Mąątɛ̨nɛ̨ 18 - Yálá laawoo hɛɓɛ (dc)1 Nwələ ɲɛ̨itɔwɔmun, Yai-Laa nwɔ tí mun Davidə nwɔ wələ woo; Yai-Laa ɓə gaa hvaai bɔ nwələi ŋɛ̨i hu, a ɲələi ŋɛ̨i Yai-Laa ə gulɔ laa ɲowoɠaa yəi, gəlee ə mą kɛ, Saulə. 2 Yɛ diɛ: Ə́ wɛli kaa mą́ą́ Yai-Laa, yɛ́i a nwɔ́ huwalawala. 3 Yai-Laa kaa a nwɔ́ kwɛni, a nóo kpɔlɔ, da nwún mąąɓomun. Yaa ɓə a nwɔ́ Yálá, a kwɛni woloi ŋą́ mą́ą́ kilɛ ɉui; gaa a nwɔ́ hə́mə́, a nwɔ́ yee tɛɛmąą kɛ kwɛli hɛn da mą́ą́kpɛ hįi. 4 Mąąwiɛ ə kɛ mą! Ŋį́ Yai-Laa təli lɔ, ɲéé ə tɛɛ ɲówoɠaa diɛ. 5 Haa aa kɛ kɛa ŋą yɛliɠaa pili gbáŋə́i, haa aa kɛ nąląąn bili mɛ̨́i, nąląąn aa tɛ a ɲą́ą́ dɛ́ɠii, yɛ yá hvɛɛ, 6 ɲąmuątaa yɛliɠaa daa kɛ kpinįn a ɲą́ą́, haa nwɔ hɛlɛnŋaai tɛɛ kɛ dɔ́wɔ. 7 Gɛ́ɛ́ mɔ̨nɔ̨i tii hu, ŋą́ Yai-Laa təli, ŋą́ nwóó tɛ nwɔ́ Yálái pɔ pələ, ə lɛɛ nwɔ pɛ́lɛ́i mu, ə nwóó mu hon, tomąi tii ŋį́ mo, nwóó ə too nwəlii. 8 Nąąlɔwai, lɔi hu ə pu mą, ə kpɛlin, yeeɠaa kɔ́wɔ hvilɛn ɉiiɠaa di kpɛlin, di hu ə pu diɛ, ɓɛlɔwai ə níi ɲąnwąną la. 9 Nwɔ̨n nulu ə kɛi kulɔ ɉunwɔ̨i, kɛɛ kala nwɔ̨n nən yɛ kulɔ na, nwɔ̨n dəŋąɠaa diɛ ɓo ɉu. 10 Yai-Laa ə yələkɔlɔn da wolo kpinįn gɛ, ə tɛɛ laa, ə hvilɛn tulɔ kpinįn gɛnɛ̨ɛ̨ yɛ ɓo gɔwɔ mu. 11 Ə kɛ heeni mąąkpɛ malaka ta mɛ̨i, yɛ koon yɛ li vaŋą lii pələ kəlee. 12 Ə li ə noo tulɔ kpinįn gɛnɛ̨ɛ̨ ta hu, ə mąą kpinįn a lulu hu wiaa, nąą hu kpinɛ̨ɛ̨ yɛ yá kpon ɉu kwɛa. 13 Kɛɛ pɔ̨nɔ̨ tawolo ə kɛ dɔwɔ, dulɔ kpinįnŋąąi tii diɛ tɛɛ, hawonn da nwɔ̨n gbaalənŋąą diɛ kulɔ. 14 Yai-Laa ə lɛɛ yələkɔlɔn ɉu, ə yələgbąnąą ɓɛla, Hɛn Gəlee Nąmu ə hvaa. 15 Ə nwɔ mɛ̨ɛ̨kɔwɠaai pili pələ kəlee pɔ, yɛ mąlą-mąlą kulɔ kɛɛnąą kəlee. 16 Yai-Laa, ə́ tomą woo, da ə́ wɔ liiholii tii mąą mɛ̨nį ɓa, gboloyá ɲá kɔ́w ɓa, ə kulɔ pɔ̨nɔ̨ ŋą, lɔi kɔ́wɔ hvilɛn ɉiiɠaa mąą ə pɔ̨nɔ̨. 17 Nąąlɔwai, ə lɛɛ yələi, ə ɲee haɲą, ə ɲéé hon, ə gúlɔ ɲá kpɛa kpɛai tii hu. 18 Ə gúlɔ ɲówo huwala walaaɠaai yeemu, da gɔ́yɔwɔɠaai tii di hvaŋą kɛnɛ̨i mą́ą́i. 19 Ɲələi ŋį́ too la, di mą́ą́tinɛ̨n, Kɛlaa, Yai-Laa ə pa ə mą́ą́kpɔnmąąɓo. 20 Ə gúlɔ nɛ̨ŋɛ̨kpɛlɛɛ, ə lɛɛgbɔwɔ ɓa laa tɛɛ bɔ́, nwɛ́li kaa mą, mɛ̨nįi gɛ yɛ nwún mąąɓo, yaa li. 21 Yai-Laa a ɉón yɛ bələi nwɔ́ tələnmolaa kaa la, bələi lɔ ɲéé mąąhəɠɛɛ la, bələ lɔ ɓə a və́la kulɔ la; 22 Mąąhɔlɔɓo, ŋį́ Yai-Laa nwɔ liɛwooɠaai hon, ɛlɛɛ, və́ kulɔ li nwɔ́ Yálái woo mu. 23 Ŋą́ nwɔ tɔ́n nwooɠaai kəlee pɔ mɛ̨nį kɛ, və́ lənə li bɔ liɛwoo ta ɓa. 24 Ŋą́ lɛɛ mą, kwəi kwələlaa hu, və́ túwɔ́ pələ ɲɔ̨n nɔpee ta kɛ. 25 Ya ɓə gɛ, Yai-Laa yɛ və́la kulɔ, yɛ bələi nwɔ́ tələnmolaa kaa la; yɛ bələi ɲéé mąąhəɠɛɛ kɛ la ɲɛ̨i ɓa. 26 Nui dəlimoɔ, yá tələnmolaa kɛ la, nui gwəi kwəlɛɛ, yá ə kwəi kwələ mą, 27 nui a mąąhəɠə túwɔ́ ɓo, yái ə́ wɔ mąąhəɠəlaa lɛ mą; Kɛlaa nui kili ɲɔ̨nwɔ̨ɔ̨ kaa mą, hva mąą nu mąąhvaalɛɛ. 28 Nuąi daa di ɓɛlɛ kpɛɛ diɛ, yɛ́ ɓə ya yeetɛɛmąąlaa tɛɛ di pɔ, yɛ́ kpɔwɔ ɲąąkɛnɛ̨ nuą nwun ɲɛɛ. 29 Yɛ́ ɓə yá nwɔ́ nwɔ̨n hee, Yai-Laa nwɔ́ Yálá, kpinį a pɛlɛ mą́ą́, yá ɉu pɔ̨nɔ̨ ɲə́i. 30 Yá kɛ bɔ́, ŋą lan ɓoloon mɛ̨i, nwɔ́ Yálái a kɛ bɔ́, ŋą́ tɛɛ hįį la. 31 Mąą kulɔ hvo Yálá nwɔ pələi ɓa, Yai-Laa woo hu pɔ̨nɔ̨ɔ̨i. Nuąi kpɔ da di mąąkilɛ vaŋąn mu, gaa a di mąąkpɛ gbala. 32 Gbɛɛ ɓə a yálá, ə kulɔ Yai-Laa pulu? Gbɛɛ ɓə kani a gwɛni kɛnɛ̨, ə kulɔ ku wɔ Yálái pulu? 33 Ɲálái tii ɓə a ɉú yili a huwalawalalaa, yɛ ɉíɛ pələ lɛlɛ. 34 Yɛ gɔ́wɔ́ kɛ mú yɛ Lomą, ɛlɛɛ, yɛ dɛ́ yələi. 35 A ɲééɠaa huwalawala, kɔ́ kɔ́ mɛ̨nį ɓa, ɛlɛɛ, yɛ gɛ ɲéé kɔ̨nwɔ̨n yɛ kwɛli kilɛn bili. 36 Ya yɛ́ kwɛli-gbalai tɛɛ bɔ́, yɛ́ ə́ ɓa-mįi-yee pu mú, yɛ́ gɛ́nɛ̨ a mą́ą́ mɛ̨nį ɲɛ̨i kulɔ pələ ə́ yəi. 37 Yá gɔ́wɔ́ muhəɠə a nɛlɛɛ, gɔ́wɔ́ hu hva haa. 38 Ŋą́ hvilɛn ɲówóɠaa pulu, ŋį́ di hon, vá yali bulu, yii və́ di kpəli ɲąąyíi li. 39 Ŋą́ di hu kala, di hva pɛli di muhəɠəi, daa too gɔ́wɔ́ mu. 40 Yá ɉú wala wala, ə́ hvąŋą kɛ̨nɛ̨, kɔ́ kɔ́ mɛ̨nį ɓa, yá gɛ ɲówóɠaa diɛ pɛlɛ gɔ́wɔ mu. 41 Yá ɲówoɠaa kpowola lɛ mą́ą́, ɛlɛɛ, gɛ́ gɔ́yɔwɔɠaa hu kala. 42 Da kɛ gbóótəli, nu hva pa diɛ, da tómą Yai-Laa pɔ pələ, kɛlaa hva di woo mu hon. 43 Ŋą́ di mąą pənə a munuun gbala, hvaŋą yɛ li a diɛ. 44 Yá gúlɔ nuą di wɔ ɲąąhɛn mɛ̨nįɠaa yee mu, yɛ́ ɉéé lɔiɠaa nwun na; nuąi kɛ və́ di kɔ́lɔn, diɛ tí mą́ą́. 45 Ŋą́ hvaa kpɔlɔ, diɛ lɛɛ nwoo mu, nwɛ̨ą diɛ pa diɛ di nɛ̨ɛ̨i gwɛli ɲə́i. 46 Nwɛ̨ą da həɠəən diɛ pu kpulu, di mąą yɛ kpɛlin, diɛ kulɔ di loo pələi. 47 Mąąwiɛ ə kɛ Yai-Laa ɓa, lúwɔ́ ə kɛ mą́ą́kɔ̨nwɔ̨ kwɛni ɓa, yai a nwɔ́ yeetɛɛmąą kɛ Yálá. 48 Ɲálái tii ɓə a gɛ gɛ́ nwąną kulɔ, yɛ lɔiɠaa lɔ ɲéé mu. 49 Yá gúlɔ ɲówóɠaa yəi, yɛ́ ɲéé tɛɛ gɔ́yɔwɔɠaa diɛ; yɛ́ gúlɔ wɛa nuą yəi. 50 Yili mąą mɛ̨nį ɓa, Yai-laa! Ŋą́ Ə́ mąmąɓo yɛnɛ̨ɛ̨ hį́iɠaa kəlee lɔwai; gɛ́ ə́ laa too a wələ. 51 Aa kɔ́ kpɛa kpɛa nɛ̨ɛ̨ nwɔ tɔɔmun ɓa, aa túwɔ́ a tələnmolaa, nwɔ nui ə ɉəɠə ɉu mą; aa gɛ tii a Davidə da nwɔ bɛlɛ́i a yələ kəlee mɛ̨nį. |