Mąątɛ̨nɛ̨ 33 - Yálá laawoo hɛɓɛ (dc)1 Tələnmo nuą! 'Ka ka yee lɔwa Yai-Laa ɓa! Mąątɛnɛ̨ woo mąąnɛ̨ɛ̨ nu haŋąąɠaa la. 2 'Ka Yai-Laa hɛɠɛɛɓo a bɛlɛgwəi! 'Ka gwɛnįn nwoo nɛ̨ɛ̨ yɔw naa hu. 3 'Ka wələ nįnɛ̨ too mą, 'ka mąątɛ̨nɛ̨ a hvɛli, 'ká gɛ kpɔ a ka nwąnąi. 4 Mąąhɔlɔɓo, Yai-Laa hvaa woo haŋąąi, gɛ mɛ̨nįɠaa kəlee kaa a tɛ̨ą. 5 Tələnmolaa da tɛ̨ą di wɛli kaa Yai-Laa ɓa, lɔi laahvɛɛi a Yai-Laa yəi mɛ̨inɛ̨ɛ̨. 6 Yai-Laa ə yələkɔlɔn bɛli a naa woo, ə ɉu hɛnŋąą kəlee kɛ lɔ a naa wəleen. 7 Ə gboloyá pili gee mɛ̨i, ə ɲɛ̨n naa, ə gboloyáɠaa lɛɠɛ gee ɓa ɓoloon gbɛa kpɛaɠaa hu. 8 Lɔi nąą kəlee ka ɲɔw Yai-Laa ɓa, yɛnɛ̨ɛ̨ nuą kəlee diɛ kpɛlin dɔwɔ. 9 A mɛ̨nį ɓo lɔ, bɔ mɛ̨nį ə kɛ, ə kɛ lɔ diɛ: «'Ka kɛ», gəlee daa mą kɛ. 10 Yai-Laa ə lɔiɠaa kwəi kiliɠaa hukala, mɛ̨nįɠaai nuą di mąąkili tee di kwəi, ə di lɛɛ a kpɛli. 11 Yai-Laa kwəi kili kaa lɔ a yələ kəlee mɛ̨nį, mɛ̨nįɠaai a mąąkili tee gwəi, kwɛlan gəlee mɛ̨nį li. 12 Nɔi Yai-Laa kaa a nwɔ Yálá, nwun na nɛ̨ɛ̨ lɔi li, nu huwui ə ɉəɠə ɉu a gwɛlin, nwun na nɛ̨ɛ̨i! 13 Yai-Laa a lɛɛ yələkɔlɔn ɉu, ə ɲɛ̨i hee, yɛ nu kəlee kaa. 14 Ɓɛi nwɔ tɔɔ kpəlin kaa laa, a lɛɛ laa, yɛ lɔi mɛ̨i nuą kəlee mąąkpɛɛ. 15 Ya ɓə nu tɛi tɛi kili pɛli, yɛ di kɛ mɛ̨nįɠaa kəlee hu kaa. 16 Kɔlaɠa kɛnɛ̨ hvəi a tɔɔmun nwun gulɔ mɛ̨nįi, huwalawalalaa kɛnɛ̨ hvəi a kuláá kulɔ mɛ̨nįi. 17 Hoo hvəi a kɔ́ nɛ̨ɛ̨ nu ɓa, vaŋą ə mą kɛnɛ̨, hva pɛli pui. 18 Kɛlaa, nuąi da ɲɔw Yai-Laa ɓa, a ɲɛ̨i kɛ diɛ, a nuąi di kilitɔɔ nwɔ wɛlikɛmąąlaa ɓai. 19 A di kulɔ haa yəi, yɛ di laa hɔn mo yɛnɛ̨ɛ̨ a pulu yələɠaa. 20 Ku wɛi, ku ɲɛ̨i kaa Yai-Laa tɔwɔ, yai a ku mąąkpɔn mąąɓo, yɛ ku mąąkpɛ. 21 Ya ɓə gaa a ku wɔ kwəinɛ̨ɛ̨ nwun, Naa mąąhəɠɛɛ ɓə ku kilitɔɔi mą. 22 Yai-Laa, ə́ wɔ wɛlikɛmąąlaa ə kɛ ku mɛ̨i; yɛ bələi ku kilitɔɔi la yɛ́i. |