Mąątɛ̨nɛ̨ 26 - Yálá laawoo hɛɓɛ (dc)

Kwəi kwələmun nwɔ Yálá hvɛli wələ

1 Davidə nwɔ wələ woo.

¹ Davidə nwɔ wələ woo. Yai-Laa, mą́ą́ tɛ̨ą ɓo, mąąhɔlɔɓo, gáá hiɛi a kwəi kwələlaa, ɛlɛɛ, yii kpɔ gílitɔɔ Yai-Laa ɓa, vá tɔɔ takpa takpa.

² 'Mą́ą́kpɛɛ, Yai-Laa, 'ɉú kɔ́ɔn, níí da gwə́i 'di hu kaa, nwɔ̨n ma.

³ Yá kulɔ ə́ woo ɓa, gíli kaa yili hu. Gɛ́ hiɛ ə́ wɔ tɛ̨ą pələi mɛ̨i.

⁴ Və́ li lí və́ hee hvuluɓɛlaa lɔwai, və́ bɔ və́ lɔ tɛɲɛ́i kɛ nuą? Yəi bɛlɛ́n.

⁵ Mɛ̨nį ɲɔ̨n gɛ nuą di wɔ kpɔn, mɛlɛ hvo gwə́i, Və́ gɛ və́ hee nu ɲɔ̨wɔ̨ɔ̨ɠaa lɔwai.

⁶ Gáá ɲə́i waai, gɛ́ nwɔ́ kwəi kwələlaa lɛ la, əgɛ, gɛ́ pɛli kɛa haláá kulɔi yɛ́ Yai-Laa.

⁷ Gɛ́ ə́ hɛɠɛɛɓo wələ too, gɛ́ ə́ kɛ mɛ̨nį ɲɛ̨i kɛnɛ̨ɛ̨ɠaa hu kulɔ.

⁸ Yai-Laa, yɛ́ pɛ́lɛ́i tii ə́ kaa mu, nwɛli kaa mą́ą́, da ɓɛi ə́ wɔ mąąwiɛ kaa laai.

⁹ 'Hvó nwɔ́ yɛnɛ̨ɛ̨ too nɛ̨ŋɛ̨n ɉəɠə nuą di wɛi pɔ, 'hvó kwa nu paa nuą ku pɛlɛ ku kee ɓa.

¹⁰ Hɛn ɲɔ̨nwɔ̨ɔ̨ kaa di yəi ɲą, di ɓa-mįi-yee laa hvɛɛi a nu hu kala mɛ̨inɛ̨ɠaa.

¹¹ Nwɛ́i, gáá bɔ ŋį́ hiɛ nwɔ́ kwəi kwələlaa hu, 'volóonnaɓo, yɛ́ wɛlikɛmąąlaa haalai.

¹² Gɔ́wɔ kaa pələ hąŋąą mɛ̨i, Yai-Laa, gáá pai kɛi ə́ laa tɛi ɲąąkpɔnŋaa hu.