Mąątɛ̨nɛ̨ 42 - Yálá laawoo hɛɓɛ (dc)Nwələ hɛɓɛ vəəlɛ 1 Nwələ ɲɛ̨itɔwɔmun. Kore lonnii di wɔ kiliŋą pono wələ. 2 Bələi Lomą kwąną kpalaa a yá kwɛli la, bələ ɓə gáá ə́ kwɛlii la, Ną́mu Yálá. 3 Yálá ə́ mąą pulu aa ɉón, Yɛ́i a Yálá hvulúmąą. Lə yələ ɓə ŋą́ pai lɔi la, gɛ́ tɔɔ Yálá lííla? 4 Kpinį da hvóló, gáá lɔ ɲɛ̨́iyá hu, gɔ̨nɔ̨n nɔ li, a yələ kəlee; da kɛ kɛi mą́ą́: «Ə́ wɔ Yálái kaa mįnɛ̨?» 5 Ɲələɠaai ŋį́ kɛi li la Yálá yəi bɛlɛ́n, a kwəinɛ̨ɛ̨ wələɠaa, da mąątɛ̨nɛ̨ wələɠaa, kwa nu kpulu kɛnɛ̨, ŋą́ gíliɲąhiɛ di hu, níí a kɛ lɔ ə ɓɛla gwə́i. 6 Níi wolo! Ə́ kaa mąąwɛli hee ɓoi, yɛ́ ə́ woo laa mɛ̨́i, lə mɛ̨nį ɓa? 'Ə́ kilitɔɔ Yálá ɓa! A tɛ̨ą, gáá nwɔ̨nɔ̨ pai Naa tooi a wələ, Yai a Yálá, ɲɛ̨ilain a málo. 7 Nwɔ́ Yálá! Níi mąą aa wɛli gwəi! Yili ɓə gɛi, gɛ́ ə́ təli la, ə həɠə kpɔ Ɉurdɛn lɔi hu, Hɛrmɔn yee nwuɔ̨, da Misearə yee nwuɔ̨. 8 Ɓoloon ɉu yá hvuluunɠaa kaa di gee təlii mɛ̨́i, diɛ kɛlɛ di kee hu! Ɲáhvɛɛ yɛ kulɔ gələn ɉu, mɛ̨́i. 9 Hvóló ɲą, Yai-Laa ə kɛi ɉón a tələnmolaa, kwiihɛ̨ą, ŋą́ kɛi Naa tɛ a wələ woo, gɛ́ Yálá hvɛli, yai tii a nwɔ́ yɛnɛ̨ɛ̨. 10 Gɛ́ ŋą́ kɛ Yálá ɓa: Mą́ą́kɔ̨nwɔ̨ Kwɛni ɓaa a Yɛ́. «Lə ɓə kɛ yaan, yáá lɛ̨ą mą́ą́? Gɛ́ li a ɲɛ̨́imąąwɛliɛ, ɲówóɠaa diɛ hee ɉú?» 11 Gɔ́lɔ́ kəlee aa kpɔną mą́ą́, ɲówóɠaa diɛ nálán, da tuwɔ lɔ kɛi mą́ą́: «Ə́ wɔ Yálái kaa mįnɛ̨?» 12 Níi wolo, ə́ kaa mąąwɛli hee ɓoi, yɛ́ ə́ wóó laa mɛ̨́i, lə mɛ̨nį ɓa? Ə́ kilitɔɔ Yálá ɓa! A tɛ̨ą, gáá nwɔ̨nɔ̨ pai Naa tɛi a wələ woo, yai a nwún mąąɓomun, da nwɔ́ Yálá! |