Mąątɛ̨nɛ̨ 41 - Yálá laawoo hɛɓɛ (dc)1 Nwələ ɲɛ̨itɔwɔ mun. Davidə nwɔ wələ. 2 Nwun nąnɛ̨ɛ̨mun maa, nui a gili lɛɛ mąąwɛli nuą hu! Yai-Laa a gulɔ mɛ̨nįi a mąąwɛli yələ. 3 Yai-Laa a ɲɛ̨i kɛ mą, ə ɓo ɲąąnɛ̨ɛ̨ hu lɔi mɛ̨i; Hva doo ɲowoɠaa di wɔ liipɔtee yee ŋą! 4 Ɓɛlɔwai a kɛ la laani ɲɔ̨n ɉaɠa ɓa, Yai-Laa a ɲee kɛ mą, ɓɛi gaa laa laani, yɛ nąą pɛli a nɛlɛɛ. 5 Ŋą́ kɛi kɛ diɛ: «Yai-Laa, ɲɛ̨́imąąwɛli kaa, Ə́ málo mąąhɔlɔɓo ŋą́ą́ nɛ̨ŋɛ̨n ɉəɠə yɛ́.» 6 Ɲówoɠaa da kɛ náá ɲɔ̨nwɔ̨ɔ̨ ɓoi, di woo laa diɛ: «Mįnɛ̨ lɔwai ɓə gaa pai haai la naa ə kpɛɛ yɛnɛ̨ɛ̨?» 7 Nu ta a pa ną́ą́ kaai, a kɛ giliŋąhiɛi a ɲɔ̨nwɔ̨ɔ̨, liiɲɔ̨ngwəilaa ɓə a kɛ ɉu, a kulɔ, yɛ yili hukulɔ bələ pɔ, gwəli lɔwai. 8 Ɲówoɠaa kəlee ɲąąkpɔn ŋąąi gwɛ́lɛ, diɛ hvaa di nwun ɉu, da kɛ hee ni gwɛ́lɛ, diɛ nwɔ́ mɔ̨nɔ̨i wiɛ pələ kɔɔn. 9 Di woo laa diɛ: «Ɲɔ̨n ɲɔ̨nwɔ̨ɔ̨ ta tii aa yili mą, a nu yee kulɔ mu, mąą nu hva kɛa ɓalo.» 10 Ə mą kɛ, mɛ́lan kɛ gílitɔɔmą, yai kwa yaa ku kɛi ku yee lɔ kɔwɔ tɔ̨nɔ̨ hu, yili aa pɛlɛ mą́ą́ a kɔ́. 11 Kɛlaa ə́ wɛi Yai-Laa, mą́ą́wɛli kaa, 'ə́ múhəɠə; ə gɛ, ŋį́ nwą́ną kulɔ diɛ! 12 Bələi ŋą́ ə́ wɔ wɛlikɛmąąlaa kɔ́lɔn na, bələ ka, ya ɓaa, ɲówó a wala lɔ kɛa bilinmo mɛ̨́i. 13 Nwɛ́i, yáá ə́ yee hee mú, yáá gɔ́lɔi pɔ̨nɔ̨, Ə́ ɲɛ̨i kaa mą́ą́ a yələ kəlee da wɔɔ. 14 Mąąwiɛ ə kɛ Yai-Laa ɓa, yai a Israɛlə nwɔ Yálá, ə lɛɛ lɔ yɛ kɛ tii, a yələ kəlee ɲɛ̨n deei hvo mą! Mįiną! |