Mąątɛ̨nɛ̨ 35 - Yálá laawoo hɛɓɛ (dc)Kwəi kwələmun daa hvilɛn bulu nwɔ Yálá hvɛli woo 1 Davidə nwɔ wələ woo. 1 Davidə nwɔ wələ woo. Ee kə Yai-Laa! Nuąi ɉɔ́n moi, 'di hɔn nɛ, nuąi kɔ́ pɛlɛi mą́ą́, 'kɔ́ pɛlɛ diɛ. 2 Gɔ kɔ́ hɛnŋąą həɠə, da gɔ́ kɔ́ kpalaɠaa, 'Ə́ muhəɠə, 'ə́ mą́ą́kpɔn mąąɓo! 3 'Ə́ wɔ kpalai kulɔ daa hu, nuąi di hvilɛnŋąą búlú, pələ too di tɔwɔ. 'Kɛ́ mą́ą́: «Gáá a ə́ ɓalomun!» 4 Nuąi di hvilɛnŋąąi nwɔ́ yɛnɛ̨ɛ̨ pulu, nwumɛ̨ ə di ɲɛ̨i paa, di ɓɛlɛ ə too! Nuąi di kiliŋąhiɛi mą́ą́ a ɲɔ̨nwɔ̨ɔ̨, ɓáá ə kulɔ diɛ! Di li di pulu pələ a nwumɛ̨. 5 Di kɛ yɛ mɔ̨nun gala, hvaŋą yəi, a ɓɛlɔwai Yálá nwɔ malakai a hee la di hu. 6 Di tɛɛ pələɠaa hu ə kpinį, nįmįnįn ə pɛlɛ ɉu, ɉu ə lala, ɓɛlɔwai Yai-Laa nwɔ malakai, a kɛ di kpɛi la. 7 Di lɔwa tee dɔ́wɔ́, di mɛ̨i kpulu, yaan, ɉɔ́n və ɉu, dee nwun və kɛ mą, di dee kpɔlɔ náá ɓa. 8 Nu kala mɛ̨nįi ɲɔ̨nwɔ̨nmąn və ta kɛli, 'ə həli diɛ, di tɛɠii, ɉɛlɛn diɛ kpinįi di dɛ, 'di kɔ́ la, 'di nwun ə lɛɛ mɛ̨nį ɲąąnwąnąąi tii hu. 9 Nąąlɔwai, gáá pai pilii yələi a kwənɛ̨ɛ̨, Yai-Laa laa hu, gɛ́ mąną a kwəinɛ̨ɛ̨ málo mɛ̨nį ɓa. 10 Ną́ą́ kəlee yɛ kɛ diɛ: «Gbɛɛ ɓə gaa yɛ, yɛ́, Yai-Laa? Yá kpɔwɔ mąąyɛɛmun gulɔ ɲee tɛɛmąąmun ɲəi, yɛ́ mąąwɛlimun, da yeehvowolomun gulɔ, di laanɔ̨nwɔ̨ɓomun ɲəi.» 11 Lɛɛ kɛla hvaa ɓo nuą daa di muhəɠə, mɛ̨nįi və́ ɉu kɔ́lɔn, diɛ mą́ą́nikɛ mą. 12 Ŋą́ mɛ̨inɛ̨ɛ̨ kɛ diɛ, diɛ gwələ kulɔ a mɛ̨nį ɲɔ̨n, ɲą́ą́ dɔ̨nɔ̨ ka kɛa, ŋą́ą́ lɛɛ. 13 Ɓɛlɔwai di kɛ la ɲɔ̨n ɉu, ŋį́ kɛi mąąwɛli heeɓo, gɛ́ hin nɔ, gɛ́ Yálá hvɛli gwə́i pələ. 14 Ŋį́ kɛi lɔ tɔɔ ɲɔ̨ɔ̨-ɲɔ̨ɔ̨, yɛ bələi nu a gɛ la mɛlanmun da mąą mɛ̨nį hu, awala kɛ tii, neelon mąą mɛ̨nį hu, yɛ néé a haa, ɲɛ̨́i mąą mą́ą́wɛliɛ. 15 Kɛlaa tooi ŋį́ mo, di di ɲąąkpɔn, diɛ pili yələi a kwəinɛ̨ɛ̨, diɛ di keeni ɲąątɔɔ mą́ą́, nwɛ̨ąą diɛ náá nɔ̨nwɔ̨ɔ̨ ɓo, və́ kɛ nwun gɔlɔn. 16 Daa mą́ą́tinɛ̨n, nu mąąluɓɛɛɠaai tii, a ɲɛlɛ kulɔɉu nuąi tii, di kaa di laa hvanąi a ɲą́ą́. 17 Yai-Laa, ə́ kaa lɔ nąą kaai ɓəi? Nwɔ́ yɛnɛ̨ɛ̨ kulɔ mɔ̨nɔ̨ kɛnɛ̨i ɲɛ̨i hu wɛ! 'Gúlɔ ɲalaɠaai ɲɛ̨i yəi. 18 Yá gɛ tii, ŋą́ ə́ hɛɠɛɛɓo ɲąąkpɔn gɛnɛ̨ hu, gɛ́ ə́ mąątɛ̨nɛ̨ nu kpulu kɛnɛ̨ ɲɛ̨i ɓa. 19 Nuąi hvaa pɛlɛi mą́ą́ a wɛa, 'və́ kɛ a di kwəinɛ̨ɛ̨ hɛn, nuąi yowolaa kulɔi a ɲą́ą́ lɔ kpɛli kpɛli, 'gɛ́, di hvo di ɲɛ̨i yalimą di kee lɔwai mą́ą́ mɛ̨nį hu. 20 Líilaa woo hvo ta kulɔ li di la, nɔi lonnii yiiɠaai di wəli pulu laɠiɛi, yiliɠaai ɓə da kɛ di laa mąąhiɛi a lɛɛ pɛlɛɛ di nwuɔ̨, a yələ kəlee. 21 Daa di laaləi kpɛa kpɛaɠaai tii hee mą́ą́, diɛ kɛ diɛ: «Hiyoo! Gaa mą! Gaa mą! Yii lɔ kwaa gaa.» 22 Ə́ kaa nąą kaai? Yai-Laa! 'Hvó ə́ wəli laa kpulu, Ną́mu Yálá, hvó ə́ mąą kwɛa mą́ą́. 23 'Ə́ ɲįnąąɓo, 'ə́ muhəɠə, 'nwɔ́ tɛ̨ą mąąkɔ̨nwɔ̨, 'ə́ nwɔ́ tələnmolaa too pɔ̨nɔ̨ ɲą yɛ́i a nwɔ́ Yálá, da Ną́mu! 24 'Nwɔ́ tɛ̨ą mąąkɔ̨nwɔ̨, ə́ wɔ tələnmolaa hu, Yai-Laa, nwɔ́ Yálá, və́ kɛ di yəi lɔ, a di wɔ yɛlɛ kulɔ ɉu hɛn. 25 Di hvo pɛli kɛi di kee ɓa: «Ya ka! Ya ka! 'Ka gu gu yee kpɛlaan nɔ la tanɔ̨n», Mąą hvo nɛ̨ɛ̨li kpɔ di hvo kɛ diɛ: «Ku yee aa pɛli mą.» 26 Nuąi kpɔ nwɔ́ mɔ̨nɔ̨ kaa a di kwəinɛ̨ɛ̨ mɛ̨nį, 'nwumɛ̨ ə gəlee ɲɛ̨i paa a gee! Nuąi kpɔ tii kɛi di nwun dɛ, nwumɛ̨ da ɓáá-kulɔmąą, ə kɛ a di mąą həɠə! 27 Kɛlaa nuąi kpɔ kɛ nwɔ́ tɛ̨ą mɛ̨nį pɔ, ɓáá ə lɔ diɛ, diɛ pili yələi a kwəinɛ̨ɛ̨, diɛ mo a yələ kəlee, diɛ kɛ diɛ: «Yai-Laa kɛnɛ̨i, ya ɓə hvaa mą, ɓáá ə lɔ nwɔ tímun ma nwun na yɛ nɛ̨ɛ̨.» 28 Nɛ̨́n a yɛ́ tələnmolaa hukulɔ, nááləi yɛ ə́ laa tɛ, a yələ kəlee da nwɔɔ. |