Mąątɛ̨nɛ̨ 21 - Yálá laawoo hɛɓɛ (dc)Gwa pɛli gu kilitɔɔi Yai-Laa ɓa 1 Nwələ ɲɛ̨i tɔwɔmun. Davidə nwɔ wələ. 2 Yai-Laa, tɔɔmun a kwəinɛ̨ɛ̨ hɔlɔɓo ə́ hvąŋąn mu. Ee kə! Gɔ́ nɛ̨ɛ̨ mɛ̨nį yɛ́ aa gwə́inɛ̨ɛ̨ kɛnɛ̨ ee! 3 Ɉɛn nwɛli ə kɛ mą́ą́, yaa dɛɛ bɔ, níiɓa mɛ̨nįi ŋį́ vɛli yɛ́, hvó lənə li mą. 4 Yá laa nąą tɔwɔ, Ə́ naakwiɛn a lúwɔ́ da mɛ̨inɛ̨ɛ̨ɠaa, yɛ́ hɛni lɔ nwuɔ̨. 5 Ə yɛnɛ̨ɛ̨ hu hvɛli yɛ́, ə́ dɛɛ bɔ, a yɛnɛ̨ɛ̨i kpɛɛ hvo mą. 6 Ə́ wɔ yeetɛɛmąąlaa, aa kɛ mą a ɲɛ̨i pɔ̨nɔ̨ kɛnɛ̨, Yáá mąąwiɛ kɛ mą, loo hvo mą. 7 Yáá gɛ a lúwɔ́lon, a yələ kəlee mɛ̨nį, a kɛ ə́ ɲɛ̨i mu, yá gɔ́ a kwəinɛ̨ɛ̨. 8 A tɛ̨ą, tɔɔmun gilitɔɔi Yai-Laa ɓa, ɛlɛɛ, Yələkɔlɔn ɉu Yálá nwɔ tələnmolaa a dɔɔ kpɔ gbilin. 9 Ə́ yee kaa pai tɛɛi ə́ yowoɠaa kəlee diɛ, nuąi da tɔɔ ə́ la, ə́ ɓa-mįi-yee a gəlee hon. 10 Ɲələi ya ə́ ɲɛ̨ilai nɛ la, yá di kɛ a kpaɠa nwɔ̨n. Yai-Laa a di kpələ, a líiholi, nwɔ̨n ɲɛ di kələn. 11 Yá di lonnii kpɛɛ lɔi mɛ̨i, yɛ́ di huwu pu, diɛ kulɔ yɛnɛ̨ɛ̨ nuą lɔwai. 12 Da mɛ̨nį ɲɔ̨nwɔ̨ɔ̨ mąą kili tee di kwəi, yɛ hvilɛn na yɛ́, ɛlɛɛ, di mąn nɔgilii kɛ, di yee hva lɔ yɛ́. 13 Mąąhɔlɔɓo, yá di too di kpowoɲɛ̨i ɓa pələ, yɛ́ di hɛŋi di ɲɛ̨ilain a ə́ wɔ kilɛn. 14 'Hąŋą ə́ tɔɔ a ə́ hvąŋą, Yai-Laa! Əgɛ ku ə́ wɔ kuláálaa mąą wələ too, ku mąątɛ̨nɛ̨ a kwəinɛ̨ɛ̨ wələ. |