Mąątɛ̨nɛ̨ 30 - Yálá laawoo hɛɓɛ (dc)

Yálá hɛɠɛɛɓo wələ

¹ Nwələi di doo a ɲələi di kɛi lúwɔ too la Davidə nwɔ pɛlɛ́ ɓa.

² Gáá ə́ laa tɛi Yai-Laa, mąąhɔlɔɓo yaa ə́ yee pu mú, Hvó ɲówoɠaa lɛɛ li laa diɛ yɛlɛ kulɔ ɉú.

³ Yai-Laa nwɔ́ Yálá! Ŋą́ tomą ə́ pɔ pələ, yɛ́ ɓə málo.

⁴ Yai-Laa, yáá nį́i kulɔ ɲąmuątaa yəi, yɛ́ ɓə pənə ə́ nɔ̨ɔ̨ too ɉú, ɓɛlɔwai ŋį́ kɛi yɛɛ laa kámąi.

⁵ Kaai a Yai-Laa yee pɔ nuą, 'ka naa tɛ wələ too, 'ka mąątɛ̨nɛ̨, kaa nwɔ mąąhəɠəlaa hukulɔ pɔ̨nɔ̨ ŋą.

⁶ Mąąhɔlɔɓo, nwɔ liiholi kaa lɔ a hvoló tɔ̨nɔ̨ mɛ̨nį, Kɛlaa, nwɔ wɛlikɛmąąlaa kaa a yələ kəlee mɛ̨nį, hvitili a pa a wɔlɔ, yələwala yɛ pa a kwəinɛ̨ɛ̨ wələɠaa.

⁷ Ɛlɛɛ nwɛ́i, ŋą́ kɛ kpɔ a nwə́li pulu laɠiɛ, gɛ́ kɛ diɛ: «Hɛn da lɔpee hva mąąkpɛlin.

⁸ Yai-Laa, ə́ wɔ wɛlikɛmąąlaa, aa gɔ́wɔ́ hvilɛn yee walawalaɠaa mɛ̨i.» Kɛlaa, ə́ ɲɛ̨i looi ə́ mo mą́ą́, ə ɉú pu mą́ą́.

⁹ Yai-Laa, ŋį́ ə́ toli, Gɛ́ Ną́mu mąąnɛ̨ɛ̨, gɛ́ kɛ:

¹⁰ Tɔlɔ lə kɛɛ kpɔ ɓə yá ɉɔlɔɓo ɲą́mą hu, a ɲɛ́ɛ́ mɛ̨nį kámą hu? Muluun a pɛli mɔ̨ɔ̨ ə́ hɛɠɛɛɓoi? A pɛli mɔ̨ɔ̨ ə́ wɔ wɛlikɛmąąlaa hukulɔi?

¹¹ 'Ə́ wəli tɔɔ nwóó ɓa Yai-Laa! Nɛ̨ɛ̨ yɛ́! Yai-Laa, kɛ a mą́ą́kpɔn mąąɓomun.

¹² Yáá nwɔ́ haa wɔlɔi mąą pənə a mąną, yɛ́ nwɔ́ ɓíi haɠai mąą pənə a hɛli-həɠə.

¹³ Yili mąą mɛ̨nį ɓa, nį́i kaa ə́ laa tɛi a wələ, vį́i hva kpɛɛ yili hu; Yai-Laa nwɔ́ Yálá, gáá lɔ pai kɛi ə́ mąątɛnɛ̨ mɛ̨nį hu a yələ kəlee.