Mąątɛ̨nɛ̨ 19 - Yálá laawoo hɛɓɛ (dc)

¹ Nwələ ɲɛ̨itɔwɔ mun. Davidə nwɔ wələ.

² Yələkɔlɔn ɉu hɛnŋaa da Yai-Laa mąąwiɛ pələ noloɓo, yələ kwəi hɛnŋaa diɛ gɛ kólóɠaa ɲɛ̨i lɛ.

³ Yələɓɔɔ yɛ ɉukulɔ yələɓɔɔ ɓa, kpinį yɛ ɲɛ̨i lɛ kpinį ɓa.

⁴ Hvo pɛ̨ɛ̨ li, di woo hva tɔɔ, nu hva di woo mɛ̨n.

⁵ Kɛlaa, di wɔ wɛlɛɛwoo a hiɛ yɛnɛ̨ɛ̨ nąą kəlee, di woo yɛ həli kpɔ lɔi kpon ɉeei. Yálá aa pɛlɛ́ tɔɔ laa a hvoló nwɔɔ.

⁶ Yələ wala pɔ, yili a kulɔ ɲəi bɛlɛ́n, yɛ́ nui aa nɛ̨ą həɠə a nįnɛ̨; yɛ kpakolo hvaŋą kɛnɛ̨ɛ̨i pai nwɔ gilɛi kɔ́wɔ tɔɔi.

⁷ A muhəɠə yələkɔlɔn bələ tɔ̨nɔ̨, ə nwɔ gilɛ həɠə yələ kwəi nąą kəlee, ə naa kulɔ bələ tɔ̨nɔ̨; hɛn da hva pɛli kulɔ wəleen ɲəi.

⁸ Yai-Laa nwɔ tɔ́n mąąkulɔi hvo mą, a yɛnɛ̨ɛ̨ tɛɛ nu pɔ; Yai-Laa hvaa woo hva ɉəɠə mą, a kili tɛɛ nu tunun bɔ.

⁹ Yai-Laa nwɔ tíɓoɠaai haŋąąi, a nu lii ɲąąnɛ̨ɛ̨, Yai-Laa nwɔ tɔ́n nwooi hu pɔ̨nɔ̨ɔ̨i, a nu kiliŋą pono a nu.

¹⁰ Mɛ̨nį haŋąą ɓaa nu ə ɲɔw Yai-Laa ɓa, yili dɔlɔ hva kpɛɛ; Yai-Laa nwɔ mɛ̨nį hutɔɔ woo kəlee kaa a tɛ̨ą, gəlee haŋąąi.

¹¹ Viɛlaɓɔɔi ə tɛɛ hɛni ɓa, dɛɛ kpɔ hɛni waa kpulu tamąą ɓa. Nɛ̨ɛ̨i dɛɛ kwɛ̨inwulɔ ɓa, dɛɛ kpɔ kwɛ̨i gulaa nįnɛ̨ ɓa.

¹² Ə́ wɔ tímun yaa kpinįį a kili hɔlɔɓo ɉu, a ɲee kanąn a mo mą, a tɔ̨nɔ̨ hɔlɔɓo ɉu.

¹³ Gbɛɛ ɓə gili a pu nwɔ lan dúwɔ́ɠaa hu? Dɛ́ɠii nɛ̨ŋɛ̨ŋaa lɛɛ mą́ą́ a kpɛli.

¹⁴ Ə́ wɔ tímun mąąkwɛa kpɔwɔ ɲąąkɛ̨nɛ̨ nuą diɛ, di yee hvo pɛli mą́ą́, a kɛ tii, mą́ą́kulɔi hvo pai kɛi mą́ą́; ɛlɛɛ, ɲéé hva kɛ nɛ̨ŋɛ̨n gɛnɛ̨ɛ̨ hu.

¹⁵ Gɛ́ nwooɠaai kulɔ ná, ɛlɛɛ, nį́i hu mɛ̨nįɠaa, gəlee di ə́ lii hon, Yai-Laa; yɛ́i ə́ kaa a nwɔ́ kwɛni, da mąąkpɛmun.