Mąątɛ̨nɛ̨ 28 - Yálá laawoo hɛɓɛ (dc)1 Davidə nwɔ wələ woo. 1 Davidə nwɔ wələ woo. Yai-Laa, gáá ə́ təli, mą́ą́ kɔ́nwɔ̨ kwɛni, hvó ə́ kili kulɔ ɉú, akɛ yá wala hvaa nwóó mu hon, gɛ́ pələ a kɛ yɛ nu a kɛi pa haai. 2 Ə́ mąąnɛ̨ɛ̨i gáá moi, ə́ wəli tɔɔ nwóó ɓa, ɓɛlɔwai gáá tomąi la ə́ pɔ pələ, gɛ́ ɲéé tɛ ə́ pɔ pələ, ɓɛi ə́ kaa laa ə́ wɔ pɛlɛ́ mąąhəɠɛɛi mui. 3 Hvó ɉón yɛ bələi yá liiɲɔ̨n gwəi nuą hon nai, ə mą kɛ, túwɔ́ pələ ɲɔ̨n gulɔ nuą, da kɛ liilaa mɛ̨nį ɓoi di ɓɛlaa diɛ, Kɛlaa, di lii laa hvɛɛ a mɛ̨nį ɲɔ̨n gɛ kili. 4 'Di hon yɛ bələi di túwɔ́ pələ kaa lai, da di wɔ kɛɛ kala pələ; 'di hon yɛ bələi da mɛ̨nįɠaa kɛ lai, di kwəi kili gulɔmąą kɛ diɛ. 5 Di hva di kiliŋąhiɛ Yai-Laa kɛ mɛ̨nįɠaa diɛ, ə mą kɛ, ɉɛnŋaai ə bɛli, di too, di hvo kɛa pənə hvo di muhəɠə. 6 Lúwɔ́ kɛ Yai-Laa ɓa, mąąhɔlɔɓo aa nwəli tɔɔ nwóó ɓa. 7 Yai-Laa ɓə gaa a mą́ą́kɔ̨nwɔ̨ hįi, da mą́ą́kpɛ hémé; ŋą́ gílitɔɔ mą, ə mą́ą́kpɔnmąą ɓo, gáá pilii yələi a kwəinɛ̨ɛ̨, gɛ́ ɉɛɠɛɛɓo a wələ. 8 Yai-Laa ɓə a nwɔ nu huwui di wɔ huwalawala, a nui ə ɉəɠə ɉu, mąąkpɛ taa wala wala. 9 'Ə́ wɔ nuąi nwun mąąɓo, lúwɔ́ too ə́ kwɛlin ma, 'kɛ a di mɛ̨i kaamun, ə́ ə́ yee kɛ diɛ a yələ kəlee. |