Mąątɛ̨nɛ̨ 17 - Yálá laawoo hɛɓɛ (dc)

1 Davidə nwɔ Yálá hvɛli woo.

¹ Davidə nwɔ Yálá hvɛli woo. Yai-Laa! Ə́ wəli tɔɔ, gáá wɔlɔi yɛ́; mɛ̨nįi gáá ɉuhvɛli yɛ́, ə́ wəli tɔɔ mą, ə́ wəli laa ɓo nwɔ́ hvɛli woo tɔwɔ; lɛɛ woo hvo ná.

² Nwɔ́ tələnmolaa ə kulɔ pɔ̨nɔ̨ ŋą ə́ ɲɛ̨i ɓa, ɓɛi kpɔ mɛ̨nį haŋąą kaa laa, ə́ ɲɛ̨i ə nąą kaa.

³ Yá gwə́i kili kaa, ə mą kɛ, kpinįi ɓə, yá búlú kwɛli; yáá ɉú kɔ́ɔn, hvó mɛ̨nį ta kaa li. Gɛɛ kíliŋąhiɛ hvo too mą́ą́, yáá mąn gɔlɔn.

⁴ Gɛ́ túwɔ́ yɛ nuąi, di hvilɛn ŋąą ə́ hvaa woo pulu, mɛ̨nįɠaai ə́ mo, ŋą́ hvilɛn di pulu.

⁵ Ŋą́ hvilɛn ə́ wɔ pələɠaai mɛ̨i, mą́ą́ hva kpɛlin.

⁶ Nwɔ́ Yálá; ŋą́ ə́ təli, mąąhɔlɔɓo, yá nwóó mu hon, ə́ wəli tɔɔ nwóó ɓa, ə́ nwóó mɛ̨n.

⁷ Ə́ wɔ tələnmolaa kulɔ pɔ̨nɔ̨ ŋą, ə́ nuąi di mąąkilɛi di malo, yai a nuą kulɔ di yowoɠaa yəi, a ə́ wɔ huwalawala yeei.

⁸ Ə́ ɲɛ̨i kɛ mą́ą́, ə́ mą́ą́ kpɛ yɛ nu ɲɛ̨i lon, nóo ə́ hvaŋąn mu.

⁹ Mą́ą́ kwɛa nwąnąlɔ nuą diɛ, a diɛi kɛi too mɛ̨́i; da nuąi daa mą́ą́tinɛ̨n, yowolaa kɛnɛ̨ ə ɓo di kwəi.

¹⁰ Di wulɔ aa di laahvɛɛ, kpɔwɔ ɲąąkɛnɛ woo ə ɓo di la.

¹¹ Di kaa li, di kaa pai bɔ́ pələ, daa mą́ą́tinɛ̨n daa doo gee hu, di ɲɛ̨i heɛ mą́ą́ diɛ di dóó.

¹² Di kɛ pələ kaa yɛ yalai hulúun ɉii huwɔ hvala mɛ̨nį ɓa, yɛ yala lon heeni huwɔ tɔwɔi.

¹³ 'Ə́ muhəɠə Yai-Laa, ə́ kɔ́ pɛlɛ mą, 'ɲali bulu! 'Nwún mąąɓo a ə́ wɔ ɓɔwa kwɛai, nwąnąlɔmun ɲəi.

¹⁴ Yai-Laa, ə́ yee ə di kpɛ lɔi mɛ̨i, di həɠə yɛnɛ̨ɛ̨, di kulɔ nu kanŋaa lɔwai. Yili kpɔ ɓə mąąnɛ̨ɛ̨ ə həli diɛ yɛnɛ̨ɛ̨ ɓɛ. 'Di pilɛ a mɛ̨nį ɲąąnwąnąąi ə́ naa di tɔwɔi! Di lonnii di pilɛ ɉu, di da lɛɛ di kwəi lonnii tɔwɔ.

¹⁵ Nwɛ́i, tələnmolaa hu ɓə gáá pai ə́ ɲɛ̨ilai kaai laa, ŋą́ pa ŋį́nąą ɓoi, ŋą́ pilɛ a ə́ ɲɛ̨ilai.