Mąątɛ̨nɛ̨ 38 - Yálá laawoo hɛɓɛ (dc)Ɉɔ́n aa kɛnɛ̨ aa tɛɛ nwún ma 1 Davidə nwɔ Yálá mąątɛ̨nɛ̨ wələ yɛ gili lɛɛ la Yálá kɛ mɛ̨nį hu. 2 Yai-Laa hvó ɉón a líikələn gwəilaa! Ɉútɔɔ a wɛlikɛmąąlaa. 3 Yɛ́ mɛ̨ɛ̨kɔwɠaai daa pu mɛ̨́i, gɛ́lɛi ə́ mo, ə́ yee kpolo aa gúlɔ. 4 Ə́ wɔ líiholii aa kulɔ ną́ą́ kəlee, aa gbóną. A tɛ̨ą, gɔ́w kəlee kponąąi ɉú, a gɛ́ nɛ̨ŋɛ̨n naa pɔɔ! 5 Mąąhɔlɔɓo, ɉɔ́n aa kɛnɛ̨ aa tɛɛ gbínį ɓa, nwiɛ yee aa tɛɛ mą́ą́. 6 Nwɔ́ ɓowo mɛ̨nį aa gɛ, gɛ́lɛ palaɠaa mu aa tɔɔ, gun yɛ tɛ. 7 Aa níí too pulu, víi aa kpɛɛ, ɉú aa haa, gáá lɔ kɛa a gɔ́lɔ́ haa mą́ą́ a yələ kəlee. 8 Ɉú hvulaai yɛ nwɔ̨n a kɛ ɉɛ̨́ą, ɉúwɔ hu kəlee ɲąąnwąnąąi. 9 Vínna aa tɔn, ɉú aa haa, níi yɛ too gwə́i, gɛ́ ɲįŋɛ̨. 10 Ną́mu Yálá! Níiɓa mɛ̨nį kəlee kaa ə́ ɲɛ̨i ɓa. Ɲį́ŋɛ̨ woo hvo loo li yɛ́. 11 Níi kaa kɛlɛi gwə́i, hvaŋą aa kpɛɛ ɲə́i, ɲɛ̨́i yɛ tɛɠi mą́ą́. 12 Nwə́likɛmąą nuą, da nɛ̨́ɛ̨́yɔwɔɠaa, daa di mąąkwɛa nwóólaa woo ɓa, ŋą́ nuą daa di mąąkwɛa mą́ą́. 13 Nuąi di hvilɛn ŋąą nwɔ́ yɛnɛ̨ɛ̨ pulu, daa hɛlɛn dɛ dɔ́wɔ́, diɛ ɉúkala mɛ̨nį ɓo. 14 Ɲą́ą́n, yɛ wəliwolomun, və́ mɛ̨nį ta mɛ̨n ɉi, gáá yɛ muugbɛ, və́ kpɛli nááɓoi. 15 Gáá yɛ nui hva mɛ̨nį mɛ̨n, yɛ, nui mɛ̨nį hutoo laaləi hvo mą. 16 Yai-Laa! Yɛ́ lɔ ɓə gílitɔɔ yɛ́! Ną́mu Yálá! Yɛ́ lɔ ɓə pai nwóó mu hon ɉi! 17 Ŋą́ kɛ yɛ́: «Nuąi di líiɓa ɓaa dóó mɛ̨nį, 'hvó gɛ́, a di wɔ yɛlɛkulɔɉu hɛn, ɓɛlɔwai ŋą́ gɔ́wɔ́ tuwɔ la.» 18 Ɲą́ą́ ka vúluun ŋąą gɛ́ li tooi, nwɔ́ mɔ̨nɔ̨i ka, kpɛɛ hvo mą háákələi. 19 A tɛ̨ą, ŋą́ą́ ɉɔ́n gɛ, gɛ́ nɛ̨ŋɛ̨n mąą liihɛlɛn aa too mą́ą́. 20 Ɲówóɠaa di wɔ yɛnɛ̨ɛ̨ kaa di yəi, di hvaŋą kɛnɛ̨, nuąi nwɛ́likpɛɛ diɛ, diɛ ɓaɠaɓo mąą, di tamąąi. 21 Nuąi da gɛ́-mɛ̨inɛ̨ɛ̨ kwələ kulɔ a ɲɔ̨nwɔ̨ɔ̨, hvilɛn ŋį́ mo mɛ̨nį lɛlɛɛ pulu, daa ɓaɠaɓo mą́ą́. 22 Yai-Laa, hvó ə́ kili kulɔ ɉú! Nwɔ́ Yálá! Hvó tɔɔ kwɛaa la! 23 'Pa kilɛ ɉa, Ə́ kpɔnmąą tɛɛ bɔ́! Ną́mu! Yɛ́ lɔ ɓə a málomun! |