ, gɛ́ mąną a kwəinɛ̨ɛ̨, gáá pai ə́ laa tɛi a wələ, a bɛlɛgwəi gwɛnįn nwoo, Yálá, yɛ́i a nwɔ̨ Yálá! 5 Níi wolo, ə́ kaa mąąwɛli hee ɓoi, yɛ́ ə́ wóó laa mɛ̨́i, lə mɛ̨nį ɓa? Ə́ kilitɔɔ Yálá ɓa! A tɛ̨ą, gáá nwɔ̨nɔ̨ pai Naa tooi a wələ, yai a nwún mąąɓomun, da nwɔ́ Yálá! |