Mąątɛ̨nɛ̨ 40 - Yálá laawoo hɛɓɛ (dc)1 Nwələ ɲɛ̨itɔwɔmun, Davidə nwɔ wələ. 2 Ŋą́ą́ Yai-Laa mąąkpɔn, ŋą́ą́ mąąkpɔn a ɉu kwɛa, aa nwəli mąą yɛɛ bɔ́ pələ, aa dómą woo mɛ̨n. 3 Aa gúlɔ ɓoloon ɲɔ̨nwɔ̨ɔ̨ hu, da palayá kpon ɉu kwɛaa hu; ə ɉáŋą ə dɔ́ɔ́, ə gɔ́wɔ́ hvilɛn kwɛni mɛ̨i, ə gɔ́wɔ́ɠaa hukɔlɔ mú. 4 Ə wələ nįnɛ̨ pu ná, a Yálá mąątɛ̨nɛ̨ wələ woo. Nu tamąą kaa pai nąą kaai, di ɲɔw, diɛ di kilitɔɔ Yai-Laa ɓa. 5 Nwun nąnɛ̨ɛ̨mun maa nui a gilitɔɔ Yai-Laa ɓa, yai hva too huɲąŋą kɛnɛ̨ nuą pɔ; da nuąi lɛɛ mɛ̨nį aa di nwun ɉu lan. 6 Yai-Laa nwɔ́ Yálá, mɛ̨nįɠaai yáá giliŋąhiɛ kɛ yɛ hvilɛn na kuɔ, da gwɛlɛɛn mɛ̨nįɠaa, gbɛa kpɛai! Ə́ pɛli hva hɔlɔɓo. Gáá bɔ ŋą́ yili hukulɔ, gɛ́ mo lɔ a yələ kəlee; Kɛlaa, gəlee hva pɛli ɓoi, di tamą pələ ɓa. 7 Haláá hɛn da kɔ́ɓo hɛn lɔpee ta wɛli hva ə́ hon, ə́ nwə́li wolo ɓo, əgɛ, ŋį́ mɛ̨nį mɛ̨n, hvo kɛ haláái da gəlee kələn da nɛ̨ŋɛ̨n mąąhvaalɛɛ haláá, da lɔpee hvɛli li. 8 Nąąlɔwai, ŋį́ mo gɛ́ diɛ: «Ɲą́ą́ ka, ŋą́ą́ pa, a hɛɓɛ́ yili ta yii di bɛ̨ɛ̨ a náá. 9 Nwɔ́ Yálá, yii nwɛli kaa yɛ́, ya ɓə gáá bɔ ŋį́ gɛ, ə́ wɔ tɔ́n kaa níí hu.» 10 Ŋą́ ə́ wɔ tələnmolaa hukulɔ ɲąąkpɔn gɛnɛ̨ɛ̨ hu, Yai-Laa, gbaɠala kaa yɛ́, vá pɛli náá pilɛi. 11 Və́ ə́ wɔ tələnmolaa lɛɛ li gwə́i və́ hee mɛ̨i, bələi yá kulɔ la ə woo ɓa, ŋį́ yili hukulɔ, da ə́ wɔ nu ɓalo mɛ̨nį, və́ ə́ wɔ wɛlikɛmąąlaa da ə́ wɔ tɛ̨ą loo li ɲąąkpɔn gɛnɛ̨ɛ̨ hu. 12 Yɛ́ Yai-Laa, hvə́ ə́ wɔ wɛlikɛmąąlaa mąąkwɛa mą́ą́, ə́ wɔ wɛlikɛmąąlaa da ə́ wɔ tɛ̨ą da di yee kɛ mą́ą́ a yələ kəlee. 13 Mɔ̨nɔ̨ɠaai lonon hvə mą, di kɛi pa laai mą́ą́, nwɔ́ nɛ̨ŋɛ̨nŋąąi daa yɛɛ a nwún, ɲɛ̨́i kəlee aa kpinį mą́ą́, nwún nəɠa lɔ ɓə aa lɛɛ nwúɔ̨, níí aa kulɔ ɉú. 14 Yai-Laa, hvaamą ə́ gúlɔ ɉu, 'pa kilɛ mą́ą́, Yai-Laa. 15 Nuąi kpɔ di hvilɛn ŋąą búlu, diɛi diɛ di vɛ́ɠɛ nwɔ́ yɛnɛ̨ɛ̨ hu, di ɲɛ̨i ə paa a nwumɛ̨. A nuąi kpɔ dóó mɛ̨nį kaa a di liiɓa! 16 Nuąi da kɛ kɛi diɛ: «Ə kɛ yɛ!» Mąą nuąi tii kwəi ə pili diɛ a nwumɛ̨. 17 Yiiɠaai kpɔ di kaa ə́ kwɛlii, yiliɠaai di pili yələi a kwəinɛ̨ɛ̨. Yiiɠaai ə́ wɔ ɓalo mɛ̨nįi wɛli kaa diɛ, diɛ mo a yələ kəlee diɛ kɛ diɛ: «Yai-Laa kɛnɛ̨ɛ̨i.» 18 Ɲą́ą́ ka ŋɛ̨i hɛn və ɲə́i, mą́ą́wɛliɛ, Ną́mu, ə́ kili kɛ ɉú, yɛ́ ɓə yá pɛli mą́ą́kpɔnn mąąɓoi, yɛ́ málo; nwɔ́ Yála, hvó lamun. |