Mąątɛ̨nɛ̨ 31 - Yálá laawoo hɛɓɛ (dc)1 Nwələ ɲɛ̨itɔwɔ mun, Davidə nwɔ wələ hɛɓɛ́. 2 Yai-Laa yɛ́ ɓə ŋą́ mąąkilɛ ə́ hvaŋąn mu, nwumɛ̨ hva tɛ a ɲą́ą́! Ə́ wɔ ɲɛ̨imąąwɛli kaa hu, nwún mąąɓo 3 'Ə́ wəli tɔɔ nwoo ɓa, nwún mąąɓo ɉa-ɉa; kɛ́ a mą́ą́kpɛ kwɛni walawalaa, a málo pɛlɛ́ walawala. 4 Yɛ́ a mą́ą́kpɛ kwɛni da nwɔ́ taa wala wala; ə́ kaa pai dɛ̨́nɛ̨n dɔɔi, ə́ laa mąąwiɛ mɛ̨nį ɓa. 5 Maaləi da dɛ dɔ́wɔ, yá gulɔ ɉu, mąąhɔlɔɓo, yɛ́ a mą́ą́kilɛi. 6 Gáá nį́i lɛɛi ə́ yəi, yáá nwún mąąɓo, Yai-Laa yɛ́i a tɛ̨ą Yálá. 7 Yiiɠaa da hvilɛn kpɛli kpɛli hɛnŋąą pulu, di wɛli hvo mą́ą́, nwɛ́i, ŋą́ gílitɔɔ Yai-Laa ɓa. 8 Gáá pai mąnąi a kwəinɛ̨ɛ̨, ə́ wɔ tələnmolaa mąą mɛ̨nį ɓa, mąąhɔlɔɓo yáá nwɔ́ mɔ̨nɔ̨i kaa, da mą́ą́wɛli pələ. 9 Hvó nɛ́ɛ́li ɲówo ta yəi, yáá dɔ́ɔ́ kɛɛnąą pɔ̨nɔ̨ɔ̨ ɓa, hvaŋą laɠi yɛ pu mą́ą́. 10 'Mą́ą́wɛli kaa Yai-Laa, mɔ̨nɔ̨ aa lɔ bɔ́, liikələn gwəi aa ɲɛ̨́i kɔ́w kpɔlu, gwą́ną aa kpala, níi mɛ̨i aa kələn. 11 Nwɔ́ yɛnɛ̨ɛ̨ ɲąą kaa kpɛɛi liikələn gwəi hu, nwɔ́ kwɛlanŋaai diɛ kpɛɛ ɲįn-ɲąmįi hu; gɛ́ nɛ̨ŋɛ̨n mąą mɛ̨nį ɓa, hvaŋą aa kpɛɛ ɲə́i. Yɛ gɔ́wɠaa mįi ɉú pələ. 12 Ɲówoɠaa kəlee kaa nálan ɉii, ə mą kpɛli, kɛ ɉéé yɔwɔɠaa, ŋą́ą́ kɛ a mą́laa mąąɲɔw hɛn, da gáá lɔ kwəli pɔ, diɛ pu. 13 Da lɛ̨ą mą́ą́, yɛ haamun, yɛ haamuŋ gili aa kpɛɛ nuą ɲą gɛ́ pələ kaa lɔ kɛa yɛ pili hɛn. 14 Náá kala nuą woo kaa tooi nwə́lii, yili yɛ gwɛ́lɛ nuą mąąɲɔw; daa pɛli mɛ̨nį tɔ̨nɔ̨ hu náá ɓa, diɛ di nwundɔɔ a mą́ą́ mɛ̨nį, diɛ di nwɔ́ yɛnɛ̨ɛ̨ kulɔ ɲə́i. 15 Kɛlɛɛi Yai-Laa, gílitɔɔi yɛ́, ŋą́ kɛ diɛ: «Yɛ́ ɓə a nwɔ́ Yálá.» 16 Nwɔ́ hvólóɠaai kaa ə́ yee ŋą, 'gulɔ ɲówoɠaa yəi. 17 'Ə́ ɲɛ̨i lɛlɛɛ hee ə́ wɔ tímun ma, 'málo, mąąhɔlɔɓo yá kulɔ ə́ woo ɓa. 18 Yai-Laa, ə́ təlii gáá moi, və́ nwumɛ̨ ɉu, Kɛlaa, nwumɛ̨ ə lɛɛ a nuąi di hva ə́ mąąwiɛ di wɔɔ; di laa pɛlɛ mą, diɛ yɛɛ ɲąmuątaa pələ. 19 Nɛɛ laaləiɠaai tii, di pɛlɛ mą diɛi tii da hvaa Tələnmolon ɉu, a tɛɠɛɓo ɉu, a ɲɛ̨i tɛ, a ɓɛlɛkpɛɛmąąlaa. 20 Mɛ̨inɛ̨ɛ̨ɠaai yáá ɉee ə́ ɲɔw nuą tɔwɔ, gɛnɛ̨i nuąi da di mąąkilɛ ə́ pɔ pələ, diɛ ɓə yá gɛ diɛ, nu kəlee ɲɛ̨i ɓa. 21 Yáá di loo, ɓɛi ə́ ɲɛ̨i lɛlɛɛ heɛ lai, mąą kwɛaa nuą di wɔ gbąnąlaa mɛ̨nįɠaa diɛ, yáá di loo, nu nɛ̨n nwɔ kɔɠaai tɔwɔ. 22 Mąąwiɛ kaa Yai-Laa ɓa, mąąhɔlɔɓo gulɔ mɛ̨nį nwoo ɓa aa kpalo mɛ̨nį kɛ mą́ą́, kɔ́ taa kɛnɛ̨ɛ̨ hu. 23 Ya pa, ɲą́ą́n gwə́i pilɛɛi kɛ mą́ą́, gɛ́ kɛ diɛ; «Yáá mą́ą́kwɛa ə́ ɲɛ̨ilai ɓa.» Kɛlaa, nwɔ́ hvɛli woo mąąwɛliɛi, ə́ mu hon, ɓɛlɔwai ŋį́ tomą la ə́ pɔ pələ. 24 Kaai a Yai-Laa yee pɔ nuą, 'ka nwɛlilakɛ! Nuąi kpɔ Yai-Laa aa di kulɔ mɛ̨nįi; Kɛlaa nui a tɛɠɛɓoɉu, a gwələ kulɔ a ɲəi ɓɔ pələ ɉu. 25 'Ka tɔɔ a nwala wala, 'ka ka liikpələ, kaai kpɔ tii ka kilitɔɔ Yai-Laa ɓai. |