Mąątɛ̨nɛ̨ 25 - Yálá laawoo hɛɓɛ (dc)Nu gaa kpaan mɛ̨nį hu, 'ə naa həli Yálá ɓa 1 Davidə nwɔ wələ woo. 1 Davidə nwɔ wələ woo. Yai-Laa, ə́ pɔ pələ ɓə ŋą́ ɲéé haŋąn na. 2 Nwɔ́ Yálá, yɛ́ ɓə gílitɔɔ ɓə yɛ́! Hvó ɲɛ̨́i hvala! Ɲówóɠaa di hvo pa hee mɛ̨́i! 3 Nui a gilitɔɔ yɛ́, nwumɛ̨ hva tɛ la, nu ɓowo nuą, yəi aa kpɛɛ, daa nwumɛ̨ kpɔ kɔlɔ-kɔlɔ. 4 Yai-Laa, yɛ́ pələɠaai lɛ mą́ą́, mą́ą́ kwɛli, ɉu hiɛ ɓo pələ ɓa. 5 'Dɛ̨́nɛ̨n dɔɔ yɛ́ tɛ̨ą pələi mɛ̨i, 'Ə́ mą́ą́ kwɛli ɉu yíiɓo pələ ɓa, mąąhɔlɔɓo, málo Yálá ɓaa a yɛ́. Gílitɔɔi lɔ yɛ́ a yələ kəlee. 6 Yai-Laa, bələi yá kulɔla ə́ woo ɓa, yɛ́ nu ɲɛ̨imąąwɛlikaa, Ə́ kiliŋąhiɛ yili ɓa a yələ kəlee. 7 'Hvó kɛa ə́ kili lɛɛ, múhəɠɛɛ yələ nɛ̨ŋɛ̨ŋaa diɛ, da nwɔ́ túwú pələ ɲɔ̨nŋaa, Kɛlaa, ə́ kiliŋąhiɛ ə́ vilɛn mą́ą́ ə́ wɔ ɲɛ̨imąąwɛlikaa hu, Gbala ə tɔɔ, Yai-Laa, yɛ́ mɛ̨nį lɛlɛɛi. 8 Yai-Laa nwɔ mɛ̨nį lɛlɛɛ moɔ! Ɉaŋąŋąąi moɔ! A nwɔ pələi lɛ nɛ̨ŋɛ̨n ɉəɠənuą diɛ. 9 Nuąi da di kpɔwɔ mąą yɛɛ, a di tɛ̨nɛ̨ndɔɔ tələnmolaa ɓa, nuąi di hva di nwun dɛ, a nwɔ pələi lɛ diɛ. 10 Yai-Laa nwɔ pələɠaai kaa a tələnmolaa, da tɛ̨ą, nuąi da nwɔ mįnɛ̨i hu wooɠaa pɔ mɛ̨nį kɛ. 11 Ə́ laa mąąwiɛ mɛ̨nį ɓa, Yai-Laa, nwɔ́ nɛ̨ŋɛ̨n mąąhvaa lɛɛ, gɛnɛ̨ ɓə! 12 Nui a ɲɔw Yai-Laa ɓa, Yai-Laa a ɉiɛ pələ lɛ mą, yɛ ɉon na. 13 Mąą nu a yíi nɛ̨ɛ̨ ɓo, ɉuwu yɛ lɔi hɔlɔɓo. 14 Yai-Laa a gwəi mɛ̨nį lɛ, nuąi da ɲɔw mą, diɛ, yɛ gɛ, diɛ nwɔ mįnɛ̨i hu wooɠaa kɔ́lɔn. 15 Ɲɛ̨́i həɛi lɔ a yələ kəlee Yai-Laa pɔ pələ, mąąhɔlɔɓo, yaa lɔ ɓə gɔ́wɔ́ kulɔ hɛlɛn ɉu. 16 'Ə́ ɲɛ̨i lɛlɛɛ hee mą́ą́ pələ, 'mą́ą́wɛli kaa, ɲą́ą́ dɔ̨nɔ̨ lɔ ka, mą́ą́wɛliɛi. 17 Nwɔ́ liihɛlɛn aa ɉú pu mą́ą́, 'gúlɔ nwɔ́ mɔ̨nɔ̨ɠaai hu. 18 Mą́ą́ wɛli pələ kaa, da nwɔ́ mɔ̨nɔ̨ mįi pələ, nwɔ́ nɛ̨ŋɛ̨nŋaai kəlee kulɔ mą́ą́. 19 Ɲówóɠaa tamą pələ kaa! Nwɛlikpɛɛmąąlaai di gulɔi a ɲą́ą́, da nwąnąlɔ túwɔ́i di moi a ɲą́ą́i, Ə́ nąą kaa! 20 'Ə́ ɲɛ̨i kɛ nwɔ́ yɛnɛ̨ɛ̨ ɓa, gúlɔ ɲəi kɛ wɛ! Mą́ą́ kilɛi ɓaa ə́ hvaŋąn mu, vá pɛli nwumɛ̨i. 21 Kwəi kwələlaa, da tɛ̨ą ɓə da náá hɔnmo. Yɛ́ ɓə ŋą́ą́ gílitɔɔ yɛ́, 'hvó lənə mą́ą́. 22 Ee kə! Yálá, Israɛlə nwun mąąɓo! 'Gulɔ nwɔ mąąwɛli mɛ̨nį kəlee hu. |