Mąątɛ̨nɛ̨ 34 - Yálá laawoo hɛɓɛ (dc)1 Davidə nwɔ wələ. Ɲələi Davidə ə gbɔwɔ kɛ la a ɓowomun Abimelɛkə ɲɛ̨i ɓa, yili yɛ gbɛ, Davidə yɛ həɠə laa. 2 Gáá Yai-Laa laa mąąwiɛi a yələ kəlee, mąątɛ̨nɛ̨ woo hva kpɛɛ ná. 3 Gwə́i kpɔ-kpɔɔ nɛ̨ɛ̨i Yai-Laa mąą mɛ̨nį ɓa, kpɔwɔ mąą yɛɛ nuą, ka nwóó mɛ̨n, 'ka kwəinɛ̨ɛ̨ kulɔ. 4 'Ka lɛɠɛ mą́ą́, ka gu Yai-Laa mąątɛ̨nɛ̨! 'Ka gu naa tɛ a gee. 5 Ŋą́ tínɛ̨n Yai-Laa pɔ pələ, ə nwóó mu hon; ə gúlɔ mą́ą́ɲɔw mɛ̨nįɠaa kəlee hu. 6 Nuąi da di ɲɛ̨i tinɛ̨n Yai-Laa pɔ pələ, di ɲɛ̨i a pɔ̨nɔ̨; nwumɛ̨ hva kɛa tɛ diɛ. 7 Ə mą kɛ mąąwɛlimun mə, a Yai-Laa təli lɔ, aa mąn nwoo mu hon, yɛ gulɔ ganąn mɛ̨nįɠaa hu. 8 Yai-Laa nwɔ malaka kaa tɔɔni, nuąi da ɲɔw mą di kwɛlɛ, ɛlɛɛ, yɛ di kulɔ mɛ̨nįi. 9 'Ka ka ɲɛ̨i hee tai, ɛlɛɛ, bələi Yai-Laa nwɔ mɛ̨inɛ̨ɛ̨ kaa la, ka gaa! Nui a mąąkilɛ vaŋąn mu, nwun na nɛ̨ɛ̨i ɓə! 10 Kaai a Yai-Laa nwɔ nu mąąhəɠɛɛɠaa, 'ka kwɛli hvilɛn mą a ɲɔw mąą laa; Mąąhɔlɔɓo, nui a ɲɔw mą, kanąn va hee mą. 11 Yalaɠaa da hvɛɠɛ, di pulu həɠə, Kɛlaa, nuąi da Yai-Laa kwɛli, di hva hvɛɠɛ a hɛn nɔpee ta. 12 Nónnii, 'ka pa ka ka wəli tɔɔ nwóó ɓa, bələi mąąnɛ̨ɛ̨ nu ə ɲɔw la Yai-Laa ɓa, ŋį́ bələ lɛ kaa. 13 Gbɛɛ ɓə lamun yɛnɛ̨ɛ̨ wɛli kaa mą? Gbɛɛ ɓə gaa bɔ ə nwunnąnɛ̨ɛ̨ yɛnɛ̨ɛ̨ kaa? 14 Mąą nu ə nɛ̨n ɉon gan mɛ̨nį ɲɔ̨n dɔwɔ, ə ɲee kɛ naaləi ɓa, hvo laa mąąhiɛ kɛ. 15 Ə túwɔ́ pələ ɲɔ̨n mąą laa, ə túwɔ́ a nɛlɛɛ, hvilɛn líilaa pulu, ə ɲąąkɔn. 16 Yai-Laa a ɲɛ̨i lɛlɛɛ hee tələnmo nuą diɛ, nwəli tɔɔ di woo ɓa. 17 Yai-Laa a kɔ́ pɛlɛ mɛ̨nį ɲɔ̨n gɛ nuą diɛ, əgɛ, ə di laa kili kpɛɛ nuą ŋą. 18 Tələnmo nuą da wɔlɔ, Yai-Laa a di wɔlɔ woo mu hon, yɛ di kulɔ di kanąn mɛ̨nįɠaa kəlee hu. 19 Nuąi di lii yaliɛ di kwəi, Yai-Laa a mąąlɛɠɛ diɛ, nuąi di hviikpɛɛ kɛnɛ̨, a di nįilɔ. 20 Mɔ̨nɔ̨ tamąą da hee tələnmomun ma, Kɛlaa, Yai-Laa a gulɔ gəlee hu. 21 A ɲɛ̨i kɛ gɔw kəlee ɓa, danɔ̨n gbɛli hu hva yali. 22 Mɛ̨nį ɲɔ̨n mə pai líiɲɔ̨n gwəimun baai, nuąi da yowolaa kulɔ a Tələnmolon, di kaa pai gulɔi di hu. 23 Yai-Laa a nwɔ tínuą di wɔ yɛnɛ̨ɛ̨ nwun mąąɓo, nuąi kpɔ da di kilitɔɔ mą, hutɔɔ hvo da ɓa. |